زوجي يخونني مع اعز صديقاااتي(قصه واقعيه)

هذي قصه أثرت فيني حيييل قراتها واحببت ان تقرؤها معي وندعي لصاحبة الموضوع بالعون...

مشكلتي .... او قصتي اللي بقولها هنا تصلح لروايات الف ليله وليله...

او حتى لمسلسل مكسيكي






تزوجته بعد ماشفنا بعض نظره شرعيه

ماانسى نظراته وابتساماته بذيك الليله ..... حسسني اني ملاك

وحسيت انه ملك كل احلامي ....


كلمنا بعض قبل الملكه وكنا متفاهمين بشكل عجيب

زعلنا مره خفيف وكنا نعتذر لبعض حتى لو الطرف الثاني غلطان

بس لان حبنا كان فوق كل شي ... واثنينا ندري ان حياتنا بدون الثاني مستحيله

كل شي صار مثل ماابغى .... او خلنا نقول مثل مانبغى ....

مرت الايام بسسسرعه وتزوجنا وحنا طايرين من الفرح

العرس والكوشه والورد والاغاني كلهم كانو يزفونا

كانت نظراته فيهم حنان كبيييييييييير ونظراتي فيهم وله وشوق

سافرنا احلى سفره وللحين الذكريات تمر براسي ...

البحر والثلج والخيل والعشب..... حسبت اني بالجنه ... واني اسعد انسانه بالوجود




زوجي يشتغل بمنطقه ثانيه بعيده عني 10 ساعات .... اتفقنا اني انقل معه ... طبعا كنت مقدر افارقه وهو

مايقدر يبتعد عني ..... بدينا باجراءات النقل بعد مارجعت من شهر العسل على طوووووول

في هالفتره كنت عايشه ببيت اهله يعني ماعندي سكن مستقل... واذا جا نجلس ببيت اهله بجناحه

الخاص وكل شي اوكي .... ماكنت ابغى اكلف عليه ببيت او شقه لاني كنت بنقل معه ....

حملت بسرعه .... ماكنت ابغى احمل من البدايه بس ربي اشاء ذلك .... طار زوجي من الفرح يبغى بطبوطه

صغيره...وانا فرحت لفرح زوجي ....

كنت احس بغربه وفراغ اذا جا زوجي كم يوم وبعدها يبغى يرجع لشغله ... والله احيانا اصيح بنص الليل

اجلس مفزوعه احس اني ابغاه ....

بس دايم ابين له اني بخير واني مشتاقه ومتحمله ....

وربي يفرجها قريب

رفضو معاملتي بالنقل لزوجي بعد طول انتظار وتحطمت

فبعد التشاور قرر زوجي انه يحاول ينقل بالواسطات واني بهافتره احتاج لعنايه ولاهلي فنأجل موضوع نقلي ونشتغل على نقله .....


قلت طيب اوك مع اني ابغى نصير سوا بأقرب فرصه بس بنستنى....

مرت الايام وحبنا لبعض يزيد ماينقص .... والله كان مايبخل علي بشي ابد وانا مااقصر عنه ابدا ابدا

لا جا اتكشخ وادلعه ولا كاني تعبانه والله العالم اني تعبانه حددددي علشان شغلي طووووويل ....

بس دايم احسسه انه الكنج واني علشانه راضيه بكل شي ....

كنت بس افضفض لصديقتي الحميمه بأني افتقد زوجي واني ابغاه معاي وان حنا نحب بعض بس ماادخل بالتفاصيل لاني مااحب اطلع لاحد تفاصيل حياتنا ....بس احيانا ابغى افضفض لا تضايقت ....

صديقتي هذي معاي من كنت بابتدائي يعني اثق فيها ثقه عمياااااااااء واحبها وهي برضه تحبني مررررره

بس مو متزوجه ودايم تتكلم بأنها تبغى تتزوج واني ادور لها على احد من اهلي ....

بذاك اليوم كنت متضايقه مررررره ورحت المستشفى معها لاني كنت تعبانه وهي ماقصرت وقفت معاي

ورحت معها بيتهم وسولفت معها وغيرت جو .... يوم جا الليل قلت لها بالله قولي لي شسوي انا متضايقه

للحين ... قالت خلاص نامي عندي ووسعي صدرك وبنجلس نفرفش وبكره نطلع نتمشى ....

قلت صار بس اكلم زوجي استأذنه ابات عندك ... كلمته جنبها وسولفت معه شوي ولا حسسته اني متضايقه بس قلت ان خويتي متضايقه بنام معها .... جت هي بهالاثناء قالت لي اسأله اذا في عنده خوي والا قريب يبغى يتزوج والا شي وقمنا نضحك ... وسمعها زوجي وماعلق على شي ......

مرت الايام وقرر زوجي انه يشتري لي شقه عشان لا جا كم يوم نجلس فيها بدل بيتهم لان يقول انه يبغى يحس باستقلاليه ومدام امور النقل تبعي متوقفه ويمكن هو ينقل فنشتري من الحين حتى اذا نقل نكون جاهزين ...

فعلا شرينا الشقه ومرررره فرحت وصرنا نأثثها ونطلع سوا لا جا ونختار كل شي وكان يبغى كل شي بذوقي

وعلشان هو مايجي الا مابين فتره وفتره اثثناها على مدى 3 شهور ....

