زوجي يراسل واحده ادخلوا ساعدوني

السلام عليكم ورحمة الله وبركاته
أخواتي في الله ابي منكم تنصحوني وتريحوني من اللي انا فيه بعلمكم قصتي
انا ماأبي بيتي يخترب لأني أحب زوجي واولادي القصه اني متزوجه وعندي ولدين الله يحفظهم
الحمدلله زوجي يحبني وعمري ماقصرت معاه وهو معترف اني مو مقصره معاه
تخيلوا اكتشفت انه يتراسل مع واحده بالواتس مسجل اسمها عنده باأسم رجال مره صارحته عن اللي يراسلها بس ماعلمني بالصدق يقول انه واحد معه بالشغل المهم تناسيت السالفه ولما كشفته مره يراسلها بالاسم نفسه شكيت بس حبيت اتأكد عشان ماأظلمه
بعد مانام زوجي فتحت جواله وكنت عارفه رمز دخوله وخذيت رقم اللي شاكه فيه عشان اتأكد وماأظلم زوجي قلت بدق ان طلع صوت رجال بقفل بوجهه ومعاد بشك بس تخيلوا لما دقيت وقلبي يرتجف طلع صوت حرمه احس الدنيا دارت فيني وقفلت بوجهها وبدا الشك يدور براسي بس معاد فاتحت زوجي بالموضوع لانه عنيد وبيكبر السالفه وبيقلبها علي وانا مثل ماقلت مابي اخرب بيتي واللحين كل مانام زوجي افتح جواله واشوف رسايلها احيانا امسح الكلام اذا قريته قبله تخيلوا حفظت رقمها بجوالي وبس اراقب اذا متصله وهو متصل احس نفسي بانجن تخيلوا اكتشفت انها متزوجه وعندها ولد وهي ب×××
واللي ذابحني ان زوجي لما يراسلها يعلمها وش يسوي ووين يسافر والمشكله انها عارفه انه متزوج
والله يابنات مقهوررره ونفسي اشتكي لأحد من اهلي بس مابي خرب بيتي
والله اني لما اجي بشتكي لااي احد من الاهل ارجع امد سجادتي بالليل واصلي وادعي ربي واشكيه وادعي لزوجي يبتعد منها وتبتعد منه
اعذروني ع الاطاله بس مالقيت افضفض الا لأحلى عالمي عالم حواء
ادعوا لي اخواتي ان ربي يسخر لي زوجي ويبعدها منه
والله يفرجها على كل المسلمين