زوجي يبي يطلقني وانا توني عروس دعواتكم لي / استوفى الردود

السلام عليكم ورحمه الله وبركاته
حبيت افضفض لكم الليله قلبي مقهور وقاعده اتالم بس اكابر
الحمدلله على كل حال يارب اجعلها خيره
مدري منين ابدا بس حاسه اني بمصبيه
اللهم اجرني بمصيبتي واخلف لي خير منها
قلت اعرض موضوعي لعل القى نصيحه من عندكم خواتي او دعوه او مسانده او تخفيف علي لان خواتي لازم ابين لهم قويه الي فيهم كافيهم وامي اه الله يصبرها ويعافيها ويطول عمرها على طاعته
الي صار اني تزوجت من ثلاث شهور ولي شهر عند اهلي زوجي خلاني عندهم وقال بطلقج
التفاصيل جدا مولمه بحاول اختصرها عمري 34 تزوجت زواج تقليدي امدحوه لي كان مطلق وماعرفنا سبب طلاقه بس زوجته طلبت الطلاق وهي حامل ظل سنه كامله يحاول استرجاعاها ويراضيها بس ارفضت رفض قاطع وسمعت انها خلعته لما سالته قالي بدون سبب بس انها توحمت لانها كانت حامل وقت مازعلت وراحت لاهلها وطلبت الطلاق مادخل بمخي انها تطلب الطلاق على سبه وحام ينتهي بوقت محدد ولكن ماهتميت دام الرجال زين والناس تمدحه وظروفه زينه وانا موصغيره اوافق وافقت وتزوجت من الليله الاولى حسيت زوجي طيب وزين ولكنه مافز فيني يعني حسيت وهو ماصرح اني مو الي بباله مع اني الحمدلله جميله وهو مقبول شكله بس الشكل بالنسبه لي مو مهم بشهر العسل غلط وناداني باسم طليقته وتضايقت واكتشفت انه لسه يعزها ويحبها وللحين مستغرب ليه اطلبت الطلاق منه على رغم مرور 4 سنوات على انفصالهم الا انه مانساها ويدعي لها بكل خير ولا احسه حاقد عليها على رغم الي سوته فيني وانها كانت تمنعه عن ولده ومن مشاكل الطلاق الي انتم عارفينها
بصراحه تضايقت لما صرح لي بكذا لان زوجته الاولى ماكانت تطبخ ولا تسوي حتى بياله الشاهي وانا كنت اطبخ له واسوي له مع هذا ما رفع اسهمه عندي
زوجي مايبي يتحمل مسئوليه الله يهديه ومن النوع الي يشيل بقلبه يعني اطلب شي ويكون مو راضي عنه ولكن مايصرح في البدايه طلبت منه يطلع صوري ورفض وصارت مشكله على الصور وسكتت طلبت شغاله ورفض لاني انا موظفه ودوامي متعب وهو ماعليه قاصر راتبه زين ماطل وبعدين قال بيني وبينك قلت اوكي بتقولون طلباتك كثيره بقول لكم ليه زوجي حسيت انه من النوع البخيل او الماسك ويتمنن يعني شريت هدايا لاهلي بشهر العسل قعد يتمنن فيها زوجي بالملكه ماهدي لي ولا شي ولا جاب لي شبكه والمهر بالنسبه لعائلتنا يعتبر قليل ولكن اهلي من النوع الي مايتشرط على النسيب ومستعدين يدفعون فوق المهر مهر بس تكون بنتهم سعيده الله يخليهم عقب جت امه وقالت ماراح نعمل زواج سكتت امي ةقالت ماعليه انا اتكفل بالزواج وسوينا الزواج وتكفلنا فيه من الى ودفعت انا وامي واختي واخواني عارفين انتم مصاريف الزواج والغلاء غير تجهيز العروس يعني جد اهلي تعبوا بزواجي الله يخليهم لي وهم واهله حضروا ضيوف شرف وفوق هذا يوم زرتهم كانوا يعلقوا ويضحكوت يعني شايفين انفسهم بعد الله يعين بس
من شهر العسل حسسني زوجي انه كاني ماشفت خير وقعد يقول سفرتك صح انتي مو متخيله انك تكوني بهالمكان صح شوفي وري الصور اهلك حسسني انه ماخذني من الصحراء فيهم شوفه نفس على ايش مادري سكتت
اكيد انا كنت مقصره ببعض الامور زي طالبته بمصروف وهالشي ماعجبه طالبته انا نعتمر ونسافر بعدين وماعجبه طالبته بشغاله
المهم زوجي راعي صلاه ودين يصلي بالمسجد صحيح يدخن شيشيه بس اخلاقه ودينه ماعليه