انا هنا خلاص وصلت تقريبا نهاية حملي ...

قبل اسبوعين تقريبا .... والشقه صارت جاهزه من والى ومابعد ننام فيها ولا ليله ....وانا متحمسه يجي بس

نسكن فيها لو ليله ....

قال لي ياعمري عندي كورس بالطايف هالاسبوع ولمدة اسبوع ....

قلت يعني ماراح اشوفك ماراح تجي... ابغى نفرح بالشقه ونسوي فيها حفله ....

حفلة فرحتنا بالشقه وحفلة .... والا نسيت انه الاسبوع الجاي ؟

قال لا ياحبي طبعا مانسيت اوعدك اني اكون عندك ليلة ..... بس عطيني المفاتيح

علشان اجي قبل بليله واسوي احلى المفاجآت وادلع الشقه وادلعك ....

انبسطت انا وعطيته المفاتيح بس انا اساسا مسويه نسخه ثانيه لاني ادري بعمري دايم اضيع المفاتيح

وقال لا تجي الشقه بغيابي ... ابغى نفرح فيها سوى ....

طبعا طلباته اوامر لاني احبه ....

طبعا له كل اللي يتمنى

مو هو زوجي وحبيبي وكل دنيتي ؟

مو هو اللي وعدني اني بكون معه اسعد انسانه ؟

مو هو اللي كل مره اشوفه فيها يحسسني بأني اميره ؟



عطيتك قلبي واحلامي

وبالآخر تجازيني

وتمحي نصك الثاني ؟؟!!

احس اني معك نجمه

تشوف الناس ذي من فوووووق

وترسم لي حدايق توت

حنانك رقتك والذوووووووق

علامك بس فهمني ؟

ليه بالاخر تجازيني

وتمحي نصك الثاني ؟!



فعلا راح الطايف .... وكنت استنى الويك اند بفارغ الصبر علشان يجي

في اليوم الموعود اتصل عليه واشوف جواله مقفل

قلقت عليه مرررره بس قلت ياااارب يكون بخير

بعدين كلم قال انا ياعمري بالطريق ويمكن اوصل على ال 11 لا وصلت بكلمك .... قلت اوك

وطرت ببالي فكره ...

هو بيجي تعبااااان ياعمري ومابيمديه يسوي المفاجآت بالشقه على قولته

ومااابغاه يحس بالفشله فقلت انا اروح من المغرب اعدل الشقه وازينها وهو بكره يجي ويشوف كل

شي جاهز ....وطبعا هو مايدري ان عندي نسخه من المفتاح

اخذت الورد .... والبالونات ...والكيك ...وحركات كنت مسويتها وقلت لاخوي ياخوي ودني شقتي ابغى افاجأ حبي ...

فعلا رحنا .... فتحت باب الشقه ودخلنا ....

ريحة عطرهـ اشمها .... آآآآهـ ....وصوت ميوزيك راااااااايق ...

عرفت انه جا واستحى يقول لانه ماسوى شي ....

شفت قميصه عالكنب اخذته وشميته ..... ريحة عطره ممزوجه بريحة عطري ....

وشفت غرشة عطري عالطاوله ... قلت ياعمري مايستغني عني يبغى يحس فيني ...

قلت خلني افاجأه اكيد بغرفة النوم .... ياخوي استناني بالمجلس ...

عدلت الميك اب

ابتسمت ابتسامه حلوه

واخذت ورده حمرا

ومشيت بشويش لغرفة النوم

فتحت الباب كان النور خااااااافت واسمع صوت ضحكه خفيفه

عليت عالنور وانا اقول ...حبيبي ؟

وشفته ...

ياليتني مت قبل لا اشوفه

يديني ترتجف وربي الحين

شفته معها .... معها هي .....خويتي ....خوية عمري .....خوية الطفوله

زوجي انا ..حبيبي...حياتي كلها ....قلبي ودنيتي كان معها


شلوووووون ؟ ولييييييييييه ؟؟


من الصدمه وقفت سااااااااااكته بس اللي حسيته ان الورده طاحت من يدي

ودار ببالي بسسسرعه شريط الذكريات كله

ليلة الشوفه ... الخطوبه ...الهدايا ...كلمة احبك ... الزواج ...شهر العسل ...الشقه ..الاثاث

تعبي وحملي ... فضفضتي لخويتي ....كلام زوجي .... ....والكلمه اللي كاتبتها عالكيكه....( كل عام وحبنا بخير )


واحلى هديه اهداني اياها بهالمناسبه ....

............ خياااااانه ...........










...........



لا

قصه حقيقيه وانا بطلتها قبل اسبوعين تقريبا ...

بس مافيني اكمل الحين وش صار من وقاحه بعدها ...

يمكن علشان اني كاتبتها من قلب وانا ابكي قلتو مو مصدقينها !!

يمكن علشان انه مايجي ببالكم واحد يسوي كذا بحبيببته قلتو خياليه ؟!


أو يمكن علشان مامريتو بتجربه مثل هذي شككتو بمصداقيتها ؟

ويمكن

ويمكن

ويمكن




عارفين وش اللي ذابحني اكثر شي ....


