زوجي وزوجة اخوه

السلام عليكم


فيه موضوع مضايقني كثير. البعض يمكن يشوفني ابالغ. انا صار لي متزوجه تقريباً اربع سنوات وفي بداية زواجنا حصلت مشاكل كثير بس كلها انحلت الحمدلله الا مشكلة واحده. زوجي ومرت اخوه على طول فالوتس يراسلون بعض. في بداية زواجنا كان زوجي معترف وواضح انه يراسلها بس ما يوريني الرسائل ابداً. سالته ليه يراسلها قال هذه مرت اخوي الكبير. هي الي ربتني يعني بمكانت اختي الكبيره وهي الي تجيب لي الاخبار حق العائله واذا فيه اي مشكله نحاول نحلها. انا سكت وقتها ما قلت شي. بس اجا يوم العيد بعدما عرف اني رسلت رساله لاثنين من ابناء خالي قلت لهم فيها عيد مبارك. طبعاً ما عجبه الموضوع وتهاوشنا وطلب مني امسح ارقامهم واسوي لهم بلوك وما اكلم منهم. قلت له عادي انا مستعده ابلكم ما همني بس بشرط انت تعمل بلوك وحذف لمرت اخوك الان. قالت تم وخرج الجوال وعمل بلوك. طبعاً انا ما اقتنعت بهذه الحركه فجلست فتره لما جاتني فرصه افتش جواله ولقيت انه مغير اسمها (ابو ....). وبينهم رسائل كثييييييير وتقريباً رسائل يوميه. شفت فالرسائل انها تشكي له من زوجها ومن امه، وتعطيه اسرار العائله واسرار الناس. وهو يرسلها فلوس من دون ما احد يعرف. ويرسلها صورته وهي تمدحه وتقوله انت شيخ الرجال واوسم واحد فالعائله وهو يبتسم لها. واكتشفت ان في جواله ياخذ مليون سلفي ولا مره رسل لي صورته. انا حاولت اني ما ابالغ فالموضوع واني اخليهم لانهم متعودين على هذا الحال حتى من قبل ما يتزوجني. بس المشكله الان هو متزوج وهي لو محترمه تبطل الرسائل وتاخذ فلوس من زوجها وتبطل تلعب على عقله لانه اصغر منها. انا امبارح رسلت له رساله جمعه مباركه وهو اونلاين فالوتس ما فتح الرساله ولا رد عليا، رحت اشوفها كمان اونلاين فعرفت انه مشغول معها (هو كان فالدوام وانا فالبيت وهي في بلد ثانيه). هي طبعا ردت عليا وفتحت الرساله بس هو لا كل تركيزه معاها. المهم كل عشر دقايق ادخل واشوفهم الاثنين اونلاين. ومشت ساعات وهم اونلاين. انا هنا ارتفع عندي الضغط شوي وافكر احل المشكله بطريقتي. يا اما اكلم زوجها او اكلم اخته. اذا كلمته هو ما فيه فايده رح يشوف له الف طريقه يكلمها وهي نفس الوضع. امبارح اجا البيت وانا قالبه وجهي. يقول انا رسلت لك رساله ليه ما فتحتيها، قلت له تقصد الرساله الي قبل كم دقيقه؟ طيب والرساله الي رسلتها لك في ساعة الجمعه وانت اونلاين ليش ما رديت عليها؟ قال انا كنت فالدوام مشغول. قلت ايوا مشغول مع مين بالضبط؟ انت فالوتس اونلاين هذا هو الدوام حقك. المهم ما اهتم للموضوع كثير قال الله يستر انتي اليوم براسك جني. قلت اوكي شكرا. وما كلمته بعدها ولا لي نفس اكلمه.


ايش الحل يا اخوات. هل انا مبالغه والمفروض اخليهم يستمرو على هذا الحال؟ والا اكلم زوجها او اكلم اخته المهم انهي الموضوع الي بينهم. ايش رايكم؟