زوجي يدخل مواقع الجنس وش العمل؟؟

السلام عليكم ورحمة الله وبركاته

مشكلتي هذه ارقتني ليل نهار حتى اني لااكل ولا اشرب من الهم والغم

بداية القصة دخلت الانترنت بعد صلاةالعشاء يوم السبت الماضي وهذا وقتي دايما بالدخول

دخلت على موقع البحث قوقل ابحث عن انشوده فجاءة لقيت اسم موقع غريب .....

ومن باب الفضول دخلته والا القى موقع الجنس....... قلت يمكن تثقيفي تجولت فيه والا القى شيء يهول وكلام بذيء ناظرت اخر زيارة للموقع لقيت نفس الوقت اللي كنت فيه عند اهلي.

جاء زوجي وواجهته بما رايت قال بس كذا قلت مافيه شيء ادخله اسمه بس كذا جاوبني قال والله حب فضول ولقافة
هالكلام مادش بمخي ابدا قلت في نفسي ماشي نصدقك هالمرة
نصحته وخوفته بالله عز وجل..

مرت الايام ورحت لاهلي وجيت البيت وهالمرة دخلت الانترنت الضحى وزوجي بالعمل
لفت نظري سلة المحذوفات مليانةاردت افراغها ووجدت فيلمان صوت وصورة والله يستحي الواحد من ذكرها ...........

عندها جتني نوبة من البكاء وبكيت بشدة من هول ماارى من قمة الفساد والسخف والانحطاط وو...........
قلت خل اروح اشوف قوقل دخلته لقيت نفس الموقع السابق موجود ومعه موقع اخر
هنا جن جنوني وازددت بكاء سكرت الموقع ولا حذفت شيء قلت خلها تكون دليل اثبات

وقعدت اصيح واستغفر الله ..

قمت وكتبت رسالة لزوجي بالجوال اني ماني مصلحه غداء اليوم

جاء زوجي وشافني زعلانه واصيح قال وش فيه؟؟

قلت رح شف الكمبيوتر وش فيه؟؟


وانحاشت لغرفة النوم وقعدت اصيح

راح الكمبيوتر وافرغ سلة المحذوفات وجوجل على طوووول<<لاني اسمعه وهو بغرفة الكمبيوتر

جاء يناديني ويبيني اقوم وانا ساكته

والى الان وانا زعلانه ومرتفع ظغطي من شغلاته
لي يومان وانا على هالحالة لاغداء ولا عشاء
اقوم الصبح وافطر وهذيه لين الليل واليوم بالمثل

ارسلت ليه اليوم نفس الحركة ماني مصلحه غداء وكتبت نصيحة اين الخوف من الله ومراقبته انا لن احاسبك على فعلتك فالله فوقك حسيبك

ويوم جاء العصر يتقرب مني ويقول خلاص عاد انسي اللي صار صار
والله مدري عنهن يمكن هذولي من الاولات <<< قصده الفضيحة الاولى

قلت وين الاوله؟ هذي موثقه بالتاريخ واليوم ياكذاب
قال خلاص اوعدك مااعيدها والله اتوب قلت مو عندي تتوب التوبه الى الله
يلا سامحني مسامحتني قلت لا قال مايصير من امس وحنا متزاعلين لااكل ولا شيء ميتين جوع قلت ايه ماهمك الا بطنك
قال لا موقصدي بس مايصير كذا عاجبك حالتنا قلت ايه قال اووه مايصير

قلت والله مايصير الواحد يدخل مرتين المؤمن لايلدغ مرتين قلنا الاولى فضول لكن الثانية فيها اعظم من الاولى افلام وخرابيط وقعدت اصيح

زعل وطلع والى حد الان ماجاء

وشو العمل يابنات حواء ساعدوني جزاكم الله خيرا
فانا في حيرة من امري هل اظل زعلانه لين مايعترف بخطاءه
او انسى اللي صار واخاف لو نسيت وسامحته يتمادى بالكذب زيادة ..

لان زوجي من النوع الكذوب حصلت مواقف قبل كذا لكن اشياء بسيطة مو مثل هذي ..