زوجي و الصرف

السلام عليكم حوآئيات
قلبي مليان حكي أحس بنفجر و جايه هنا اسمع آراءكم
السالفة يا بنات ان زوجي من تزوجني و هو ماسك يده في الصرف علي
يكون رايق و مبسوط و اول ما اقول له ابي الغرض الفلاني يكفهر وجهه و يجلس يسأل ليه؟ وش تبغين فيه ؟ موب لازم؟ روحي دوري ارخص منه ؟
و يجلس يحقق بعدين يقول مضغوط الشهر هذا الشهر الجاي
و الشهر الجاي يسحب علي و هكذا
في الاخير طلبت منه مصروف شهري مابين ٨٠٠-١٠٠٠ قام عطاني ٥٠٠ قال اذا احتجتي زدتك ، و طبعاً ما شفت زياده الا من متى لمتى
و الخمس ميه هذي تروح لاشياء الجامعة علماً اني ما ينزل لي مكافأه
متخيلين مطبخي ناقصه اشياء كثير من تزوجنا ماجابها لي، ماعندي حافظات ، ماعندي ترامس ما عندي طقم فضيات مرتب ، الفضيات الي عندي من الرخيص و مرقعه نقشه الملاعق غير الشوك و السكاكين حقت الفواكه😊
و البيت برضو ناقصه اشياء
ملابسي ما اشتري الا بالاعياد و بألف حساب و تهزيء
و يبغاني اشتري من ابو ١٠ يقولي ان خالتي و خواته يشترون منه <<طبعاً خواته ما شاء الله ما بقوا مول ما اشتروا منه و يوم قلت له انكر 😊
متخيلين ان ملابس الشتاء ما اشتريت زي الناس ، الشهر الي فات لعب علي قال اشتري نص و الشهر الجاي نص
اشتريت ٣ بلايز على اساس الشهر هذا جاكيتات
و جحدني قال صار عنده متطلب مادي يخص عائلته عشان بيسددون دين لأحد منهم و راح يستقطع من راتبه مبلغ محترم لعده اشهر قادمه
يعني صار يصفى من راتبه بعد الديون ٤٠٠٠ بدون فواتير و اشياء متخيلين !
المشكلة مو هنا
المشكلة انه كريم على كل الناس الي حواليه
على خوياه و على أهله ، لو يطلبون اشياء غاليه عطاهم ، ماعندي اعتراض على دلاله لهم الله يهنيهم
بس ابي اعرف ليش البخل علي انا !
قلت له ليش كذا الريال الي تصرفه علي يعورك بقلبك و ما تنساه و تقصر علي
قال ما قصرت عليك بشيء هذاك آكله شاربه و في بيتك و لابسه !!!
شايفين كيف نظرته للموضوع هذا تنرفز!!
طبعاً هذا فيض من غيض
اذا بتقولون اطلبي، انا ما أقصر اطلب بحدود المعقول
و مع هذا بس ينافخ علي ، اذا اشتريت اشيائي دفعه وحده اتهزأت و اذا قسمتها على اشهر انجحدت مع تهزيء يقولي ليش انتي كذا كل شهر طلبا
وش اسوي فيه بالله
المشكله اني كنت عند اهلي كل الي ابيه يجيني
و الحين والله العظيم احس باحساس اني فقيره
بالرغم من ان زوجي وظيفته كويسه
بس ما يصرف علي ، واذا صرف جلس سنه يذكرني ذاك اليوم اشتريت لك
ذاك اليوم صار
عنده اني اذا اشترى لي مره خلاص لازم احمد ربي و انثبر!
و للمعلومية زوجي شمالي شرقي
و الي ما تؤمن بالبوصلة الشخصية تترك رأيها لنفسها
أترك لكم المجال يا بنات و بدون تجريح لو سمحتوا