زوجي يخوني للمره الثانيه و هالمره طلبت الطلاق و مصره عليه

السلام عليكم و رحمة الله و بركاته

هذي مشكله صديقتي و طلبت مني اعرض مشكلتها في المنتدى

أنا و زوجي لم نكمل حتى الآن سنه من اتزوجنا

زوجي خاني في المره الاولى عن طريق الموبايل و اكتشفت خيانته و انا حامل بالشهور الأولى .... و انصدمت فيه كثير لاني عمري ما اتخيلت انه يسوي هالسوالف ..... اخواتي زوجي مطوع ؟ يعني انسان ملتزم و يتبع سنة الرسول يطيل اللحيه و يقصر الثوب ... و حافظ للقرآن و امام مسجد... و دارس للشريعه

يعني ابدا ما يخطر في بال أي شخص ان هذا الانسان ممكن يخون زوجته .... فعلا صعقني بخيانته و حالتي النفسيه اندمرت خصوصا اني في الشهور الاولى من حملي و في الغربه كنت ما اقدر أنام و لا آكل و حالتي الصحيه اتدهورت.... انصدمت من الانسان اللي كنت احبه حب فوق ما تتصورون ... فعلا حطمني بالكامل

واجهته في خيانته الاولى و اعتذر مني كثير و طلب اني اسامحه و انسى و حلف و وعدني انه ما راح يكررها و لا راح يجرحني مره ثانيه ابدا و انه راح يعوضني عن الجرح اللي سببه لي ... و بعد اسبوعين من الاقناع و الاعتذار قررت اني اسامحه و اعطيه فرصه ثانيه ... مع اني في قرارة نفسي مب قادره انسى الصدمه

لكن الطامه الكبرى بعد شهرين من الخيانه الأولى اكتشفت خيانه ثانيه ... لكن هالخيانه كانت قذره و خلتني احتقره اشد احتقار و انفر منه

اخواتي اكتشفت ان زوجي يدخل الشات من وراي يوم اكون في المطبخ او برا البيت ... و يا ليت كان يتكلم كلام عادي ... لا كان كل كلامه بالجنس ... يمارس الجنس مع البنات عن طريق النت بالكلام و يشوف صورهم و هم عراه مفاصيخ .. و مب بس صور لا ساعات يعرضون جسمهم بالكاميرا و هو يشوفهم و هم يمارسون الجنس

والله اني مفجوعه و ما أظن ان أحد قادر يحس باحساسي غير رب العباد ..... كيف شخص محافظ على السنن و يقرا القرآن ليل و نهار و حافظ للقرآن و امام مسجد يسوي جذي ؟؟؟؟ والله اني منصعقه من الكلام اللي قرأته على كمبيوتره .. جدامي يسوي نفسه انه غاض البصر و ما يطالع الحريم و من وراي يطالع صور مفاصيخ.... مو قادره استوعب ليش يسوي جذي ...... لا هو مراهق و لا هو عزابي و لا عنده ضعف في الوازع الديني .... انزين ليش يسوي جذي ؟؟؟؟؟؟

في البدايه ما قدرت اواجهه من شدة الصدمه لكني واجهته في النهايه ... أول شي انكر و حط ايده على كتاب الله و حلف كذب ... و لكن بعد ما عرضت عليه الدليل اعترف و اعتذر و عاد لي نفس الكلام اللي قالي اياه في خيانته الاولى... و قالي انه تاب و ندمان و حلف و وعد و اتكلم كثير و حاول كثير

لكن أنا نفسيتي اتحطمت ..... أحس اني عايشه مع منافق ... قدام الناس شي و بينه و بين نفسه شي ثاني
... و أحس على كثر ما حبيته على كثر ما اكرهه ..... جرحني جرح عمره ما بيندمل... مازلت اعاني من الصدمه الاولى وما قدرت انساها .. يقوم يصدمني مره ثانيه

سألته شو المشكله ليش كل كمن شهر اتخوني و تصدمني و تخليني اعيش في جحيم مع ان ما كملنا سنه يعني بعدنا عرسان ... هل المشكله مني اني ما قدرت اكون الزوجه اللي تمنيتها او المشكله فيك انك مريض او معقد؟

اخواتي زوجي طيب و حبوب و كل اللي يعرفه يحبه و يحترمه و أنا وافقت عليه عشان التزامه بالدين و أخلاقه
لكن افعاله اللي يسويها بالخفاء و خياناته لي و حلفانه كذب ما يمت للدين و لا للإلتزام بصله .... و أنا خايفه اكمل حياتي معه .. نحن في البدايه و هو يخوني أكثر من مره .. أجل كيف بعد خمس او ثمان سنين لما يبدأ الروتين و يكثروا العيال شو بيسوي ؟؟

اخواتي انا طلبت منه الطلاق و هالمره مصره على قراري مع انه قاعد يحاول و يباني اتراجع لكني مصره و بثبت على قراري لين ما ارجع بلادي و اروح بيت اهلي و هذا بيكون آخر يوم يشوفني او يسمع فيها صوتي

حرام عليه والله حطم أحلامي و مستقبلي و مستقبل اللي في بطني ... ما فكر فينا قبل ما يرتكب هالمعاصي ما فكر ان يمكن الله يعاقبه في عياله و عرضه .... الله يسامحك يا زوجي و يهديك

اخواتي اتمنى كل وحده تقرا الموضوع تدعي لزوجي بالهدايه و تقولي هل القرار اللي اتخذته صح ؟؟ و اذا كان قرار خاطئ انصحوني شو اسوي؟؟ مابي اسامحه مثل المره اللي فاتت ... داس على مشاعري و كرامتي مره و ما راح اسمح انه يكررها ... اذا كان قرار الطلاق خاطئ قولولي كيف أخليه يتأدب كيف أخليه ما يكررها ... أنا حاليا اكثف الدعاء في الصلاة بأن الله يهديه ... لكن انا ابي اتخذ معاه موقف حازم هالمره عشان ما يعيدها

أبي الطلاق لأني ابي احرمه من النعمه اللي الله رزقه و هو ما قدرها و قام يلحق ورا الحرام

انصحوني و ادعولي الله يجزيكم كل خير