زوجي وهالصفه اللي منكده علي حياتي وباديه تقلل حجم حبي له

السلام عليكم يابنات
مدري كيف ابدا لكن
زوجي كثير الانتقاد وانا يضايقني بشكل ماحب احد ينتقدني ب ابسط الاشياء
واحد من الامثله امس طلب مني اكتب اغراض البيت الناقصه ونسيت وراح السوبرماركت ارسلت له رحت ولا باقي عشان ارسل له الطلبات قال بدري وقعد ماسكها علي من امس ويكرر ويقول بالك مو معي لو معي مانسيتي
قلت له وليه ما اتصلت انت تذكرني قال ماعندي بطاريه وقام يالف اعذار
وبالمقابل كثير اشياء هو ينساها مايجيبها واكون موصيته ولا عمري قلت له ليش نسيت او سويت سالفه واحيانا مايجيب عمد وعادي اعدي له
ومثال ثاني يوم جينا ننام يقول لي ولدي لو اعجن الكون ما يجي احد مثله فجاه بدون اي مبررات قلت مايحتاج تعجن الكون دامه عندك
واحيانا يشوف ولدي يلعب او يطول بالنومه يقول طالع لك يحب النوم ويقولها ب نبرة انه شي سلبي
ودايم يكرر علي كلمة كسلانه
وانا والله اسوي له اشياء تدل ع انه هو الكسلان
زي مره طلبني منديل رحت جبت له منديل وعطيته اياه وطاحت العلبه قال كل ذا كسل عشان ماتمسكينها شوي!!!! قلت كسل ايش الكسل عندك انا رحت اجيب لك العلبه ولسى يقول لي كسل
يابنات المواقف كثير ويمكن تشوفونها تافهه لكن انا تتكرر علي باليوم مليون مررره وطفشت وطقيت بس حاط حيله ع اي شي اسويه
اليوم فيني حمى وتعبانه وقام قلي قومي سوي لي فنجال كوفي وقمت سويت له وهو طالع قال هيا اكتبي لي الاغراض اللي ناقصه بلا نسيت بلا حركات خرابيط!!! يعني كاني اتعذر وانا كذابه مانسيت
قلت له لا تقول بلا خرابيط انا فعلا نسيت ما تعمدت اني ما ارسل لك امس وانت ماذكرتني وخلص انتهى
قام يهاوش وانتِ بس تدورين مشاكل وانا مو خبل ما انتبه لما تردين علي بكلام لانه اليوم يقول لي مانسيتي انتِ بالك مو معي!!! رديت عليه قلت وبالي مع مين؟ قال مدري وقهرني قام مسكها علي اني ادور المشاكل
هو يبي وحده يحذف عليها اي جمله تسكت وتمشي وانا والله مليت لانه اخذها عاده مايرتاح لين ينتقد انا حتى لو ماسمعته من المره الاولى يقول تطنشيني!!!
والله يابنات مدري الخلل مني ولا منه الحين طلع وقال قهوتك اشربيها وطلع وانا ماقلت شي بس ليش يرمي علي الكلام وينتظرني اسكت وما ارد عليه! واذا رديت صرت ام مشاكل وادور مشاكل ومايقصر يكبرها علي
علموني كيف اتعامل معاه لاني جد طفشت حياته كلها كذا تدقيق وتحذيف كلام
تمنيت اني اعيش علاقه مليانه حب والقى شخص يحبني بعيوبي قبل ميزاتي وللاسف لقيت واحد مركز علي بالمجهر ع اصغر حركه والحب معاه ما احس فيه الا وقت الفراش وبعده ينتهي الحلم وكلن يعود لواقعه
والله مدري وش اقول لكم لاني والله ضايقه فيني لي الحين معاه ٨ سنوات وانا كل سنه اتأمل باللي بعدها انه يتغير
طبعاً هو طيب واخلاق وكريم بس مشكلته الانتقاد الزايد طفشني ومللني منه حتى سوالفنا كلها عن الازواج والمتزوجين ويمدح لي بعض الصفات اللي مو فيني وماتعجبني :( افف
كثرت كلام عليكم تحملوني يمكن الاقي وحده منكم مرت بهالتجربه او عندها شي يساعدني لان صبري نفذ ماعاد عندي طاقه اتحمل اكثر