ايه فيه شغله ثانيه طلبت منه يحدد لي يوم نطلع ونقضيه سوى لانه يوميا مع ربعه يوميا يابنات ربعه كثير اصدقاء مزرعه واصدقاء نادي واصدقاء استراحه قلت مو معقوله تكون بعيد عندي يوميا خصص لنا يوم واحد وباقي الايام مع ربعك
شال بقلبه من هالسالفه
عقب خلاني عند اهلي وادق عليه ولا يرد ورد علي قال انا مو مرتاح ولا بيننا قبول واخذ رقم اخوي وقال واعدني بالمحكمه اطلق
بنات مابي الطلاق وهو مصمم كلمني قال اخذي اغراضك قلت قبل نطوي هالصفحه ابي افهم
بنات انا مو ملاك وفيني عيوب ادري بس مو درجه يسوي كذا لو تشوفون حرصه على الطلاق كاني ذابحه ولده ولا محاوله اسممه ولا مدخله رجال اعوذ بالله البيت
ادري غلطت وقلت له خلنا نفتح صفحه جديده المشكله الاسباب جدا واهيه يابنات انيت يوميا عند اهلك طيب انت الي تنزلني عندهم تروح عند اصدقاءك وتنزني عندهم انتي تبين مصروف خلاص قولي لا وانا اسكت انتي تبين تتحكمين فيني اي تحكم ياحسره وش مسويه
انا اخديه هدايا واسوي له حركات رومانسيه وورد وكروت اكتب عليها كلام وارسل له مسجات والبس له واكشخ له واغير بغرفه النوم اخر شي يقول ادري تسوين هالحكرات تبين تسيطرين علي وتدوسين على راسي
ان تركته قال ماتحبيني وان ركضت له قال تلعبين علي وش اسوي
مانكر ان له مواقف حلوة معاي وحركات حبيته يابنات اول رجل بحياتي وانا ماني صغيره ماني بحال اجرب مره ومرتين ابي استقر
ماعبرني وقال ماحبك ولا احب اناظر بوجهك وكالام بعور القلب حسسني اني بدون كرامه بنات انا عندي اهلي وعندي وظيفتي وسايقي وسيارتي هذا كله من فضل ربي بس ابي زوج واولاد ابي طفل يناديني ماما
بكيت عنده وشوي اترجاه قال خلصيني اخ1ي اغراضك رحت ثاني يوم اخذتها لقيته ماخذ اغراضه كلها
يابنات تغير بيوم وليله قبلها بليله يضحك معاي ويسولف ثاني يوم معصب ويقولو بطلقك
على فكره على رغم الفتره الصغيره الي معاه هذي ثاني مره ينوي يطلقني المره الالوى تصالحنا هالمره لا كبرها حيل وصارت جد
انا اقول الاسباب الي قالها تافهه بس هو كارهني وعايفني ويدور علي الزله الله يسامحه
ماانسى وجه امي وهي تشوفني راجعه باغراضي
حسيت اني ميته وحاضره عزاي يبكون علي وانا اناظرهم احاول اتماسك ولكن نار بقلبي
كلمته من ايام قلت لعل وعسلا مع انه اخذ اغارضه واثاثه وفضى الشقه
رد علي استغربت قالي تعالي الحين المحكمه نعجل باجراءات الطلاق الرجال مره متحمس
عطيته رقم اخوي الثاني يكلمه وتفاهم معاه اخوي كان بيروح له ينهي الموضوع بس قلت اجل شوي خلني استخير بعد
اهلي يقول تقبلي انه بيطلقك خلاص واصلا لو يرجعك ماراح نرضى لان رجل باعك بهالطريقه مانأمه عليك
انا مابي الطلاق ابيه وابي حياتي القديمه ولا كان ودي الناس تدري بلي صار طول عمري اتحاشى كلام الحريم ولا احب اخوض باخذ واكره مجالس الحريم وحشهم
اهله يابنات ماتدخلوا مع انهم ماتوا على زوجته الاولى وحاولوا كل الطرق يردونها بس هي رفضت
اتصلت على امه تهربت مني اختي كلمت اخته تهربت منها اخوي كلم اخوي ماعاد رد عليه وتنكر وقال انا مدري
وفيه تفاصيل ثانيه بس مافيني حيل اذكرها
انا ماكتبت هالموضوع عشان اذكر عيوب زوجي هو انسان حاله حالي بس ذكرت لكم لعل وحده منكم تعطيني حل
بنات نسيت زوجي من شهر من زواجي اخذني للطبيبه عشان يعطيني حبوب منع حمل وقال لو تاخذين ابره الي تمنع الحمل لمده سنه احسن بعد بس انا رفضت
دعواتكم لي بنات احبكم بالله