بتكلم عن بدايه حياتي كلها
عشان تكونون فاهمين الوضع زين وتعطوني رايكم
انا توفى ابوي وعمري تقريبا ماتجاوز الست أشهر
لي اخت اكبر مني
المهم بعد مامات ابوي عمي اخو ابوي تزوج امي يقاله يحفظ بنات اخوه مايربيهم رجل غريب عنهم. طقوس القديمين
المهم عمي هذا عنده زوجه قبل امي وجايب منها عيال
ربانا عمي هذا وعاملنا احسن مايكون وكان يحبني انا كثير،،،كبرنا كان واحد من عياله يحبني وانا شايفه نفسي عليه مااعطيه وجهه
مرت السنوات وكبرنا ولد عمي هذا ترك مدرسته وهو صغير وسافر لاحد المدن وكافح يجمع فلوس. كان يشتغل بكباين قبل ثم ببطايق الشحن ماخلى شغله مااشتغلها. يجمع فلوس المهر عشان يتقدم لي ويوم جمع كل شي. كلم ابوه يكلم امي عشان يتقدم لي امي كلمتني وانا ما مت ضحك قسم بالله طحت بالمطبخ اضحك من السخريه. اقول فلان يبيني وميته ضحك
المهم كل اللي حولي اقنعوني قالو بالعكس هو حبيب وطيب ويحبك. طبعا له خوات من ابوه. ويصيرو خواتي من امي. ياليت فهمتو علي
قلت يالله شوركم وهدايه الله .. تزوجنا
يابنات من اول اسبوع علمي الحنان والحب. خلاني احبه غصب علي. عوضني عن اليتم اللي عشته
كان هادي جدا وانا عصبيه جدا مرت السنوات مايرفض لي طلب ابدا
سافرت مع للمدينه اللي يشتغل فيها
كنت اروح واجي لأي مكان كنت لو اطلع بالشارع عاريه كان يثق فيني بالحيل
كانت حالتنا الماديه بسيطه لما تحسن وضعنا شوي قلت غير لي الشقه مرت 11 سنه على زواجنا . أنجبت ثلاث اطفال وبعده. دور لنا دور ارضي ماقصر. وفرشه احسن فرش وأغلى فرش عشان يرضيني بس.
((ومن هنا بدايه تغير حياتي لجحيم))
تغير علي وتغيرت نفسيته علي صار يشرب
صار كل شوي يدقني بالكلام صار يشك فيني
ومره وبدون مقدمات جالسه انا وعيالي بالحوش كنت الف سنبوسه جاني قالي قومي اوديك لأهلك ناضرت فيه باستغراب قلت وش السالفه قال مافيه سالفه اخذت العزه قلت بنفسي يحسبني ميته عليه وقوم واجمع كل أغراضي
بااكياس زباله ماعندي وقت هههههه. وهو شايفني رايحه جايه ووجهه منصفق منصدم. قلت أصلا اللي يشك فيني ماابيه.
وأخذت الأشياء المهمه وقلت الأغراض الباقيه وصلهن لي بعدين
وركبنا السياره ومسكنا الخط وحنا ساكتين وانا طول الوقت اقول بنفسي اكيد بعتذر لي. وبعد ساعه من الممشى
قالي ترا ورقه طلاقك بتوصلك يوم الأحد.
