زوجي يشك فيني وطلقني ..... ارائكم الحكيمة

السلام عليكم ورحمة الله وبركاته
بدخل في موضوعي ومشكلتي الكبيرة بدون مقدمات
وابغى ارائكم الحكيمة وشوفوا قراري الي أصريت عليه ومقتنعه فيه ....
انا متزوجة من ٨ سنوات وحامل حاليا ف الشهر السادس
أرجوكم لاحد يلومني ليش حامل لأني زي اَي بنت احلم بالاطفال وعائلة كبيرة لكن آمالي واحلامي تبخرت
طبعا حياتي زي حياة اَي متزوجين لاتخلوا من المشاكل والهواش بس زوجي كان يزودها دائماً
لاانكر بعض الايجابيات الي موجودة فيه بس للأسف بعد المشاكل الاخيرة ماصرت اشوف شي حلو فيه ابدا
اولا : دائماً يمد يده عليا ضربني ضرب مبرح وغير مبرح حتى لو حصلت مشكلة تافهه الاحظ انه ياخذ الموقف بعصبية زااايدة وتنتهي بالضرب ووصل الان الضرب لأطفالي وساروا يخافوا منه.
ثانيا : اكتشفت بين اغراضه حبوب غريبة وكتبت وصفها في النت وطلعت انها كبتاجون وهذا سبب تغييره معايا ومع الاطفال
ثالثا: مرة من المرات شفت في جيب ثوبه شي اسود مثل الصمغ ملفوف بورقتين وكان لاصق فيها وله ريحة غريبة وبشعه بس ماعرفت ايش هوا وانا شاكة والعلم عند الله انه حشيش ولقيت مرة أوراق خضراء في جيبها ورميتها ولما عرف عَصّب عليا 🤷🏻‍♀️
رابعا : الاهانات المستمرة قدام أهله وأطفالي لو اناقشه بموضوع بسيط واختلف معاه بوجهة نظره يقلب الدنيا عليا ويتهمني ب الغبية وانا مافهم
وصلت فيه انه مرة قدام أهله قذفني في شرفي ومد يده عليا قدام أمه وأخته 💔


خامسا والشي الجديد : انه صار يشك فيا شك ماهو طبيعي لما أتأخر في دوامي يشك اني مسويه شي غلط ويبدا سيل من القذف والسب والشتم وحتى اهلي يدخلهم ف الموضوع ويسبهم ويلعن فيهم ويقول عنهم انهم وسخين وماعرفوا يربوني ...!
وسبب طلاقي الان وطلعتي من بيتي هذا الموقف :


رحت أزور عمتي المريضة واستاذنته اني اطلع للسوق مع امي أخذ بعض الأغراض وقال لي طيب
رجعت البيت وتعشينا مع بعض وانا حسيت انه الجو متوتر وكنت ساكتة اغلب الوقت
لما جينا ننام : قال لي اليوم ايش فيك زعلانة قلت له كنت مضغوطة من كثر الشغل ومع الحمل بس دحين عادي تغير مزاجي قال لي انا شايفك عصبتي ع الاطفال وتكلميهم بأسلوب مو حلو قلت له عادي لان بنتي كانت تعاندني وهاوشتها ونسينا الموضوع ... مع انه يضربها ويضرب الي اصغر منها بس انا حسّيت انه يبغى المشاكل ف حاولت اني اسكت وقام يقولي الا اعرف ايش فيكي اليوم وانا اقول يابن الحلال مافيني شي كل مافي الموضوع متغيرة مع الشغل والحمل وقمت قلت له بصراحة زعلانة عليك امس قلت لي بسافر وطلعت من البيت الساعه ٨ والساعة ٣ رجعت البيت بدون ماتخبرني المدة ذي كلها
ملاحظة ( رجع البيت كان منظره غريب يابنات وعيونه محمرة وفيه ريحة غرررررييييبه وقووووية وانا شاكة انه يشرب من زمااان وأقوله عسى ماشر ليش ماسافرت أشر لي بيده وقال لي خلاص طارت وناااام ) انا شكيت ف الوضع وخفت مرة
تابع النقاش الي فوق قالي مالك شغل فيني أتأخر متاخر اسافر اروح اجي ولا انتي تشكي فيا عشان رحتي للسوق طلعتي وساختك انتي كم رجال نام معاكي هناك قال لي هيا صررررريحة وقام يسبني سب ويتكلم عليا وطلقني ....
وانا مارضيت اخرج من البيت
خرجت عنه من الغرفة لحقني بعدها بكم ساعة وصارخ عليا وقال انا طلقتك اطلعي من البيت الان ولو ماطلعتي اطلعك بالقوة
كان الوقت قريب من صلاة الفجر


انا طنشته و قفلت علي باب غرفة أطفالي ولما طلع الصباح رحت لبيت اهلي
وجىً ابوه يقولي ارجعي ويقنعني اني ارجع وأهلي يقولوا بس اصبري عليه المرة هاذي عشان الاطفال والي ف بطنك
وانا حالفة لو الي ف بطني رقم ١٠ مراح ارجع لواحد زي هذا ضيعت عمري إهانات وسب وضرب وشتم الين وصلت فيه يشك فيني ويبهدلني وفوقها يطلقني ويقول عند اهلي انا ماطلقت يعني حتى الدين يلعب فيه
وللمعلوميه حتى صلاة ربنا بالقوووووة يصلي وأحيانا يمر يوم كامل مايصلي ابدا
وانا قراري الأخير اني مارجع له لو ايش ماصار
والكل يقنعني بالرجعة عشان الاطفال وانا اشوف انهم يتربوا بعيد عنه أفضل من الضرب والتوتر الي عايشينه ف البيت
ايش رأيكم انا الصح ولا الي يقنعوني ارجع صح ،،،؟