زوجي وتكبره

مشكلة تعالي زوجي وتكبره علي وعلى الناس
متزوجة من حوالي سنة تقريبا وحامل بطفلتي الاولى
انا عمري ٢٤ سنة وهو يكبرني ب ٨ اعوام
انا مالي بالمشاكل وشخصيتي ضعيفة جدا وحساسة بس زوجي هذا مايعجبه العجب ولا الصيام في رجب
يهيني دائما وينافخ علي ويستحقرني وكأني ولا شي بعينه
من بداية زواجنا ينافخ علي انا ورب الكعبة من اول يوم زواجنا ماشاف مني الا كل شي زين
ريحة حلوة وملابس مرتبة وبيت انيق وكل حاجة حلوة حتى ب ايام الدورة ماقصرت بشي اهم حاجة رضاه وهو مايبالي ابدا
احقر حاجة فيه انه يهيني بالكلام حتى قدام الناس واهله مرة كنا رايحين مطعم وجا الغرسون بيسألنا عن قائمة الطعام
جيت حبيت اتفلسف واتكلم انجليزي معاه
جا قالي هشش يابقرة انا لي اتكلم وربي تحطمت منه قلتله ليه تقولي كذا
يقولي لانه صوتك عالي فضحتينا بعدين يقولي تراه فلبيني مارح يفهم عربي قلتله انشالله يكون من المريخ مايصير تكلمني كذا انا زوجتك مو خدامتك وربي كنت اغص بكل لقمة وجا بنفس الليلة يبغى يصالحني بس عشان ياخذ لي يبيه مني وانا ضعيفة جدا قدامه على طول استسلم
وغيرها مواقف كثيرة
متعالي وشايف روحه على الناس
بدل مايحمد ربه على الخير لي عايش منه لا يستعلي على الخلق
يجي يقولي زوج بنت خالتك عمره ٣٦ سنة ويشتغل اوبر وكريم ولي بعمره لازم يكونو اصحاب مشاريع
الله لايبلانا
اقوله ماندري وش ظروف الناس احمد ربك على النعمة
يستهزئ ب اخوي العسكري و ب ابوي وامي وكله يقول عن اخوي لي تربطه معاه علاقة عمل انه غبي ومايفهم وحمار مايفك احد من شره
ب اختصار معاه جنون العظمة وكله يتفاخر بسياراته وبيته
وهي مو منه اصلا كلهم من ابوه لحد ما ربي بلاه وسوا اكثر من حادث وضربة بسيارته الجديدة وباعها بخسارة وماتاب لربه عصبي جدا ب امور العمل وصوت صراخه يملي المكان وكله يحلف يمين ومرات طلاق الحقير مرة كلمه واحد من شركتهم قاله انه في عامل سوا اضراب ووقف عن العمل قاله قول للعامل علي الطلاق ان مارجع بكرى للعمل غير اسفره نهائي
انا وش ذنبي تحلف علي طلاق عشان العامل مكروه جدا من لي شغالين عنده
اخوي محتك فيه كثير بطبيعة انه شغال عند اخوه الكبير والله العظيم اخوي يقولي يوم كنا بالمشروع ويوم تجي سيارة زوجك
يقولو العمال ها جا الكلب ويسبوه ب ابشع الالفاظ
وربي قالي انه في عامل مصري يدعي عليه انه يموت على سوء خاتمة ويموت بالامراض الخبيثة
لانهم حاطينه مدير هناك وكله يتأخر على العمال برواتبهم وهم يكرفون ١٠ ساعات بالنهار ويهاوش فيهم كذا بدون سبب ومطلع عينهم
يقول للعامل اذا سافر فلان انت ترتاح
يقوله لا انا ما ارتاح الا اذا فلان لي هو زوجي مات والله لا اعزم كل العمال على المطعم واخوي يقولي الكلام هذا وهو ميت من الضحك وانا ميتة قهر لانه مهما حصل يبقى زوجي وبيصير ابو عبالي
سمعة ابوه واخوانه الشباب واخواته البنات مثل العسل لانهم من عائلة معروفة الا هو سمعته حقير ونذل ونصاب
انا قلت يمكن الصاحب ساحب لانه هو طايح ب اصحابه نفس الطباع والنذالة سبحان الله مايفترقون عن بعض يوميا بالقهاوي والمطاعم حتى السفر تخيلو يسافرون مع بعض وكله يرميني ببيت اهلي وسافر معاهم ثلاث مرات
يروحو اجمل المناطق وكله يدق سنابات هناك اقوله خلنا نسافر مع بعض يقولي انا ما احب السفر بس خويي عازمني ما اقدر ارده وبعدها يقولي ذي رحلة عمل ومنتشاور هناك على امور العمل مفكرني غبية طبعا يقولي كذا وهو مبتسم ابتسامة واحد خبيث الشي الايجابي الوحيد فيه انه سخي وكريم على بيته
ولا انا ما احبه ولا قمت اطيقه خلاص
مرات افكر انزل المحكمة ارفع قضية خلع عليه او اطالبه بالطلاق او اهاوشه او اتكبر عليه
كل ذي الافكار تدور براسي يوميا بس اول ما اسمع صوت سيارته دخلت البيت اصير ضعيفة واستسلم له
قلت ل امي ل اختي وزوجة اخوي يوم كنت عندهم كلهم يضحكون علي واحس نفسي غلطت لانهم خذوها مسخرة علي وعلى زوجي ومرت اخوي الله لايوفقها مشت بسالفتي معاه عند الكل
هذا غيض من فيض فقط ولو بقعد اتكلم عن معاناتي معاه ماتكفي مليون سطر
وربي شاهد علي اني ما افتريت عليه ولا الفت من عندي عليه وعلى حياتي معاه
ماقررت انشر معاناتي معاه الا لأنه قلبي مليان منه ومن تصرفاته وتكبره