انصدمت مره وانهرت وقلت انا وش سويت وانا وش اخطيت فيه علمني ثم طلقالمهم من عوابتي فتحت باب السياره يقالي باانتحر. بخوفه،،، ومسك يدي قال لا امزح عليك المهم اعتذر
ورجعنا لبيتنا واغراضي بكل مكان مجمعه قال بنروح للخبر نغير جو. قلت اوكيه
رحنا بالطريق كان يقولي لاتخافين ماراح أخليك. اخلي العالم ولا أخليك. ويمسك يدي طول الطريق ويتراجف
وبنص الطريق ولدي حذف مسواك وطاح قدام عندي وانزل يدي تحت المرتبه بطلعه. ووهو وسوس قال وش تسوين تخيلو وقف السياره ونزل يفتش عندي يقول خاف حاطه شي تجسس لي أحد يسمعني انهرت بالطريق وبكيت ياناس ماني مصدقه هذا زوجي
اخذنا لنا منتجع على البحر ونامو عيالي. وجلسنا انا وهو الفجر على البحر. ومسك يدي قالي انا واثق فيك بس يمكن فيه احد ماسك عليك شي وجالس يضغط عليك. علميني والله ماخليك رغم كل شي. اعترفي لي والله أني بسامحك. تكفين لايهمك احد. اعترفي لي
وبكيت وحلفت ان ماعندي شي
وسكت وهو مو مقتنع
رجعنا للرياض وحنا بالطريق قال الحين بروح أدور لنا شقه وننقل الليله ..!!قلت الحين؟ قال اي عندك مانع انتي دايم تعارضيني قلت الحين الساعه 12 الناس مسكرين. قال مالك شغل سكت لاتكبر السالفه بعد
وراح فرفر بالحارات يدور اعلانات اجارات ماحصل رجعنا للبيت التعاسه. نمت من التعب وبناتي نامو بغرفهم هو ماجاه نوم يفرفر بالبيت يتخيل اصوات وازوال رجال.
وصحاني الساعه 3 الفجر قال فيه رجال دخل غرفه البنات. وانا انقز من النوم صدقته بعدين قال لاتخفين امزح عليك. رجعت اخذت غفوه. اذا هو مصحيني يقول انا دقيت على الشرطه يجون يشوفون الرجال اللي دخل بالغرفه تخيلو مقفل على بناتي. اخذت خمس دقايق الا الشرطه جايين علمهم.. حسو مو صاحي مقفل الباب ويقول رجال داخل وبناتي نائمات . اخذوه على قد عقله قالو الحين مافيه شي. وبنحط مراقبه على البيت وإذا شفنا شي علمناك راحو. وجاني قال انا مااقدر انام. خل نطلع معاد اقدر اتحمل. يالله البسي عباتك قلت لحظه اخد اغراض عيالي. أشياء خفيفه قال لا بسرعه خل نطلع. واصحي بناتي ونروح لشقه مفروشه وطول الوقت عندي أهمل نفسه وأهمل شغله بس مقابلني. شاك في
ونروح ندور شقق عشان ننقل وأول شقه قلت خلاص هذي مليت من المشاكل ابي الاستقرار والشقه ذي صغيره جدا بس ابي العافيه ويرتاح هو
المهم نقلنا واثاثنا نقلنا وبعضه حذفه وبعضه ماناسب المكان وبعضه خلاه المستأجرين اللي بعدنا بس يبي الهروب منه بااسرع وقت
كان يوسوس ان فيه احد بيخطف بناته وخلى الباص وصار هو يوديهم وانا يقفل علي باب الشقه اذا طلع وتحملت وسكتت حسّيت انه يايمر بحاله نفسيه او انه مسحور لانه انقلب رأسا على عقب وضعه
قال بنروح نعتمر قلت يالله زين اروح افضفض لربي يساعدني ويصبرني على هالوضع.
شاءالله زوجي اهتدى والتزم لله. حمدلله. بس الشك على وضعه
وكان في مكه نومت عيالي ونزلت انا وهو نصلي قبل الفجر وجلسنا انا وهو بساحه المسجد. كان فجر جمعه
ومعي قران صغير بشنطتي
طلعت القران. وقلت له احلف لك قدام الله وبيته الحرام وفي نزول الله بهالوقت ووفجر جمعه. أني ماخنتك وان كنت سامع عني شي فاني مظلومه.
قال لاتحلفين ياللي ماتخافين الله تحلفين بعالمكان وانتي كذابه كلي شي انا شايفه بعيوني. يويلك من ربك
بكيت لربي انه يطلعني من الوضع
تخيلو شاء القدر واحمل بهالوقت. انصدمت لان حملي صعب وضعيف. حملت ياعالم فجاه. والدكتوره قايله لي مراح تحملين لان عندي تكيسات وضعف المبايض
حملت في وقت مزري. بس قلت حمدلله بمكن خيره. مشيىئه الله وفتره وحامي كلها وضعي مثل ماهو
وصلت للشهر السادس زوجي زادت حالته سوء كان يشك في كل حركه مني حتى الحمام مااقدر اسكره اخلص حاجتي وهو مطرف شوي مو مسكر. صار يفتش غرفه بناتي يرفع السراير. مدري وش يدور. يفتح الدولايب وماينام لازم كل اللمبات مشغله. كنت اعاني صار يجيب سكاكين معه للبيت مدري ليه. ينام جنبه سكين. اذا سألته قال اخاف يجيني احد.
