زوجي وطريقة تعامله

السلام عليكم ورحمة الله وبركاته
كيفكم اخواتي ان شاء الله بخير

ابدأ في طرح مشكلتي وكلي اسى لان اقرب الناس لي ماصار مثل الاول تغير علي 180 درجه صار عكس ما اتمنى صار عصبي ومزاجه على طول متعكر ويدقق على صغائر الامور يعني احس انه يدور عالمشاكل وصار يتلفظ علي بالفاظ ما تعودت اسمعها ويتعمد يعمل الاشياء اللي مااحبها ويجلس يصارخ ليه لما اكون زعلان ما تكلميني واذا كلمته يا انه يقول كلامك غير صحيح او يتلفظ علي ومع هذا ارجع اذا هدأت اتاسف واعتذر مع اني والله ما لي ذنب في كل شي يصير .

وكمان فيه موقف صار ودي اعرف رايكم فيه
قبل كم يوم اتصلت عليه اخته وقالت صار مشكله بيني وبين زوجي لازم تجوا كلكم الحين ( يعني انا وهو ) لاني طفشانه ومحتاجه احد يونسني وزوجها ما كان موجود المهم رحنا ويوم وصلنا عند بيتها قلت ل رجعني البيت وجودي ماله داعي اذا زوجها فيه وانا اصلا من كنت في بيتنا قلت له مابروح معاك اخليكم على راحتكم احسن بس هو فرض علي اروح المهم لما دخلنا عندها جلست معايه خمس دقايق وراحت عند زوجها واخوها والله العظيم جلسه لوحدي ساعه ونص ومعايه اربعه من عيالها وكلهم غير طبيعيين ازعاااج وتوتر ومضاربات وعيالها يضربون عيالي وبكا ومع كل هذا انا ما ني قادره ادافع عن عيالي
طبعا انا تضايقت جدا من هالموقفاللي صار بس اللي قهرني زياده اني ارسل لزوجي مسجات اقوله تعال بس دقيقه سكت ولد اختك ولا كأني اكلمه ولما افتكرني بعد ساعه وكانت اخته توها جات عندي جاء وناداها ولا كأني موجوده وجلس يكلمها على جنب والمصيبه انه يعرف اني مااحب احد يتعامل معايه وكاني غريبه واخته اصلا هي بنفسها تجيني وتحكي عن مشاكلها يجي هوا ويسوي لي فيها اسرار وانا امووووت من هالحركه يعني هو مايتكلم مع اخته عن مشكلتها قدامي وفي نفس الوقت يقولي كلميها طيب كيف اكلمه وانتا تبغى الشغله تسير سر بينك وبينها
وربي نفسي احكي لكم كل اللي بقلبي بس كفايه اني ضايقتكم باللي قلته وربي انه تمر علي لحظات اكره نفسي واكره حياتي بسببه انسان اناني ما يفكر الا بنفسه وبس تصوروا حتى لما اروح اشتري اشياء للبيت ارجع البيت وانا حاسه اني عامله شي غلط مدري ليه هالاحساس وربي لما اشوف وحده تشتري اقول ليه انا مو كذا مااقدر اشتري اللي نفسي فيه بس الاشياء المهمه واتمنى من قلبي اني موظفه عشان اشتري كل اللي اتمنها لانه حتى المصروف محرومه منه يعني كل شهرين يعطيني مية ريال ويجي بكره ويقول هاتيها وارجعها لكي بعدين ولا يرجعها نفسي اذا اشتهيت حاجه اقوله نشتريها وانا عازمتك عليها بس ما عندي ولو كان راتبه قليل كنت عذرته بس الشكوى لله
اتمنى القى عندكم راحتي اللي انحرمت منها