اني لما كنت اقرا قصص زي كذا دايم اقول ( هه .... زوجي حبيبي الحمد لله انه غير عنهم )

( اكيد ربي يحبني اللي عطاني واحد زي زوجي ) ( الله يعين اللي تشوف خيانة زوجها بعيونها ) ...


بذيك الليله تأكدت ...

ان كلهم زي بعض .... كلهم ...كلهم ....بلا استثناء

حتى اخواني مااثق فيهم خلاص



الله يسامح كل وحده تقول ببالها اني كذابه

وش مصلحتي اجلس وأألف قصه تصلح لمسلسل ؟

الله يسامحكم ....




ماابغى ادخل في تفاصيل اللي صار بالضبط بعد ذيك اللحظه لاني بنهار مرهـ ثانيه

بس دخلت المستشفى 5 ايام باحتمالية ولاده قبل الموعد مع انهيار ...

اخوي اللي كان معي ذيك الليله على انه رجال والله انه يبكي لا شافني لانه حضر ربع الموقف تقريبا ...

زوجي ....آآآآآهـ ....صعبه انطقها وربي ......

زوجي ....جاني بيت ابوي يترجاني واخوي طرده ....وش تبغى تقول اكثر ؟؟؟

وش تبغى تبرر ؟؟؟

لما قلت لاخوي بالله عليك بس ابغى اسأله سؤال واحد وعيني بعينه ....رضى اخوي بشرط انه يكون حاضر معاي ...

دخلت المجلس وحطيت عيني بعينه وهو ينزل عيونه ...صرخت فيه بقووووه .....( ناظرني )

قول لي ليييييييييييه ؟؟؟


بكل تفاهه قال عذر كل الشباب التافهين ياللي مثله .....( الشيطان شاطر )

يوم قال كذا .... التفت على اخوي وقلت له لولا احترامي لك ياخوي كان تفلت بوجهه .... طرده من بيتنا ...

وفعلا طرده اخوي ....

غيرت ارقام البيت والجوال واخذت اجازه من الشغل ....

صرت اخذ حبوب مهدئه ومنومه حسبي الله عليهم .... ادري حامل بس خلاص ماعاد يهمني ...

اصلا كرهت اللي ببطني قبل لا اشوفه ....

اما عن خويتي الخاينه ....

طبعا غيرت هي ارقامها وما انتظرت منها تبرير ....

وانا اصلا مافيني حيل اني اكلم اهلها مع ان ببالي هالفكره بس الي وقفني ان امها مريضه وابوها شايب مره ....



اهل زوجي علمتهم امي بالسالفه وبالبدايه ماصدقو بس لما اعترف ولدهم الخايس صدقو وتفشلو واعتذرو

هه .... بأي بنك اصرفها ؟


طبعا طلبت الطلاق .... واصلا ماله عين يقول لا .... بس ابغى انتقم منه قبل لا يطلق ومو عارفه شلون

ابغى اذله واهينه مثل ما ذلني ....

قراري النهائي اني اتطلق واخذ ولدي والا بنتي واروح مع اخوي برا لانه بيكمل الماستر ....

ماابغى ارجع ولا ابغى اعيش هنا

ماابغى اشوف احد

ماابغى اتذكر شي

حسبي الله عليهم حطموني .....


تدرون وش احس فيه الحين ؟

اني بعدني بمرحلة الصدمه والانكار...مو مصدقه لهالساعه اللي صار

ليه بس؟ وش كان يبغى اكثر ؟

اقطع نفسي عشانه ؟

وش يبغون الرجال من الحريم ؟


وخويتي الخاينه ...

قلو رجال العالم الا زوجي؟

يعني ماتسمعيني اشكي لك ؟

يعني ماتدرين اني احبه ؟

والا بس تبين تحرقين قلبي ؟


بس اتمنى انها تقرا كلامي الحين لانها تدخل هنا احيانا ....

ابغى اقولك ...

حسبي الله عليك ...

وش كسبتي الحين ؟

وش اللي حصلتيه ؟

هدمتي بيتي وحطمتيني

هدمتي كل شي حلو بحياتي

حسبي الله عليك جعلك تشوفينها بحياتك ....
هلا بنات ....

أشكر كل وحده ردت او دعت لي

فعلا كنت محتاجه دعاكم او مواساتكم

تدرون وش اكثر شي يجرح ....؟

لما تأشر على مكان الجرح وهو ينزف ويقولون لك معقوله هذا جرح ؟ ؟؟...ماشفنا شي يتهيأ لك

اتمنى يوصل ذا الكلام لكل وحده ماحطت نفسها مكاني

و ما بقول اتمنى انك تذوقين شووووي من اللي فيني علشان تصدقين ...


المعذرهـ ...

فعلآ كنت تعبانه هاليومين وحبوب النوم ماخلت فيني حيل ...

آآآآهـ ياقلبي وش اقول ؟

في كثير تسائلو اذا كان متزوجها او لا ؟

انا ماهمني كان متزوجها او لا قد ماهمني انه ليه سوى كذا .... سواء بالحلال والا الحرام

بس بعدين اكتشفت انه بالحرام واستغربت بعد ماوعيت شوي انها بنت وانتو فاهمين فــ كيف تسوي كذا ؟

اما بالنسبه للي قال لي ليه تطلعين اسرارك ..

