زوجي ياخذ ارقام من جوالي ويتصل يشوف بنت ولا رجال

كيفكم بنات
انا متضايقة وابغى رايكم
امس زوجي اخذ جوالي يشوفه اول شئ دخل الواتس وشاف الللسته وشاف وحدة من البنات اسمها ام عمر حاطه الصورة حقها رجال متصور في سيارة وسالني وهو معصب مين هذا
قلتله هذه وحدة من البنات اسمها ام عمر زي ماتشوف وحاطه الصورة هذه مدري هذا زوجها او اخوها اومين سكت شوي وجاب جواله وقلي اعطيني الرقم قلتله ليش
قال بتصل. قلتله لا قال ليش ماتبغيني اتصل قلتله لاتفشلني قال بتصل من جوالي بشوف بنت ولا رجال
وانا مصدومة واعطيته الرقم واتصل وردت عليه البنت وقلها هذا جوال محمد قالت لا
وقفل
وهو ماسوى شئ
يمكن قلبه برد لكن انا قلبي يغلي ودمعتي بتنزل
بعدين قلتله انت ليش تسوي كذا؟
قال بس كذا.. قلتله لعد تمسك جوالي .. قال الا بمسكه
قلتله طيب لوبتمسكه عادي بدون تفتيش خذه.. ولوبتمسكه تفتش لا
وقلتله انت مريض نفسي ولوعندك عقد لاتطلعها عليا.. طلعها في المستشفى
قال ايشش؟؟ قلتله انقلع عني بسس وقفلت الباب بقوووة وطلعت من الغرفة
يابنات هذه مو اول مره يسويها.. وقلتله اقسم بالله العظيم لوتعيد الحركة هذه مره ثانية لاروح بيت ابوي ومعد ارجعلك لوتموت عندي
لانه قد صارت مشكله شك زي كذا وقعدت بيت اهلي اسبوع وجاء عند ابوي ندمان مره وحتى ابوي قلي الرجال شاريك وارجعي
قولولي ايش الحل
هو امس قلي موضوعنا عاده ما انتهى وانا طنشته
ويمكن اليوم يفتح الموضوع معايا
ايش اقول؟
في بالي اقوله انت ماتهمني وانت كسرت نفسي بحركتك هذه وما ابغى اشوف وجهك في البيت وانقلع برا
بس خلاص والله تفشلت من ابوي صار غسيلنا منشور عنده
انا محتارة وفي نفس الوقت مقهورة على نفسي
عندي بنت عمرها سنة و10شهور
الحكيمات يردون