زوجي واهله والعزوبيه والطلاق

السلام عليكم ورحمة الله وبركاته

اخواتي انا اعيش معاناة صعبة ومقبله على قرار مصيري واحتاج مشورتكم بعد الدعاء


انا متزوجه جديد من كم شهر تقريبا 8 شهور واعيش مع اهل زوجي بنفس البيت في شقه مستقله لكن اعاني الامرين من التصاق زوجي بأهله التصاق عجيب

زوجي واهله بينهم التصاق غريب الى الان مابعد استوعبوا لاهم ولا هو انه تزوج والواجب يكون مستقل بحياته مع زوجته

زوجي يوميا لازم يقعد معهم كل مغرب يتقهوى معاهم وانا اكون بالشقه لحالي لانه مايرضى اروح لهم الا مره بالشهر طبعا واذا جلس معهم ينسى نفسه كل شي عن حياتنا يحكيه لهم وين رحنا وين جينا وش صار علينا وانا مايحكي لي اي شي عن اهله ابدا يقول هذه خصوصيه انتي مالك دخل فيهم

وطبعا غير الغدا يوميا الظهر يتغدا معهم بحكم ظروف عملي يعني اللي حاصل الظهر يتغدا معهم والمغرب يتقهوى معهم والليل اتعشا لحالي لانه على قوله مايحب يتعشا بدري رغم اني مااتعشا الا 10 او 10 ونص والخلاصه صرنا انا وهو مانجتمع على وجبه وحده طول اليوم

اهله دايم يكلمونه تعال لنا هات لنا سو لنا وانا والله احس بالغصه بقلبي

والله ياجماعة الخير انا نيتي مو سيئه ولا ابي ابعده عنهم لكن الوسطيه حلوه يعني طالما هو يوميا يتغدا معهم الظهر ويشوفهم خلاص كفايه وممكن مرتين بالاسبوع يتقهوى معاهم والله مااقول شي لكن يوميا معهم ظهر ومغرب غير المرور الخفيف وهو جاي بعد طلعته بالليل يمرهم وهو طالع الصباح دوامه يمرهم وعلى هالحال يوميا طيب انا وش بقى لي من يومه !


انا احس تعبت وماعدت اتحمل لاني احس بالغيره ماهو بس من وجوده الدائم معاهم لا والله لا لكن لأني احس قلبه على قلبهم مو على قلبي يعني بينهم اسرار وخفايا تخليني احس اني من جد غريبه بينهم

حياتي مع زوجي كلها مشاكل وخلافات بسبب اهله وبسبب عدم احساسه بمسؤولية الزواج ورفضه انه يغير من نفسه والله العظيم الى الان هو متعود على حياة العزوبيه اقسم برب البيت الى الان تفاصيل يومه ماتختلف عن يوم كان عزوبي نفس البرنامج اليومي يعيشه وماهو راضي يغير شي من حياته بحجة انه تعود

مايحب يطلع معي مكان او نروح سوق سوا او نسوي شوبينق سوا مره مايحب دايم يقول قولي اللي تبين وانا اجيبه حتى لو كانت اثاث او غيره او يقول لي روحي انتي شوفي وش يناسب وهاتيه يعني ياانا اروح لحالي او هو يروح لحاله لكن نروح سوا لا مايحب

يمر اليوم كامل مااشوفه الا ساعه وحده بس قبل المغرب ومن بعدها يطلع يروح لاهله وبعدها يطلع مدري وين يروح وانا اقعد لحالي اتعشى لحالي وانام لحالي وهو مايجي الا الساعه 1 واحيان 2 بالليل

كل شي في حياته يعتبره خصوصيه ومو من حقي اسأل عنه مو من حقي اقوله وين رايح والله والله حتى لو جواله يدق قدامي مو من حقي اسأل مين اللي يتصل اساسا هو مايرد على اتصالاته قدامي عشان مااسمع واعرف شي حتى لو كانوا اللي يتصلون اهله عشان مااسمع شي واعرف

مكالماته كلها يسويها برا البيت وبعيد عني عشان ابقى ضايعه ماني عارفه وش يصير حولي


هذه حياتي معه من يوم تزوجت وانا تعبت حاولت اغير من نفسي واتكيف على حياته لكن صعب اكذب على نفسي لو اقول اقدر اعيش مع رجل اسمه زوجي لكن في واقعنا مايربطنا سوا عقد

حاولت اغير من طبعه لكن هو رافض يقول هذه حياتي وهذا انا عاجبك تعيشين معي بهذه الطريقه اهلا وسهلا مو عاجبك مع السلامه

انا الان افكر بالطلاق رغم اني احبه وربي يشهد علي لكن تعبت من هذه الحياه وهو تعب من كثر المشاكل والخلافات اللي يوميا تحصل وبدت حياتنا تصير بارده فاتره من كثر المشاكل والنكد حتى اني صرت احس انه بدا يكرهني وقالها لي اكثر من مره وقت الهواش يقول انا بديت انفر منك

شوروا علي اخواتي هل احسم الموضوع وانفصل عنه او احاول من جديد لعل الله يقضي امرا كان مفعولا


الله يخليكم لا تنسوني في هذه الساعه من هذا اليوم الفضيل بدعوه بتفريج همي لاني والله بهم مايعلمه الا الله