زوجي يخونني على الورق ..حسبي الله عليها

السلام عليكم أخواتي


أختكم ادراك تحكي لك كيف رمي الزوج بالخيانه مو شي هين بل وتحاسبين عليه
والتهور يمكن يخليك العمر كله متحسره ان لم يكن خساره كبيره ارتكبتيها بحق نفسك وحق زوجك...


أنا أحكي لكم حكايتي
أنا مو صغيره بالعمر يعني في الثلاثينات عشرتي مع زوجي عشره طويله ماظنتي أحد يفوق زوجي حبا لي

كان يتلذذ يستمع لسواليفي ويهناء يجلس معي ومايطيق يجلس في مكان وأنا مو معاه يقول خلي كل اللي في ايديك واقعدي معاي واذا رحت سوي اللي تبين

يموت في السفر معاي بس ينتظر أوافق ولا لاء

وفي يوم حان وقت ولادتي وكان واقف على راسي يقرا علي الورد وبعض السور ويمسح على جبيني كل ما تعرقت ..

الا ان الجنين ذكروا لي انه تعبان ولازم يكون في الحضانه وكانت الدكتوره واقفه معاي وقالت لي وشرايك نسوي فحوصات شامله لدمك انا وافقت وفي الواقع كان المستشفى في قريه وتقريبا مو بذاك الجوده...

المهم رحت لبيتي بعد كم يوم وماسألت عن نتيجة التحاليل وجلست يمكن فوق الثلاثه شهور ..

كنت رايحه أكشف على البيبي في المستوصف و تذكرت التحاليل ومن باب الفراغه والله فيني مريت على الدكتوره

وبعد ماقلبت الملف قالت لي عندك هيربس والمعروف ان الهيربس مرض جنسي ينتج عن الزنا وماصدقت أنا ودموعي كلها تنزل حاره من المفاجأه والدكتوره فيها دلاخة الدنيا كلها وتدعي المعرفه وصارت تشرح لي وتؤكد ان زوجي السبب وعرضت على علاجات كانت محتفظه فيها في درج المكتب حقها .... وصارت تقول لي العواقب لهالمرض والعدوى اللي ممكن انقلها لعيالي والدنيا كلها اسودت في عيني ...


رجعت البيت كارهه نفسي وزوجي وخايفه ألمس عيالي ....


دخل زوجي كالعاده وهو مجرد ماشاف وجهي عرف اني ماني طبيعيه وسألني قلت ولا شي وكنت معتبره نفسي حكيمه قلت استنى لما أخف شوي من عظم المفاجأه وبعدين أطلب منه يعترف بخيانته ولا سويت ولا نقطه لصالحه ولاشفع عندي حبه لي وملازمته لي طول عشرتنا.


جلست يوم ويومين وأنا أكره الكاس اللي يشرب منه وأبعد الأدوات اللي هو يستعملها عن عيالي من خوفي عليهم ...



والرجال حاسس لكن هو من النوع الثقيل والراكد وماسألني عن التغيير اللي فيني الا بعد اسبوع ..



وقتها أنا انفجرت في وجهه وصرت أصارخ ليه؟؟؟ ليه ؟؟؟ ليه ؟؟؟ حرام عليك ياخاين يأاناني ..طيب تزوج بالحلال أنظف من تجيب لنا المرض ...


الرجال تغير لونه وسحبني على طوووووول من ايدي وعلى الدكتوره على طوووول وطلب استفسار عاجل منها وتوضيح وهي مازالت مصره على كلامها بل ونظراتها له كأنها تقول له ( ماتختشيش على دمك جاي بنفسك )....



أخذ التحاليل اللي عندها ونزلني سيده على العاصمه وسوا تحاليل له ولي أنا وجلسنا مع الدكتور كثير وشرح لنا أسباب المرض وأعراضه وقال انه التحاليل ماتين الا بعد 3 اسابيع وطلب يشوف التحاليل اللي معانا القديمه .. هو شكك فيها لأنه فيها غلط في اسم الفيروس والنسبه كانت مختلفه من ورقه للثانيه وحاول يطمنا وأعطاني موعد ..


كل هذا وزوجي ماصار يطيقني وينام لوحده وشك برضو في نفسه صار يرفع الكاسه اللي يستعملها للشرب ويحتاط عشان العيال وماهو طايق نفسه ويحيسب على الدكتوره ويولمني على تسرعي في الحكم...


جاء الموعد ورحنا سويا وكان هو أحرص مني ودخلنا على الدكتور وبكل هدوء مد الاوراق لنا وقال


للأسف تحاليل مثل هذي مهمه ماتنعمل في مسوصفات صغيره ودمكم أنظف منه مافيه وخالي من الفيروس ...

دخل زوجي الاوراق في شنطتي وقال لي :

مالكم أمان تنقلبين بهالسرعه علي صدق انك كفارة عشير ...
كان ألطف لو أنك انتقدت الدكتوره بدل من الاتهام بسرعه لي أنا وانت تعرفين من أنا ....
استحيت على وجهي ..لكن الشيطان لعب في عقلي مره ثانيه ورحت سويت تحاليل في معمل ذو خبره واسعه وكبير وطلعت النتيجه سليمه أيضا ....



كانت فترة صعبه بالنسبه لي وتأنيب الضمير لي يعذبني لأن جرحت انسان مهما حبيته ماراح أصل لدرجة حبه لي ...وفي نفس الوقت حاقده على الدكتوره وطريقة اسلوبها في عرض الموضوع والتي أشعرتني كأني أبموت بكره...


ياحبيبي يأبونا ســــــــــــــــــامحني