والله وربي اني مااطلع اسراري بس صرت في هالكم شهر الاخير من حملي علشان اني متضايقه من بعده

واحتاجه صرت اقول اني احتاجه .....

ما حتى كلمته جنبها الا ذاك اليوم اللي نمت عندها حسبي الله عليها

مدري هي خذت الرقم من جوالي وانا نايمه !!! وهذا اكيد اللي صار

بس هي حضرت ملكتي وحفلة الشبكه والزواج وكل مره تقول لي يابختك يابختك اقوم انا ارد عليها بطيب نيه ربي يعطيك مثل ماعطاني ...

اثاريها تبغى اللي عطاني مو مثله .... والله ماتوقعتها ولا بالغت في اني امدحه قدامها ابدا ابدا وهو اصلا ماقط جبت له سيرتها الا ذيك الليله المشؤوومه اللي سألته وانا امزح ....

والقهر اني ماشكيت فيهم اثنينهم لانها صاحبتي بس مو بالدوام يعني اشوفها من فتره لفتره بعد زواجي علشان لهيت بالشغل والحمل والتعب وبعدين تجهيز الشقه ...

آآآآهـ يالشقه

جتني العبره والله يوم تذكرت الشقه

اما بالنسبه له هو

طبعا ماشكيت فيه لاني كنت احبه وماااااااتوقعت بيجي يوم انصدم فيه صدمة عمري معاه بالذات
ولانه كان بعيد .... مدري شيسوي مايسوي ....

آآآآه ياقلبي جلست اتذكر كل ليله ماكلمني فيها

ياترى كان مشغول بمكالماته معاها ؟

اللي ابغى افهمه اني يعني يحبها والا نزوه والا وش السالفه ؟

طيب وانا ؟

وكلامك لي ؟

احس براسي مية الف سؤال وسؤال

والبنات اللي قالو اسامحه ... والله معصي اسامحهم وربي وربي وربي بذمتهم ليوم الدين ومو محللتهم

ولا مبريتهم الذمه .... وكل ما تذكرت واحتريت امسك سماعة التلفون واقول بفضحها بس بعدين احس

اني اتردد علشان اهلها زي ماقلت لكم ...

وطبعا مستحييييييييل ارجع له حتى لو فيها حياتي ....

مستحيييييييييل

مع ان اهله هاليومين يدقون مدري من وين جابو الرقم بعد ماغيرنا رقم البيت بس انا مهدده اللي بالبيت

انه محد يرد عليهم .....



بنات تكفون ..

لا تخلوني بروحي ...

خلكم هنا معاي

تهقون ارجع لدوامي ؟

صحيح تعبانه ومحذرني الدكتور اتعب زياده بس خلاص تعبت من التفكير

ابغى اسلى بأي شي

ابغى انسى

وابغى انساه

ابغى لو خمس دقايق يوقف تفكيري

حتى بالنوم حسبي الله عليهم صرت اتخرع



والله انبسط من اللي تبقى من قلبي على كلامكم وتشجيعكم

اقول لسه الدنيا بخير ... في ناس توقف مع بعض ..

خصوصا ان محد يعرف مشاعر البنت الا البنت مثلها



تصدقون بنات ....

اكتشفت ان اللي اصعب من مرحلة الصدمه بكبرها

مرحلة مابعد الصدمه ..

وانت تبدا تفك الخيوط خيط خيط

وتبدا تحلل و تكتشف اشياء صارت من قبل وكنت تمررها بحسن نيه

وانت تستوعب اللي صار بشوييييييييش

وكأنك تشرب السم قطره قطره

وانت تسأل نفسك باليوم الف مره ( ليه ؟ ليه ؟ )

وانت تناظر نفسك بالمرايه تدور على غلط فيك يبرر اللي صار


تصدقون بعد وش عرفت ؟

ان اصعب وقت في هالمرحله هو الليل

آآآآآهـ يا الليل

لا جا الليل والكل دخل غرفته ينام

وانت جلست بروحك بذي الزاويه والا على ذي الكنبه والا بذا المكان

كل مكان تذكر فيه شي

لا جا الليل وتزاحمو حولك الذكريات

واحترت اي وحده فيهم تستعرضها قبل

لا جا الليل وصار المكان هدووووووء الا صوت الساعه تذكرك بالوقت وتشمت فيك

لا بغيت تبكي وعلشان لا يسمعونك تدفن راسك بالمخده او تحط يدك على فمك وتكتم الشهقه

واصعب شي ...

انك تبلع غصتك علشان محد يحس فيك ...

والاصعب من هذا ...

انك تلبس ثوب الكبرياء والشموخ قدام اللي حواليك وانت كل خليه بجسمك تصرخ آآآآهـ ...



اليوم يابنات رحت الشقه ...

تشجعت ودست على كل شي ورحت

ابغى اخذ اغراضي قبل لا يجي هالاسبوع

والله وربي خرت رجولي من على الباب مو قادره اوقف

جسمي كان كله يرتجف

كنت ابغى اصرخ من قمة راسي بس احس اني تبلدت

درت بالمكان وانا مشمئزه من كل شي ... كل شي قرف .. كل شي احسه يضحك علي

و اولهم السرير اللي اخترته انا وياه وتلوث بخيانتهم ...

