زوجي و الخادمة...ضروري ابغى حل الاااان

السلام عليكم
يا أخوات أنا الآن اكتب لكم و انا برة غرفة نومي متضاربة مع زوجي
وزوجي نايم جوة
المهم
انا قبل 3 شهور ولدت بنتي و عندي ولد لسة سنة و نصف يعني محتاجة خادمة
المهم انا جوني من يوم اتزوجت خادمات كتير بعضهم خرج بسبب و بعضهم من غير سبب
طبعا كلهم من هنا يعني مش فيزا
المهم
انا دايما اجيب اندونسيات
بس دي المرة جاتني حبشية عمرها 25
المهم ما اعرف ليش حسيت زوجي يعاملها غير عن بقية الخادمات اللي جو
رغم اني عمري 23 و طبعا ما في مقارنة في الشكل
لكن تبغوا الصراحة هية صوتها مرة ناعم
رح اقولكم ايش التغيرات اللي حسيتها في زوجي
مثلا في الأكل
دايما لما نجيب اكل من برة و نيجي نغرف للخادمة كان بخيل نوعا ما
يعني مثلا يغرف او انا اغرف لها في صحن يقوم يقوللي خلاص يكفي او لا خلاص قللي الرز او رجعي فخذة الدجاج
و بعد كدة انا اعطيها الصحن..لكن الان احسه كريم بشكل غريب يعني تخيلوا مرة غرف لها ثلاثة ارباع الرز و ترك لنا الربع..
و دايما كان يخلي الشغالة تشيل الاكياس و الشنطة حقة الاطفال لما نخرج من السيارة او نروح مكان...الان بس يخفف عنها..بطريقة غريبة...يعني في شنطة كبيرة بدال ما يعطيها هية في السيارة تحطها في عبها يقوم يقوللي حطيها عند رجولك هادا و انا ولدي في عبي ينطنط...ليش يستحي منها...ليش ما يقدر يقولها خللي الشنطة عندك..
قبل كدة كان يقول و لا يحسب حساب..
و مرة من المرات كنت قاعدة معاها في الصالون قاعدة افهمها شغل البيت..الا هوة دخل الغرفة و مايدري انها هنا
حسيته طالع فيها و اتلخبط..حسيت ملامحه اتغيرت..عارفين زي اللي حاسس انها تفتنه..ما ادري
و مرة رحنا الملاهي
و قلتله انا ابغى اروق معاك و البزورة يكونوا بعيد عننا..تخيلوا وقت العشا قعدت هية في الطاولة اللي جنبنا و بدات تتعشى
الا ولدي الصغير قام يجري..الا اتفاجأ بزوجي يقوم يجري وراه و تركني عالطاولة مع العشا...بدال ما يقولها اجري مع الولد..تركني و سابها تاخد راحتها هية و تتعشى براحتها..مع العلم انه تصرفه ماكان كدة مع بقية الخادمات..