ومره من المرات كان رافع سرير بنتي يفتش تحته وتهورت وصورته فديو وهو شافني وانجن زياده. وجاني هائج اخذ الجوال وحذفني على الارض وقام يرفسني برجله تخيلي وانا حامل. ونجرحت عيني. وعيالي يوم شافهم يصارخون بعد عني.
وأمسك عيالي واسكر على نفسي خفت يجي يقتلني لان معه سكين
وبعده جا يترجاني ويتأسف ويبوس راسي. قلت خلاص تهملت كل الشهور اللي راحت بس وصلت فيك المواصيل تضربني وانا حامل أسفه ماراح اسامحك بكرا توديني لاهلي. حاول حاول. قلت خلاص نفسي طابت منك
جا بكرا ماوداني صرت اصارخ ودني والا اكلم ابوك وامي يجوني. سكت وطلع عني. رجع نفس الشي رافض ارسلت كولمي لامي علمتها. كلمته قال هي وهي ماتحترمني وحط كل شي على راسي. وقمت اصارخ وامي وابوه يسمعون قلت ياتجون يااموت نفسي معاد ابيه. وجو خذوني وأمسكه ابوه وهزئه. ورجعلنا لديرتنا. ويوم وصلنا. يدق علي يقاله يتطمن قلت لاعاد تدق. برتاح الاربعه أشهر عند اهلي لين اولد. بكى يابنات وسكر السماعه.
ويوم هدا بعد كم ساعه دق وطنشته وصار يدق كل شوي قال خلاص معاد ابي اطلقها انا بالمحكمه. كلم ابوه قال ابوه اذا سويتها معاد انت ولدي ولا اعرفك. وهو يحترم ابوه بالحيل
جاني بعد اسبوع كل شي ووسوسوته قالها لامي وابوه قال عندي الدليل بس ماودي افضحها انقلبت السالفه كلها علي
قاله ابوه وش هالكلام ماتستحي هذي بنتي مربيها انا ماعندها هالعلوم استح
شكو انه مدمن. ودوه اخوانه يحللونه مافيه شي
قال ابوه اجل فيه شي مسحور الرجل مو طبيعي لاكلامه ولا معاملته بعد مكان ثقيل وتكانه
اصبر عشاني وسامحيه. رضيت عشان عمي
صار يجي كل اسبوع عندنا ايام الويك اند ويرجع للرياض على ذا الحال. الحين بنتي لها اربع شهور من ولدتها ووضعي مثل ماهو وهو تحسنت نفسيته ومعاملته شوي تحسنت وبناتي نقلتهم عند اهلي يدرسون
وهو يتردد علينا. بس حاط لي شروط ماطلع لاحد الا اذا صار موجود. سوق مااروح مع اخواني ابد هو يوديني حتى اذا تعب احد من عيالي خلال الاسبوع مااروح اوديه. يوديه اخوي بدون مااروح. او امي
طلعات مع خواتي اللي هن خواته من الأب مااروح. احيان الناس تطلع وانا وعيالي لحالنا بالبيت تروحين معي فقط
بنتي اهملت دراستها صار مساواها متدني تعرفون البيت مليان ناس وازعاج والا داخل والا طالع وإزعاج ماصارت تهتم بدورسها
قلت لإمتى وانت تجيني كنك مسيار. خل نرجع لبيتنا نحفظ عيالنا ونهتم فيهم وانت قدامنا وهم قدامك
قال القرار اللي اتخذتيه بسهاله بروحتك لأهلك تحمليه انتي. مافي رجعه معي. متى مابغيت انا رجعتك
قلت خلاص لاعاد تجي. قال بيت ابوي في اي وقت اجي
ودي أزعل عليه. بس يابنات اذا تزاعلنا تجيه الحاله. ويزيد مرضه وكرهه لي ويتعب ويتعبني معه. ماغير اهاديه كنه طفل.
الحين تقريبا لي عند اهلي 9 أشهر. على هذا الوضع
وش رايكم ووش العمل. ؟؟
طولت عليكم اسمحو لي. بس لازم تفهمون الوضع