زوجي والمسيار

اهلين حبايبي
وكل عام وانتم افضل واقرب وبأحسن حال
صراحه انا ماادري ليش اكتب هل هي مجرد فضفضه والا طلب حل
لكني من النساء اللي اكتم ونادر افضفض لاحد ولذلك تلقيني متوتره واعصب ومصابه بقلق وهذي صفتي من الطفوله
هذي نبذه مختصره عني
نجي لطويل العمر اللي هو زوجي سبب مشكلتي
بالمختصر هو رجل محافظ جدا متدين خلوق ممكن اقول كل حرمه تتمناه لكن مع ذلك هو غير كامل وعنده عيوب
وانا تعودت وضغطت على نفسي وتقبلته بعيوبه
يحب يساعد الفقرا والمساكين
وطبعا هالفقرا منهم ارامل ومطلقات وتعرفون الشيطان كيف يدخل في اي علاقه بين رجل وامراه ولو كانت بدايتها لله
كنت دايم اقول لاي وحده تشتكي زوجها انه ينعزل ويغلق عليه الباب انه عنده بلاء ويكلم حريم
وهذا اللي صار مع زوجي
من بدايه السنه صار ينعزل كثير يغلق عليه الباب اذا دخلت عليه والاولاد يتضايق جدا
واحيان كثير ينام في المجلس
وكم مره اكلمه يقول ابشري ينام معي كم يوم ثم يرجع للمجلس
صراحه كنت اشك في وضعه لكن غلب على ظني انه يشوف افلام واقول فتره وتعدي
حياتنا ماشيه زي ماهي الا اني لاحظت انه ماهوب حريص على الفراش وزياده لو حصل شي فهو ضعيف لكن ماهتميت بالموضوع وقلت الرجال خلاص ضعف
وكنت مثل اللي غم على عقلي ليقضي الله امرا كان مفعولا
مره جيت وطلبت يعطيني جواله تغير وجهه ورفض وقتها شكيت فيه بالمره وعزمت اشوف جواله
ثم راحت الايام ونسيت
بعدها طلبت يحول لي بعض الصور في جواله في الواتس وقام عطانيه وحولتها ويوم خلصت طلعت من المحادثه ومريت على محادثاته مرور سريع لقيت اسم رجال غريب ماقد سمعت به عنده وشفت المحادثه اسلوب حرمه واضح دخلت عليها لقيت سوالف واجد وحرمه مافيها شك
اصابتني حاله من الغضب والقهر لكن تظاهرت بالهدوء
كانت هذه الحادثه بداية شهر 8
بديت اراقب جواله واشوف بينهم رسايل بارده نوعا ما يعني ممكن ترسل رساله مايرد عليها الا من بكره
لكن اكثر مازعلني يوم رحت الرسايل القديمه قريت رسايل حميميه اكثر مايقولها الا الرجل لزوجته
وكما قلت زوجي فيه دين كيف يقول هالكلام لامرأه تعرف عليها عن اي طريق
وكنت دايم اتكلم له عن اللي يكلمون النساء الاجنبيات واحذره واخوفه بالله من بعيد لبعيد
وقبل رمضان باسبوع ترك الجوال في الشاحن وراح للمسجد
اغلقت الباب ودخلت للرسايل القديمه من البدايه وعرفت انها امراأه فقيره رقمها عطاه اياه بعضهم لمساعدتها ووجدته يعرض عليها زواج المسيار ووافقت
وقتها اصبت بانهيار نفسي ورجفه في اطرافي وغليان في دمي
ماكنت اشك انه ممكن يستغفلني ويتزوج مسيار
خاصه ان علاقتنا مع بعض ممتازه مافيه مشاكل ولا تقصير من ناحيتي وباعترافه هو
علاقه قايمه على الحب والاحترام والتفاهم
لكن مثل ما اعرف وتعرفون كل هذا لايشفع للمرأه اذا اراد الرجل ان يجدد شبابه كمايقولون ثم يكتشف انه زاد شيبه وليس شبابا!
طبعا حدث لي كل مايحدث للمرأه التي تزوج عليها زوجها من الالم والحزن والبكاء
وكل ذلك الوقت تظاهرت باني على غفلتي ولم اظهر له شيئا
لكني توجهت لله ان يربط على قلبي ويلهمني الرشد والصواب
ومازلت اتابعه وعرفت في اخر رمضان من احدى رسائلها انه مطلقها وخرجت من العده وان الخطاب يتقدمون لها ولكن قلبها مازال معلق به وترد الخطاب
حينها اصبت بالدهشه والذهول ويعلم الله لم افرح
لانه اذا طلقها المفروض تنقطع العلاقه بتاتا لماذا يتواصل معها وهو طلقها بارادته ويبدوا انه بتفهم منها لان الرسايل التي بينهم ليس فيها غضب او لوم او عتاب
وحقيقه لا ادري ماهو سبب الطلاق
هي من جنسيه عربيه وفي الفتره الاخيره يكثر من مدح بنات البلد ويقول مافيه زيهم وكأنه يقول ان بنات غيرهم مايملون العين
طبعا مدحي والتغزل فيني زايد حبتين لانه من يوم تزوجها وهو مكثر عيار الغزل والمدح ليغطي على سوءته وكنت اظن انه يغطي على عجزه في الفراش
لكني عطيته على جوه وماكنت اظهر له ضيقي من ضعفه او تقصيره
مشكلتي الان مع علمي انه طلقها وخرجت من العده لكن ماعاد اثق فيه واذا خرج من البيت وتأخر اتوتر بالحيل وافكر انه رايح لها واتصل بأي عذر عشان اتإكد هو رايح لها او لا
الرسايل اللي بينهم مسببه لي قلق وتوتر
اليوم قلت له فيه رجال (من جنسيه قريبه من جنستها)يبحث عن زوجه كانك تعرف وانا ابيه يذكرها
تغير وجهه وسكت شوي وقال فيه رجال هنا منهم يعرف اكثر
يعني رفض يذكر هالمرأه مادري هو مايبيها تتزوج والا خايف اعرف شي
ماادري كيف اتصرف وش اسوي معه