غرفة النوم اللي صابغينها بلون عنابي ... اذكر يوم قال عنه انه مره رومنس ودافي

الصوره اللي معلقتها وانا لابسه فستان الخطوبه الوردي وهو ضامني ومبسوووووط ومحد قده

والله و مرتب السرير بعد ذيك الليله السوده ...

شفت رساله حاطها على التسريحه اللي فيها عطري المفضل الي استعملته الزفته في خيانتهم

يدري اني بجي

كاتب فيها اعتذار طويل عريض وانه يحبني وانها هي اللي لزقت فيه وانه كذا وانها كذا واني مدري ايش

قريت نصها والنص الباقي احتقرت نفسي اني اقراه ....

والله غصبا عني قلت ( هه )

يحسب انه بيبرر لي وبرجع بسهوله ؟

والا بقول له ( لا بليز سامحتكم اثنينكم واسوي روحي نسيت كل شي ) ؟

المشكله انه يدري ان عندي كرامتي بالدنيا كلها

يدري ويستهبل

اخذت اغراضي واللي بقى من كرامتي ...

وقبل لا امشي من الشقه

وادري ان اللي سويته شي تافه وزي الاطفال بس خل يقول اللي يقوله

رحت بكل برود للمطبخ واخذت الزيت ودرت فيه على الشقه كلها واولهم السرير

لطعت الشقه بالزيت ... طفله صح ؟

بعدين اخذت علب الببسي ورجيتها وفتحتها بكل غرفه بالشقه ....

واخر شي اخذت البدل اللي شاريهم من برا لما كنا بشهر العسل وقصصتهم بالمقص وكتبت كلمة خاين

بالمقصوص وفرشته على السرير ....

ادري حركات بزران بس من الحره

وطلعت ...

والله كني اقص على نفسي بهالحركات ....



المهم ماعلينا ....

من الليله ببدا اقرا سورة البقره بإذن الواحد الاحد وببدا بعد بالاستغفار

والحبوب المنومه اوعدكم بخففها شوي شوي لاني بعدني ابغى ادوخ علشان انسى

تدرون ؟

اصلا حتى هالحبوب ما تخليني انام ... مقدر انام والله يمكن كل اللي انامه ساعه ونص الى ساعتين باليوم

بس تخليني ادوووووخ واسترخي

ويبدا عاد على قولة امي الكلام اللي يقطع القلب

لاني اتكلم وابكي وانا مااحس ....



مااطول عليكم بس بتواصل معاكم على طول والا بنجن وربي عالم

على فكره ....

في كثير تسائلو عن اسلوب كتابتي ..

انا احب اكتب خواطر كثيييييييير ويبدا القلم يكتب عندي الا اذا مريت بحالة حزن

اشوف نفسي اكتب ولا اوقف ...

حتى اني احيانا اسأل نفسي معقوله انا كتبت كذا ؟

بس ماعليه تحملو اسلوبي







كم شغله حبيت اوضحها للي تسائلو


كيف ماسمعو صوتي وانا ادخل الشقه ؟

انا متعوده ادخلها من باب المجلس علشانه اقرب من باب الصاله ومن المجلس في باب عالصاله

وسبق وقلت اني قلت لاخوي استناني بالمجلس ...

وكان في صوت ميوزيك وقلت هالشي من قبل

وانا كلي على بعضي لا دخلت الصاله وحده يعني مو جيش علشان اسوي ازعاج

وبرضه قلت اني يوم دخلت وعرفت انه بالشقه كنت ابغى افاجأه ... فــ بديهي اني اتحاشى اي صوت

وغرفة النوم بعيده عن المجلس ....



اخوي وينه عن السالفه ؟

اخوي مو من النوع الحشري .... وانا وضحت له انه يستناني بالمجلس ... وقلت لكم اني يوم شفت

منظرهم .... آآآآهـ ياقلبي من منظرهم يعني لازم اشرح لكم كل شي ؟!

قلت لكم اني من الصدمه ظليت ساكته ولا نطقت ولا بحرف .... وبعد قلت انه حضر ربع الموقف تقريبا

لما بدا يمسك يدي مايبغاني البس عباتي واطلع وافضحه .....والله مو شرط اشرح بالضبط


في بعد اي اسأله تجرح ثانيه ؟!!!

في بعد اي شك ثاني ؟

انا اللي ابغى افهمه

يعني معقوله في ناس بتترك اشغالها واعمالها وبتتفرغ تكتب روايه خياليه على منتدى علشان تجذب الناس

طيب وش بستفيد؟

يعني اني ولد مثلا وابغى اتسلى؟

والا بنت فاااااضيه بحياتها وماتدري شتسوي قالت يلا خل العب بعقولهم ؟

حتى رسايل خاصه ادري ان هالمنتدى مافيه وانا هذا اللي عاجبني



يعني وحده حامل ولا لها خلق شي بتترك تجهيزات البيبي وحياتها الجديده الجايه وزوجها وبتقول يلا

زهقانه .... امممم بدخل اكتب خرابيط من تأليفي ؟!!!!


