زوجي ووزني

• الموضوع ممكن مايكون جديد بس بالنسبةًلي لازم افرغ شوية

ببدا من نقطة الصفر
انا بنت عمري ٢٠ تزوجت واحد مطلق لانه ماخبرونا انه مطلق الا بعد الشوفة الشرعية وعندنا في العادات السعودية (اماراتية بس من أصل سعودي) ان بعد الشوفة لازم يتم الزواج خصوصا اذا الرجال وافق على البنت ! كنت ادعي ربي انه هذا الزواج مايتم بس النصيب فوق كل شي هذه النقطة الاولى السودا.
ممكن تسألوني ليش مارفضت لسبب رئيسي امي دائما تخبرني ان الحرمة ماترفض الرجال اللي مافي عيب!
حسبي الله على الناس لانه ابوه من مقام رفيع رفعو الولد بالمدح للسماء وأهلي استانسو خصوصا ان ابوي يعرف ابوه بس طبعا للاسف محد يشبه ابوه هذه الأيام
كلمته في فترة الملجة بعد ماستجمعت كل قوتي وقلتله انا ماحب المدخننين والمقصرين في الصلاة وفعلا كل ماكنت اتصله يقول انا في المسجد والنَّاس يقولو مايقطع صلاة والتدخين مادخن من سنتين وترك وتاب . ماعلينا تم العرس ورحنا شهر العسل نزلت لاني جوعانة شفته يدخن وايد تضايقت وصحت وسويت مناحة بس بعدين تحملت وحلفلي وقال بس لانه السفر يجيبله اكتئاب وانه اذا رجع مابيدخل وخليته يحلف على المصحف !! وكان يصلي في الفندق بحكم شُح المساجد في المنطقة قلت ماعليه !! صدمتي الثالثة اننا في بلاد برع ويتركني في الفندق في الليل أرقد وأقوم الفجر ومحد عدالي !!! هني كتمت غيضي وكنت ناوية أرويه الويل لما ارجع البلاد ! وكلمته ان انا أمانة واللي سواه غلط الخ الخ الخ .
رجعت من شهر العسل طلع يصلي صلواته كلهن في البيت ماعدا الجمعة (اللي كل اسبوع ضرابة بس الحمدلله يروحها) والفجر مايصليها الا نادرا يعني والله قهر انا املي اني اتزوج إنسان ملتزم يقوي ديني ونربي عيالنا على الصلاح والعبادة يجيني واحد تعبان!! وطبعا بعدين طلعت كل الخبايا إنسان غير ناضج عصبي جدا !! متكاسل في أمور العبادات (ويلوم ني يقول لو انا مرة سنعة كان غيرته !!) كيف !؟؟؟؟ وانت ماخليتني اتهيا كذبة ورا كذبة !! طبعا انا عندي احساس انه يكلم بنات بس ماحبيت ابدا انه يطيح من عيني اكثر عن جي فماتاكدت !! هو اساسه طيب والله بس دلال عمتي (امه) خربه ! تعاملهم كانه بيبي الله يهديها ويسامحها بلشت بنات الناس
طبعا نجي للحاضر
يباني اتنقب بحجة انه مايقدر يطلع معاي ويشوفونا الناس خصوصا معاه قلتله خلني افكر لاني اذا بتنقب بتنقب لوجه الله !! !! سويت له مفاجاة وحجزتله في مكان راقي بهذلني بهذله ليش ماخذيت شوره رغم اني تنقبت !!؟ وان انا عنيدة واسوي اللي فراسي *^* ومارحنا ١٠٠٠ درهم راحت في ألهوا مايذوق الاكل من أيدي يقول ماله طعم ياخي احنا ماصارلنا شهرين متزوجين بس احس صارلنا سنين!!!
طبعا السنفونية الجديدة يقول انا ابي اتزوج لان جسمج مايعجبني دبة ومتينة !؟ وزني 55 وبس وزني كله تحت حوضي كبير !! قلتله الناس تتمنى جسمي وتسوي عمليات وانت جي ؟ ليش عيل خطبتني كان تزوجت واحد يقدر النعمة اللي هو فيها طبعا سكر الموضوع وغيره وانتهينا
مشكلتي اني اصلا من النوع اللي يكتسب وزن بسرعة ومع هذا محافظة عليه بالغصب ! يعني ولد عمي عنده نفس المشكلة وزنة ٩٠ انا وزني 50 وطولي 154 بعد الزواج حملت وسقطت وزني صار 57ونزلته ٢ كيلو
هو يبا جسمي يقول ضعيف وايد عصقوله وانا بعدين طنشته وقمت اكل اكثر عقب قال لا خلاص اهم شي يكون منحوت ومنشد وروحي جم وخرابيط
قلتله تمام بس مو الحين انتظر اخلص الجامعة عشان يكون عندي وقت لاني أداوم !!
وخبرته انت تعرف شو اشتغل وادرس وإني بكون مشغولة وماغصبتك تتزوجني يا تصبر وتشوف شي حلو باْذن الله يانقلب حياتنا جحيم !
طبعا هو الحين مايرقد معاي وانا مايهمني لاني تعبت وايد بعد الإجهاض وابي ارتاح نفسيا!!
وجودة دائما يكهرب الجو بس هو طيب وها الشي اللي مخليني معاه بس الطامة الكبرى اكتشفت انه يأكل شمة تبغ ماعرف شو يسموها وانا خلاص قرفت منه!!
طلاق لا ماافكر فيه بس خاطري اسوي نفس بنات الناس وأروح بيت اهلي فترةيحس لأننا ماتقدر نتزاعل على طول نسولف بس بيت اهلي ضيق مرة وماردي أضيق عليهم اكثر خصوصا انهم يكون بضروف صعبة هذه الفترة
طبعا انا حاطة في بالي إيجابياته وممكن اعتبرهم اكثر عن سلبياته بس هذه النقاط السوداء في بداية زواجنا مسببة جرح عميق مب طايع يبرأ خصوصا انه ماغير شي من نفسه !
نجي المهم الحين شو اسوي رياضة وااااايد اتعب فيها وانا اصلا ماعندي سيارة وهو كل يوم يتحرطم على المواصلات يوديني الدوام ويرجعني اما الجامعة اروحها مع باص وأمري لله رغم اني وايد اتعب
اخاف اطنش ويسويها صدق ويتزوج مو عشان أغار بس مابي بنت ثانية تبتلش لاني متاكدة مب اي وحدة بتصبر كثر ماصبرت ! والخوف الثاني انه مايعدل لانه تعبان وشخصيته مول مب شي مافيه هيبة الرجال العرب على قولة ابوي طلع صعلوك 😂 بنات لاتسيؤو فهمي والله ولا كلمة طلعت لاهلي ابدا مانقل الكلام بس ابوي لاحظ انه فترة الملجة غير عن بعد العرس !مايجي جلسات الرجال والجمعات العائلية ويخليني أغطي مكانه في جمعات أهله ياخي احسني تزوجت طفل وأحن عليه !!ان الحب ابتلاء !!