زوجي وانا ابنة ال19

السلام عليكم
ترددت كثير في قولي للمشكله
لأني احيانا احس انه مو مشكله .. و احيانا احس اني جالسه اضر نفسي لاني بطبعي اكتم اذا زعلني شي من احد احبه

انا متزوجة من سنه ونص عندي طفله و لسا حامل ..
عمري 19 سنه
حملت بعد زواجي بشهر
ماكنت ابغى احمل بدري بس كان عندي اعتقاد اني لايمكن احمل
ولا اعرف سبب الاعتقاد
فرحت بحملي و زوجي كمان
قال لامه وهي كمان فرحت
امي انصدمت .. مابينت لي انو فرحانه ..مع انو حدث نفس الشي مع اختي الكبيره و اذكر فرحتها و اهتمامها فيها بعكسي ..
جاني الم لما كنت بالشهر الثاني و ركض فيني للمستشفى .. و صرت بعدها اتصنع الالم .. حتى اشوف اهتمامه لانو ماكان فيه احد يهتم فيني كذا ..
جبت البنت و كنت سعيده فيها وحتى امي و زوجي و اهله ..
صارت معي مشاكل في الرحم و انو مقلوب و مستحيل احمل و الدورة موش منتضمه و قالت لي اتركي حبوب المانع .. تركتها و حملت !!
بنتي يوم احمل عمرها 8 شهور
مشكلتي تبدا مني اولا
انا عااااطفيه جدا .. كنت اتمنى و اتخيل زوجي يكون لي اب و اخ وصديق و كل شي
بس جاني زوج مو مثل ماتوقعت او مو مثل ماوعدني ايام الملكة ..!
زوجي مايعترف بالبوسه او الضمه يقول م لها داعي ..
يهتم في بنته اكثر مما كان يهتم فيني ..يبغاها دايما كاشخه و هو مصروف يكفي م يعطيني ..
يصرف علي بس مو بكل شي احتاجه .. يعني اقوله م يكفيني 500 انا احتياجاتي اكثر .. و كنت متعوده انو نلبس ماركات و دايم لبسنا مرتب
من تزوجت م لبست شي كويس و مرتب غير اللي شريتهم جهاز للزواج
و بحملي م شريت اي تيور كامل مرتب .. ولا تكلمت
راتب زوجي كووويس مره
بس مو عارفين فين يروح .. م يبغا اغراض البيت الشهريه تزداد عن 500 .. واذا زادت يقولي انتي مسرفه !!
يجي للبيت اقوله اسوي لكك عشا يقول بنام شويه بعدين اقولك تسوي لي .. و انتظره يصحى و اصحيه يقولي م ابغى خلاص بس بدي انام..
ويقوم الصبح زعلان يقولي م ساويتي عشا .. وانا نايمه بدون عشا ولا اتكلم .. و اراضيه بكل مره يزعل فيها لانو يقلب الخطا كلو علي و اصير انا الغلطانه ..
هو بطبعه زعووول .. وانا احبه و اموت فيه و هذي المشكله .. و هو لما يصير بينا علاقة يقولي انو يحبني وانا اعتبره كذاب لأنه لو يحبني قالها باي وقت مو بس بالوقت هذا
امممم بديت الاحظ عليه بدا يبخل علي .. يجي ب الشهر والشهرين م يعطيني مصروفي و انا م اتكلم
مر علي الشتا مرتين و صيف ولا مره شريت فيها تيور واحد جديد كلو من جهازي للزواج ..
بزواج قرايبي قالي 500 م في غيرها و دورت على شي يرضيني و يرضيه و الحمد لله ربي يسرها .. وخواتي ع فستانين ب 6000 ريال .. و حالتهم الماديه مثلنا ..
.. انا اكيد فيني جوانب سيئه .. منها .. كسوله اأجل اعمالي .. حساسه بس ابكي ..
عنده 4 اخوان .. 2 موضفين .. اهله يقولو له يجيب اغراضهم كان م عندهم اولاد ..
م عمرهم ضايقوني .. بس بهذا الشي تضايقت لانو احيان اقوله جيب لي مثلا دجاج او طماطم .. يقولي م معي .. و اتفاجأ انو جايب لأهله نفس اللي انا طلبت لما طلبو منه .انا يفرحني انو يخدم اهله بس موش على حسابي ..
هو البكر و اول واحد يتزوج بين اخوانه و انا اول حرمه تدخل بينهم و انا اتغطا عنهم لانو عائله محافظة .. اخوه اللي اصغر منه بسنتين .. ذبحني ب نظراته لما كنا طالعين مع اهل زوجي 4 ايام بالبر .. يراقبني .. وبحكم انو بنتي لسا صغيره تحتاج اغير لها و اسوي لها رضعه .. و كله يحتاج انو اتحرك وعبايني ساتره وعالراس كمان و عيوني مو مكحله و اتجنب اتزين .. ولا قلت لزوجي للان ولا راح اقول لانو بس يناضر بدون م يتكلم و م يناظر الا عيوني بدون تفحص لجسمي الحمد لله ..
صالتي ببيتي م اكتملت و متكاسل يكملها يقول مكلف مع انو اشيا م تكلف ب المره ..
حملي هذا انا رافضته و ينزل مني افرازات خضرا و انا عارفه انو مو كويس و قلت للطبيبه عطتني فقط تحاميل مهبليه و حمض الفوليك مع فيتامينات و فوار و لا اكلت الا 3 منه .. و اتمنى انه م يستمر !!
ظهري يألمني بشكل فضيييع من جد و زوجي مو عاطيني اهمية ابدا
ياخذ اجازة من عمله عشان يروح البر ولا عمره اخذ اجازة عشان يمشيني !!
ينرفزني اذا تكلم عن حريم كبار او صغار يعرفهم من هو صغير ولا يبغاني اتكلم مثله !!
هو زي باقي العالم فيه اشياء كويسه و اشياء مو كويسه ..
و هو مو فاهممني و يعتبر انو اذا تولت الحرمة شي يعني راح تخربه .. و انو الحرمه مالها اي راي
وانا اعترف ب تقصيري بس انا م شفت شي يشجعني على اني اصير مهتمه
من اتزوجت و انا حاسه اني ضالمه حالي .. و كثير احيان احس نفسي ندماااانه ع الزواج .. مع انو محد غصبني ابدا ..
عارفه طولت عليكم بس ادعولي .. و كثير اشياء م قلتها
ارجوكم ساعدوني