اووووهـ صح

يمكن بعد مااطلع حامل لاني اخربط

عموما..


زي ماقلت اللي مو عاجبه ينتف حواجبه

انا بروحي اللي فيني كافيني مو ناقصني تجريح

والي عندها / عندهـ تعليق يجرح او تكذيب لسالفتي يحتفظ فيه لنفسه مستغنيه عن رايه


حسبي الله على اللي كان السبب و اللي خلاكم تستهزأون على جروحي

يعني الواحد وين يروح ؟

يكتم غصته ويموووت ؟


والله نزلتو دموعي الله يسامحكم




تطورات كثيره صارت هاليومين لازم اقول لكم عنها

جو اهل زوجي مع زوجي المصون علشان يعتذرون ويصلحون الوضع

كسرت خاطري ام زوجي مره حبابه وماتوقعتها تبكي بهالحرقه ...

الزبده ان صار مد وجزر وهواش وشد ولين يعني من كلووووو ....


طلب زوجي بالاخير انه نتكلم بروحنا ..

وافقت اب اشوف وش عنده .... وش يبغى يبرر بعد ؟

ماعلق على اللي سويته بالشقه لان ماله عين اصلا واللي سويته ولا شي

جلس يتكلم ويبرر انه كله منها وهي اللي لزقت وانه مايحبها بس نزوه ومن هالخرابيط

ودي اسامحه بس والله والله مو قااااااااادره احس لو بعيش معاه مره ثانيه يمكن احتقر نفسي

ولا بعامله زين ...

قلت له تدق عليك الحين ؟ قال لا من ذيك الليله مادق ولا دقت

هه تحسبني بصدقك زي اول ؟

جلس يحلف عالمصحف ومدري ايش

طيب قلت له اسامحك بس بشرط ...

ماصدق على الله اجيب طاري المسامحه

المهم طلبت منه انه يقول لها بنفسه وانا اسمعه انها كانت نزوه وانه يحتقرها ومن ذا الكلام

قال الحين اتصلي فيها واقول لها قدامك ....


لا لا ياحبيبي مو الحين ....

لما انا اتصل فيك واقول لك يالله يعني يالله .....


طبعا اكتشفت ان عندها رقم خاص بس لزوجي وهو سيد الحسن برضه نفس الشي ( امحق )


يوم الخميس الظهر رحت بيتهم وانا ادري انها مو موجوده لانها تشتغل حاليا تطوع باحد الجمعيات

والله ومتطوعه بعد !!!!

المهم رحت وانا ارتجف والله بس ماسكه اعصابي مررررررره ومسويه نفسي بارده

امها اللي استقبلتني ومسكينه كسرت خاطري بس حرتي اكبر

وجلست تشره وتقول ماتجين وبنتها متغيره وماتاكل ...بالطقاااااااق جعل الزقوم يكون غداها وعشاها

قلت ياخاله ابستنى ( فلانه )...

وسألت عن مرة اخوها متعمده ... وقلت واحشتني موووووت ابغى اسلم عليها وانا قصدي انها تسمع

كل اللي يصير .....

جت مرت الاخو وجلسنا سوا وحسافه ان الزفته ماعندها خوات بس اخو واحد....

شوي الا هلت ست الحسن والدلال وتمنيت ان لحظة ماشافتني خذت لها صوره

وجهها صار اصففففففر وزي اللي يدها قامت ترجف طبعا سلمت علي بيدها وانا احس فيها ترجف

وانا اسألها ببرود....شخبارك ؟علامك ماتسألين ؟ورا متغيره ؟

حسيت انها بتخق خلاص...قالت بالاذن بروح ابدل ...

قلت بصرخه ( لحظه ) ......عندي لك امانه ابغاك تاخذينها

امها ومرت اخوها استغربو لهجتي يسألوني شفيك ؟شصاير ؟

وتناظرني بنظره حسيت انها استعطاف انو بليز لا تقولين شي... اسوي اللي تبين ...

قلت لها ....

زوجي يسلم عليك كثييييييييييييييير ويبغى يقول لك كم كلمه من القلب يا حبيبة القلب

بنات لا تسألوني عن حالي ذيك اللحظه حتى صوتي يرتجف بس ماحبيت ابين اني شوي واطيح



اخذت منه جواله اللي كان يكلمها منه وفيه كل الرسايل ....ورقمها طبعا .....

اخذته ودقيت منه على جوال زوجي الاصلي وحطيته على السبيكر وقلت ...

.... ياروحي قل اللي قلت لياه امس ....

تكلم زوجي وهي احسها خلاص ... وامها ومرت اخوها احسهم مو قادرين يستوعوبون ....

وزوجي يتكلم يقول لها انتي حشره لزقتي فيني وانا متزوج صاحبتك وجيتيني الشقه وانا صديتك

وانا احب زوجتي ولا احب هالخرابيط ...ومن هالكلام اللي يسم

طبعا انه صدها كذب بس علشان نبين حقارتها ... وطبعا مستحيل بتقول لاهلها .. انا رحت ونمت معاه ...

الزبده وهو يتكلم كان يسجل الكلام ....

هي حسيتها انهارت خلاص وامها جلست وخفت تجيها ازمه قلبيه وابتلش لان وجهها كان اصففففر

ومرت الاخو مو مصدقه مفهيه ....

