زوجي يبغى يرسلني بيت اهلي .. وأنا أبغى اجلس عنده

السلام عليكم

ماحب اكتب مقدمات كثير لاني ماعرفلها .. بس اتمنى منكم حل بالموضوع هذا

==========

زوجي يشتغل مهندس بمصنع من مصانع سابك .. دوامه من 7 الصباح الى 4 العصر ( يعني 8 ساعات دوام )

بعد اسبوعين بتكون عندهم بالمصنع حاجه مادري ايش يسمونها بالضبط .. بس على حسب كلامه فتره يطفون فيها المصنع ويشتغلون صيانه عليه من البداية الى النهاية

طبعا الشركة بالوقت هذا ماتسمح لاي موظف ياخذ اجازة او استئذان او أي شي .. ويصير الموظفين يدوامون شفتات 12 ساعة باليوم كحد ادنى بدال 8 ساعات ... وحتى ايام الويك اند يداومون .. طبعا الفتره تستمر 50 يوم متواصلة تقريبا

وهذه فترة مؤقته الين يرجعون يشغلون المصنع .. ويرجعون لدواماتهم العاديه


الشي هذا بيصير ان شاء الله بعد اسبوعين .. وزوجي قالي بوديكي بيت اهلك لاني ماراح اكون فاضي تماما

دوامه بيصير من 7 المغرب الى حد 7 او 8 او 9 او 10 الصباح .. ( حسب المشاكل اللي تواجههم )

فيقول دوامي طويل ومابتشوفيني .. ولو جيت باكل لي لقمة وانام .. واصحى وارجع المصنع يعني مابتشوفيني ابد

فيقول الافضل انك تروحي لاهلك عند اخوانك يلبون لك طلباتك وتقعدي معاهم احسن من انك تجلسي هنا لحالك

هو مصر اني اروح لبيت اهلي .. وانا ابغى اجلس عنده ... عادي حتى لو ماشوفه الا نص ساعه باليوم

اقل شي ابغاه يحس انه زوجته واقفه معاه بالايام هذه اللي يكرفون فيها .. مو معقوله انه يجي تعبان وهلكان وياخذ له لقمة اي كلام وينام على فراش محيوس .. مادري ماحسها حلوه .. وكمان 50 يوم احسها فتره طويله

لكن مشكلته مصر اني اروح .. يقول ماودي تجلسين لحالك

كيف اقنعه اني اقدر اجلس واتحمل الخمسين يوم هذه ؟!!!

اللي زوجها يشتغل بسابك ياليت تخبرنا ايش تسوون مع ازواجكم بالفتره هذه