زوجي يصورني و أنا نايمة/ استوفى الرد

السلام عليكم و رحمة الله و بركاته...
خواتي حبيباتي كيفكم طمنوني عنكم إن شاء الله إنكم بصحة و عافية؟.
حبايب قلبي إنتوا خواتي اللي ما جابتهم أمي مالي غيركم توجهوني و تفهموني...
من العنوان... زوجي دوامه شفتات و صار له تقريباً حول الاسبوع دوامه يبدأ من ١٠ الليل لين ٧ الصباح بالفترة اللي أكون فيها نايمة..
يا بنات أنا نومي خفيف حيل و بسبة هالشيء أقوم كثير و أحس بكل شيء حولي؛ لاحظت على زوجي يا بنات إنه لما يجي من الدوام و ينسدح جنبي...
يحرك جسمي على وضعيات مختلفة و يصورني و أنا بلبس النوم و غالباً يطلع أجزاء من جسمي!!!
بنات أنا أفتح ابجورة غرفتي ف عادي الكاميرا تكون واضحة عنده و يقفل صوت الجوال عشان ما يطلع صوت الكاميرا لما تصور لين مرة بالغلط نسى نفسه و كان مشغل الفلاش و طلع الفلاش قوي و قمت عليه لقيته مصور جسمي بوضعية معينة و أول ما شافني قمت اختبص و سكر جواله!!!
قلت له ليه تصورني قال لي يعجبني جسمك و أبي تكون لك فيديوهات عندي بالجوال! طلبته يمسحها و رفض و عصب يقول لي انا زوجك ليه ما تبين يكون لك صور لجسمك عندي بالجوال!
والله يا بنات لي أيام مو قادرة انام من قوة التفكير و المشكلة إنه متغير علي حيل حتى حقي الشرعي بالفراش "عذراً" ما آخذه إلا والله و بدون مبالغة بالشهر مرة اذا ما كان شهرين كمان والله يا بنات و أنا صادقة عند ربي!!!
تكفون ريحوا قلبي! هل في أزواج عادي كذا يصورون زوجاتهم ولّا لا!!