الحمد لله ان ابوها مر بذيك اللحظه الحمد لله لان قلت اكيد الام ومرت الاخو بيسترون على البنت

وانا ابوها اسميه عمي وخلاص متعوده عليه ...

قلت ياعمي ....ذي الامانه لبنتكم ....(اللي هو الجوال ) وفيه كلللل شي

ناظرني وهو موب فاهم يقول اي امانه ؟؟؟

قلت خليها هي تفهمك .....



سلاااااام .....


وطلعت ومرت الاخو كانت تنادي تقول لحظه لحظه وانا ما وقفت طلعت على طول مدري وش تبي .....

الجوال هذا ....

فيه رسايلها لزوجي ....

شي من جوالها الثاني اللي مطلعته ..... وشي من جوالها الاصلي .....

انا مسحت كل الرسايل اللي كان مرسلها زوجي وخليت رسايلها ....

بتقولون حتى هي بتوري اهلها رسايل زوجج ؟

بقول ربكم كريم...

زوجي كان يراسلها على جوالها الثاني اللي مطلعته واللي مايدرون عنه اهلها ويراسلها من رقمه الثاني

لما بتوري اهلها الرسايل اول شي بيكتشفون ان عندها جوال ثاني....ثاني شي بيشوفون الرقم انه مو رقم زوجي الاصلي ....بطاقه بدون اسم ....

ورسايله اللوح كلها مافيها شي يدل انه هو فلان ...

لكن هي الغبيه كانت تراسله احيانا من جوالها الاصلي اللي يعرفون اهلها ....وكانت تكتب اول مابدت تراسله

انا فلانه .....ومفتخره بعد الغبيه ....


بس وش اللي صار بعدين ؟

مدري ولا يهمني وبالطقااااااااااااااااااق .....ولاول مره من صارت السالفه ابتسم ...طلعت وانا مبتسمه

خربت بيتها ؟؟؟!

ايوه خربت بيتها لحد يلومني .... خل اهلها يلمون بنتهم .....

خل يأدبونها ....

اللي سويته فيها حرام ؟؟؟؟

ادري اللي سويته منذله بس خلاااااص لو ماسويت كذا كنت راح انجن والا اموت

تستااااهل ولا بمتحسفه ابدا ابدا ....

الحين طلعت قدام اهلها ان هي اللي لزقت بزوجي وهو اللي يصدها ومايقدرون يثبتون عليه شي

ورسايلهم كللللها ناسختهم بجهازي...




بعدين لما كلم ...على باله اني سامحته خلاص وصافي يا لبن ...

خليت اخوي يرد عليه وقال له ....تقول لك اذا ولدت بالسلامه تفكر تسامحك والا لا .....

ومن الحين ليما تولد ماتبي تسمع صوتك ولا تشوفك ولا تقرب من البيت ...




احس اني مرتاحه الحين ...

مو كثير

بس طلعت حرتي

اما بالنسبه له هو روميو زمانه ....

من جد مالي خلق افكر زياده .... برجع لدوامي بكره ....واذا ولدت بفكر .....ويحمد ربه بعد ....

واذا طلق قبل كذا ابرك من ساعه ....بس مااعتقد بيطلق لانه يبغى يرجعني بأي طريقه.....



وبس



شرايكم باللي صار ؟


كل عام وانتو بخير وصحه وسلامه

ادري اختفيت فتره طويله


وللي شكك فيني وقال اكيد كذااااابه بقول له

( الله يســامحك )


وللي سأل عني بينه وبين نفســـه أهديه أجمل تحيه مع باقه من أخباري





طبعآ أكيد اني ولـــدت ...

ايوهـ ولدت وجبـــت ولد .... نسخه من ابوهـ ....

العجيب اني احب هالولد بجنووووون

أعشقه

اموت فيــه

طلعـــت كل حرتـــي من الحب بذا الولــــد

وصـــار هو شغلي الشاغـــل ......



والخبــر الثاني ....

بعد ماولدت حــاولت أسامحه ....

بعد الاربعين حجز لي فندق وقلت بجلس معه اسبوع

يعنني اغير جو وافتح صفحــه جديده

جلست معه ثلاث ايام بعدين كلمـــت اهلي قلت تعالو اخذوني

مااااقدرت وربي ماقدرت

بعد اسبوعين برضه قلت بحاول ...

رحت معه مكان شغله علشان مااضعف وارجع

بعد هناك بعييييد مابقدر اقول لاهلي تعالو اخذوني

هالمره بحاول ...

علشان ولدي

وعلشان قلبي

وعلشان الناس

والجمله الاخيره سمعتها من خالاتي كثيييييييييير

كل شي نسويه علشــان الناس

وياليت هالناس اللي خايفين على معاليهم من التأثر والحكي

ليتهم يفيدونك لا بغيتهم ....

دســـت على كرامتي

ورحــــت .....



حاولت اتقبل الوضـــع

لكــن ....

كل ماضحك وبانت اسنانه تذكرت

وكل ما مسك يدي تذكرت

وكل ما قال لي حبيبتي تذكرت

وكل ما ضمني لصدره تذكرت

وكل ما طفينا اللمبات تذكرت

وكل ما تغطيت وحاولت انام بعد تذكرت


السرير جاب لي أزمــه ...


