زوجي وهوسه بالزوجه الثانيه وانا توني ماكملت سنه معه

يسعد مسائكم .....
انا متزوجه لي سنه وحامل بالاشهر الاخيره والنفسيه ززفت
موضوع كدرني حييل من زوجي الي من اخذته وهو بس يتكلم عن البنات والزين وش كثر يسئلني عن بنات العوايل وبنت فلانه وحتى لو انها متزوجه ماعطيته وجه وارد عليه بكلمه مدري يوم عاد مصخها وصار هالموضوع اكثر من سوالفنا قمت اعطيه بالوجه وش تبي ببنات الناس وحرام علي اوصف لك شكلها او اقول انها مزيونه يرد علي بعين وقحه عادي مافيها شي البنت متزوجه يعني بخطبها ؟؟ وذبحني بسيره وحده كان خاطبها بس رفضته ودايم يسئلني عنها لين عطيته بالوجه وقلت له البنت كرشتك ماتبيك تسئل عنها ليه وش تبي فيها ... يقهررررر وشاف الموضوع يقهرني ويستفزني قام يطاول فيه
والحمد لله ماناقصني شي وهو بلسانه يمدح فيني ويمدح باهلي وبالتربيه وانه حب عايلتي والسبب انا ويقولي انتم معروفين بزينكم
صار له فترررره يتميييلح ويقولي انا بطلع جدي بتزوج ثانيه <<<يحب يرفع ضغطي عشان يشوف رده فعلي
بالاول كنت اهاوشه ومرات اطقه ع كتفه او ع بطنه واقوله لاعاد تفتح لي هالموضوع وش زيننا الحين نسولف وخربتها بكلامك هذا
ودايم هذي رده فعلي وهو متسدح ويضحك الي ان جاء بذيك الليله الي كدرها علي وانا قاعده بالغرفه احتريه جاني الرجال مبسووووط حيييييل
ممداه نزل ثوبه الا هو جاء لمي يقولي انا بتزوج ثانيه وجاي اخذ استئذنك ( قرصني قلبي وحسيت الموضوع جد )
قلت شلون بتتزوج ثانيه ؟
مع الكلام قال ان واحد من اخوياه الي بالاستراحه متزوج ثنتين وقالي ليش ماتطق الثانيه ( وهو يقولي الرجال مبسووووووط كانه معرس )
قلت ليش وانا فيني نقص مقصره معك بشي ؟ والا شايفني اثيوبيه عندك
قال لا والله والنعم فيك ادب واخلاق وزين ومتعلمه وكل شي فيك زين بس كذا انا ودي اخذها شهرين ثلاث فتره نفاسك عند اهلك ولا جيتي طلقتها وانتي راعيه البيت وام عيالي وقدرك ع راسي وانتي الامره ..... ومن الكلام المعسووول ماخلا شي
قلت بالله عليك يعني بتلعب صاير نسونجي
قال الشرع حلل اربع وهذا حقي قلت حقك لاصرت مقصره معك والا منكده عليك عيشتك والا ماجيب اطفال
((شكيت بالموضوع انه تحدي بينه هو واخوياه لان قبل فتره قبل لا احمل كد تحدوه اخوياه انه يتزوج ثانيه وحلف انه يتزوج بس لاصار معه مليون قلت ان شاء الله ماتحصل المليون ))
والحين قالها لي بصريح العباره انا خويي مراهني وقبلت الرهان
ااااخ ياقلبي حسيت اني ولاشي عنده والله هو يتكلم والدمعه متحجره بعيوني قلت يعني بعتني عشان الفلوس الله يوفق خويك ويجعلها بينه وبين زوجاته قال استغفري لاتدعين عليه انا الي ابي اتزوج هو ماله دخل
قلت ان سويتها والا فكرت جعل ربي مايوفقك ولا يرزقك وجعلك من خساره لخساره وبيعاتك كلها بخساره
حيييل خاااف من الدعوه يابنت استغفري وش هالدعاوي ( يبيني اقوله حلالك والشرع حللك اربع )

طلعت من الغرفه وسكرت ع نفسي موجووووعه ماني مستوعبه كلامه ابطيت مانمت بذيك الليله فكرت اني اطلع بليلتها لبيت اهلي بس خفت الموضوع يكبر ويصير شي ماحسبت حسابه وهو عطاني ظهره وناااام ولا ندم ولا هزه شي
من طلع الصبح قبل لا اطلع للدوام كتبت له رساله وحطيتها ع التسريحه وطلعت وتركت الدنيا مفتحه اللمبات والابواب
محتوى الرساله ع كلام امس من بين الكلام قلت له ماتوقعت اني رخيصه عندك وان الفلوس اهم مني وانا كنت اتمنى الزوج الي افتخر فيه قدام اهلي والناس
وختمتها بكلمه اذا ناوي صدق رجعني بيت اهلي وانا مراح اسامحك وانا حسيبك يوم القيامه
صحى من النوم ودق علي وانا بالدوام وسفهته ولا رديت وبعدها دق مرتين وبالاخير رديت وكلامي معه جااامد لارحبت ولاصبحت عليه
وش هالرساله وش هالكلام انا تراني امزح صدق ان المره خبله تصدق اي شي
قلت وصدق ان الرجال كلابه وخونه قال عيب عليك هالكلام قلت العيب منك انت وانت الي حديتني ع هالكلام
كان بيصير نقاش كبيرررر بس قطع النقاش وسكر الخط
الرساله شققها وقطها بالزباله ومن ذاك اليوم وانا سااااافهته ورحت عند اهلي وكلما دق اطنشه لين قلبها وزعل علي ... اسبوووع كااامل والهم راكبني بسببه
السالفه هذي صارلها فوق الاسبوعين
قبل يومين خالتي الي هي امه كانت عندي مسيره علي تعشت وراحت لبيتها
يوم جاء المسعد بالليل قلت تراني حرشت عليك خالتي قال بوشو قلت بكل شي قال والابتسامه شاقه حلقه اكيد قلتي لها عن اني بتزوج
ااااخ يقهررر يقهرررر للحين العرس براسه
تعبت منه ومن العرس الي براسه وانا حاسه انه بيسويها لو بالسر بس عشان المراهن
كل مازن وجاب الموضوع غيرت رده فعلي بحسسه انه ولا شي قلت له خلاص طلقني وسو الي تبيه وبنتي بتصير معي وخل الي بتتزوجها تجيب لك الذريه
قبل يومين سئلني وين تبين تولدين قلت بالمستشفى الفلاني ( مستشفى خاص ) قام يضحك ايه عشان تفلسيني وماتزوج ... اسستغفرالله العظيييم بكل موضوع نتكلم فيه لازم يحط طاري الزوجه الثانيه
يبيني استسلم له من كثر مايجيب الطاري ويزن علي اتععععبني
ووووش اسوووي معه اتعبببني بهالموضوووع
كلمت صديقتي قالت لاتطلعين من البيت بس اسفهيه ولاتعطينه وجه خلي رده فعلك قويه
( زوجي نمطه شمالي )
ابي حل من الخبيرات غير كلام صديقتي تكفوووووون