و قعدت وقت تاكل..و هوة يجري ورى الولد.. انا طرطعت وانقلبت الخرجة لمضاربة..المهم قلنا نرجع البيت
الا و نحن نازلين في الملاهي في الاسونسير( المصعد) ياخد منها الولد..ليييييييييييييش
قهرني
و الله مو عادته
بعدها بكم اسبوع رحنا قعدنا عالبحر و ولدي الا يبغى يدخل رجوله في البحر و يمشي عالشاطيء
قلتلها روحي امشي معاه
راحت تمشي معاه عالشاطيء و تنتبه له
لاحظت زوجي كذا مرة يتلفت لهالا تقولولي بيطالع في ولدي لا
لانه ولدي قدامها امكن ب3 امتار و هية وراه يعني واضح انه بيطالع فيها

المهم
اللي حصل اليوم
و نحن عالسرير قاعد يقوللي لازم الواحد يصبر لما احد يموت له و الموت حق و و و
و يقوللي يعني ممكن الواحد يموت ابوه امه او ابوه او اولاده او زوجه
الا قلتله او زوجته
الا قاللي زوجته او شغالته
انا ولعت
قلتله ايش دخل الشغالة؟؟؟
الا غير الموضوع
قلتله الشغالة تموت ولا تنحرق ايش دخلنا فيها
الا قاللي دحين ايش جا في بالك
ايش اللي ضايقك
قلتله لا بس قاعد تقول يموت الام الاب الاولاد الزوج الزوجة ...ايش دخل الشغالة؟؟؟؟؟؟؟؟؟ظالا قاللي بعصبية و بدا يرفع صوته
انتي ايش جا في بالك
يعني ايش مثلا حبيتها؟؟
يعني اتعلقت فيها؟؟
انا من اول ملاحظ حركاتك و كلامك
قولي ايش انتي في راسك؟؟
المهم قلتله كل شي كتبته لكم فوووووووق
طبعا جاب اعذار بايخة انه ليش بيخفف عنها و انه ليش ما قاللها اجري و را الولد و انه ليش ما اعطاها الشنطة في السيارة بس ما قلتله على سالفة البحر انه يتلفت لها..
المهم قاللي انتي مدري كيف تفكري
انتي و افكارك المعفنة
قلتله تصرفاتك و حركاتك المعفنة
و صرنا نطول لسان على بعض و لأول مرة من بعد 6 سنوات زواج
و قلتله انت حركاتاك هبلة و مالها داعي و هوة يرد ... وهكذا
و قاللي دحين لو عاملت الشغالة كويس رح تقولي بيهتم فيها و لا عاملتها بطال رح تقولي عشان يوريني اني مو مهتم فيها
انتي عندك سوء ظن رهيب و و و
المهم و قفل اللمبة وسكتنا
انا مااتحملت
قمت من السرير قلتله نام مع نفسك
و خرجت من الغرفة
و الان انا قاعدة اكتب لكم مشكلتي
اتمنى تقولولي ايش اعمل
انا انتظركم الان
الشغالة غير متزوجة و ماتزوجت قبل كدة فيها نوعا ما براءة
و مرة طيبة مع اطفالي
و شغلها كويس نوعا ما و مهما خاصمها او اعصب عليها تقوللي طيب مدام
و تزبط شغلها
مني عارفة اخرجها و لا ايييييييييييييييييييييش
المصيبة اني في امس الحاجة لها
اولادي صغار و ورا بعض جبتهم و عندي بنتي تروح تمهيدي
انا قلت من بكرة اخللي اخوها يجي ياخدها و اعطيها راتبها و خلاص
و شوية اقوول امكن شكاكة
بس مجرد اتذكر بعض المواقف اقول مستحيييييييييل ظني غلط
و شوية اقول لا اخرجها احسن
بعدين اتذكر شغل البيت مع اطفالي الصغار اقول لا ما اقدر
و الله محتااااااااااااااااااااااارة
و فرضا خرجتها
ايش تتوقعوا موقف زوجي
هوة ما رح يعارضني لو فكرت اخرجها
لكن اخاف يجي في باله و يقول مجنونة خرجت الخدامة بسبب ظنها
او غارت من الشغالة
او ما اعرف ايش رح يجي في باله
و اخاف لو جبت شغالة بعدها يصير عنده حساسية من الشغالات
ارجووووووووووووووووووووووكم حطوا موقفكم مكاني و قولولي ايش اسوي بليييييييييز
انا قاعدة الان الان انتظركم ابغاكم تردوا الااااااااااااان
مع العلم اانه زوجي عمره 30 و مطوع
و لانه مطوع هوة اللي يخليني اقول امكن انا غلطانة
و احيانا اقول امكن هوة ما طالع فيها بقصد لكن امكن انفتن فيها رغم اني حلوة و جسمي مانيكان و مشدود رغم انه عندي 3 اطفال و شياكة و اسوي له كل شي
و الله ياناس محتارة ومشتتة مني عارفة
انتظركم على احر من الجمر