لا لا .... كل شي يتعلق فيه جاب لي ازمه


حــاولت أسامحه

اعيش مثل الناس ...

حاولت اني اتغلب على الجرح وماقويت

وربي ماقويت ..


مشكله

لا صار اللي جرحك قدامك

ليه ؟؟

لأنك كل ماحاولت تنسى وتقول عل وعسى

يطلع بوجهك و ويرجع شريط الذكريات لوراااااااا

لذيك الليله ...

تذكرون اي ليله ؟










واليوم ....

جيت علشان ...
















أبشركم ...


... اني تطلقـــت ....








ما بغيت يمر علي العيد وانا معه

ابغى تصير فرحتي بالعيد غيييييير

لكن تدرون وش الحســـف ؟؟؟

ان اكيـــد بيكون هالعيد وكل عيد غير

لأنه شوهـ فرحتي بالاعياد


ليه ؟


حسافه ان زواجي كان بالعيــــد ....



..


..


لي عـــودهـ



صبــاح الآهـــاتــ



ألف شكــر للكــــل

لكل اللي وقفو معاي

لكل اللــي دعـــو لي

ولكــل اللي شجعـــوني ...



يمكـــن كثيـــر عاتبنـــي على موضوع الطـــلاق

لكـــن ...

قسم بالله بالعيـــن دمعه وبالقلب نـــاااااااار

أنا طبعي اني لا قفيـــت مقدر أرجع

ليــه أرجـــع ؟

تحسبـــوني ماحســـبت حســاب كلمة مطلقه ؟!

تحسبــوني مدري وش يعنـــي نظرة تشمـــت وشفقه ؟

تحسبـــوني ما حطيت ببالي ان ولدي راح بعــاني ويعـــــاااني ويعـــــــــااااااااااني

ياترى وش بقــول له لا كبر وصار يفهم وسألني يمه ابوي وينـــه ؟

يمه ... ليه ابوي مو معنــا ؟؟

يمه .. ليه كل ربعي ابوي يضمهم الصباح وانا لا ؟

ليه وليه وليه

الله العالم فكــرت بولدي قبل نفســـي

يانااااااس حـــااااااولت وربي مقدر

الله العـــالم ... شقد عانيت ...وانا اقول .... ( اللي بينا انتهى..ابغى الطلاق )

صحيــح انا اخذت رغبتي وتطلقـــت

لكــن أحس اني

منكســرهـ ومنكســــــــرهـ ومنكســـــــــــــــــــرهـ

تدرون في وشو طلعت حرتي ؟

بالكتابه ...

لو تشوفون غرفتي

اوراق بكل مكان .... قسم بالله انا ياللي اكتب لا قريت وش كتبت بعدين اجلس ابكي

ليه ؟؟

ليييييييييييييييه هدمت اللي بينا ؟ليه ؟

تعبت اهذي

تعبت ألوم

تعبت ابكي

تعبت من كل شي

تعبت من كثر ما اسمع كلمة ( يا حراااااااام ) من الناس

الناس مادرت اني انخنت ... ماتكلمت ...ماابغى اطلع مغفله قدامهم

بس درو اني تطلقت ومحد له شغل بالاسباب

... تطلقت ...

ياكبر ذي الكلمــــه

ياترى بكرهـ ... راح ينفرون مني صديقاتي لأني مطلقه ؟

صديقات ؟

مدري اضحك مدري ابكي على ذي الكلمه

صديقات ؟






معلش تحملـــوني ...

أحس ودي ان يوقف مخي عن التفكير بس خمس دقايق

والله بس خمس دقايق

ودي الدنيا تــفضا دقيقه وحده بس

بس دقيقه

ابغى اصرخ .... ماصرخت

ابغى اصرخ من اعماقي

والله ابغى اصرخ

ابغى انهاااار على صدر امي

و ادفن راسي وانا ابكي لمن انام

ابغى احد يحس باللي فيني

تعبـــت أكابر

تعبت امسح دمعتي لا يشوفها احد

تعبت خووووووووووفي من بكره ومن الناس

والله تعبت وربي تعبت





كثير سألوني ...

عن تفاصيل قديمه

ابغى أؤدهـــا

وعيـــت لا تمــــوت

وكل مره

ابغى اجاوب

تتجمد الكلمه

وتختنـــــق ....




بحاول اجاوب عاللي اقدر

والباقي سامحوووني عليه



وصديقتي وينهــا حاليا ؟

اللي عرفته انها انطقـــت طق من اخوها

وجت امها لامي بعد ما ولدت .... تكسر خاطري هالام

تقول لامي وهي تبكي .... والله ضربناها والله ماكنا ندري

الله يخليكم لا تفضحونها

امي تقول .. هي فضحت نفسها بنفسها

امها مسكينه ..على بالها بس طلعات ماتدري انها راحت الشقه



قسم اني يدي ترتجف لا طرت لي هالشقه




تقول امها والعهده على الراوي

انهم حرموها من كل شي

ولا ادري وش معناة كل شي



الى هنا انتهت
ادعولها فعلا قصه اثرت فيني حييييييييل