زوجي ومعاملته السيئة

السلام عليكم
كيفكم يبنات.
حابة اتكلم عن وضعي مع زوجي بعد ما انجبت مولودين الفرق بينهم سنتين وكم شهر.واثنينهم بعملية
والله يبنات كل يوم تقريبآ أبكي
ابكي من الضغط
وكثرة المسؤولية
وشغل البيت اللي مايخلص.
وطلبات الزوج اللي ماترحم
وربي يابنات ان زوجي فيه كمية لؤم ماتتخيلونها.
لما يشوفني حايسة مع الأطفال
مثلآ اغير لواحد والثاني يبكي او احمم واحد والثاني يبي ياكل.
وانا بين ذا وذا هنا يجيني بطلباته وانتقاداته لشكلي ولكركبة المكان او يزيدني بالطلبات اللي له ابي اكل وين عشاي وين ملابسي وين ريموت التلفزيون....
ياليت كذا وبس الا معظم الاوقات اسوي له عشا لما يتفرغ يجي اخر الليل وتاركني طول اليوم معاهم.
اذا جا وواحد فيهم يبكي ابدةماياخذه ويجبرني اجهز العشا وانا حاملته وهو بس كذا جالس على الجوال.
هالفترة صايرة دايم احاول فيه واطلب منه يساعدني ويمسك طفله على الاقل لحد ماانتهي من تجهيز الاكل.
لكن ابد ماكأن يسمعني.
حتى مرة من المرات ظهري يألمني وأصلآ خفت عليه من النار لاتصيبه وحطيته بالصالة يلعب مع اخوه وابوهم جالس.
والله يابنات واسمع صياح واجي الا الاخ الاكبر يحاول يغطي وجه اخوه بمنشفة يعني لو ماجيت كان الله العالم شبيصير يمكن يختنق لاسمح الله والاب ولا ملتفت لهم.
كلما اتذكر ابكييييي بيني وبين نفسي
احس اني عايشة بذل
لا احترام ولا تقدير ولا مشاركة بس طلبات وأوامر وتحلطم
تراودني فكرة الانفصال.
كثير كثير.
لكن وضعي مارح يكون ارحم من هالوضع ببيت اهلي.
بالعكس اهلي من النوع اللي يظلم ويقهر ويعيب المطلقة.
لما أفكر وأتخيل حياتي مع زوجي ومع اهلي أشوف ان ذل زوجي ولا ذل أهلي.
لكن ماعدت قادرة اتحمل
اخاف يجي يوم وانتحر
لأن ماعندي بصيص امل انه يتغير
طبعآ ماتكلمت عن باقي العيوب.
الهجران المستمر.. التهديد بالضرب البخل ومعاملة اهله السيئة
وغيره وغيره
ادري بتقولون تقربي من الله سبحانه.
وانا بالفعل مو بعيدة عن ربي..
ادعو بحرقة وابكي على السجادة وافضفض. واشكي..
وارتاح بعد كذا.
لكن لما اقابل زوجي لابد ينكد علي ومع تكرار المواقف تحسين ان الحياة مالها طعم
لا ني قادرة اتطلق ولا ني عارفة اتعايش واغير وضعي.
فيدوني يبنات كيف اتعامل مع زوجي كيف اخليه يشاركني ولو بجزء من المسؤولية
تعبت تعبت تعبت