نوكية @noky

عضوة فعالة

زوجي يعايرني لأني كنت عايشه في البر << مُـعــدل

السلام عليكم

حكايتي اليوم حكاية .. وليست مشكلة لاني عارفه انا مين .. لكن احيانا ينتابني ضيق من هالسالفه ..

اولا يا بنات لا يروح بالكم بعيد وتصدقون اني كنت بدوية .. صحيح البدو على العين والراس ومافيهم شئ .. لكن السالفه فيها تقليل من القيمة وليست من قيمة البدوو ..

انا ولدت في مدينة من اكبر المدن في السعودية واهمها

عشت طفولتي بين حوايرها ودكاكينها وعمايرها ..

لحد ماصار عمري 6 سنين

اتذكر ابوي كان في وظيفه مرموقه واتذكر اننا كنا مرفهييين كثير .. كنت البس القصير مع انها كانت شئ نادر في الثمانينات .. ولا يلبسه غير الكشخة .. وابوي بنى لنا بيت كبير وفخم يطرق فيه الخيل

وكنا قبل في منزل عمي اللي مو اقل من ابوي .. مالا وعز .. ماشاء الله .. وكانوا قليل في جماعتنا اللي كذا بذاك الوقت قليل مره اكثرهم فقارا وبيوتهم على قدهم .. شعبيه ,,ومكشوفه ..

المهم
اتذكر ان ابوي ماادري وش صابه وانا صغيرة وترك الوظيفه .. وتراكمت عليه ديون .. وعرض البيت الكبير للبيع وباعه
اتذكر امي وهي زعلانه ان ابوي باع البيت , ورحنا سكنا في بيت شعبي في حي شعبي .. واصبحنا فقراء جدا حتى ملابس العيد احيانا ما نشتريها وابوي صابته حاله نفسيه .. شكلها عين

بعدها ابوي اشترا غنم كثييرة جدا وقال بنروح نعيش في البر
وانا وقتها كنت صغيره مادخلت المدرسة

بكت امي ورفضت اختى الكبيرة تروح وهربت لبيت جدتي قالت بعيش مع جدتي وعمي .. كانت اختى بالمتوسط .. ووافق ابوي بشرط انها لازم تجي بالاجازات

هالكلام قبل غزو الكويت بثلاث سنين ..!

اشترا لنا ابوي خيام

وطلعنا للبر وسكنا جنب ناس بدو من اقاربنا

المهم انا صرت بدوية صغيرة .. بعد ماكنت البس القصير وادور بشوارع الحارة اشرب غوار

صرت اللبس طرحة ومعي عصى وغضارة واحلب الغنم .. واشب النار .. وامسح السراج قبل الليل .. واساعد امي .. وانا ماصار عمري سبعه سنين ..

عشنا بدوو
نخض السعن ونطلع الزبده واخواني اللي كانوا يتفرجون على عدنان ولينا وقرانديزر .. صاروا رعاة غنم وابل .. ويدرسون الصباح في قريه قريبه مننا واذا جو من المدرسة تغدوا وراحوا يسرحون في الغنم على الددسن ..
جلسنا على هالحال سنة ونص ..
وابوي متقلب المزاج ونفسيه ..

مل ابوي من حياة البر .. وقررنا نرجع للمدينة اللي كنا عايشين فيها

فرررحنااا فرح شديد جدا وطرنا لاننا بندخل المدرسة .. انا واخواتى الصغار
ورجعنا للمدينة
انا كان عمري وقتها ثمنيه سنين
ودخلت المدرسة وكنت شااااااااااطرة جدا جدا ماشاء الله

المهم اننا كملنا حياتنا طبيعي بالمدينة على الرغم من فقر ابوي .. اشتغل بالليل بالعسه ..
وعشنا في بيت صحيح مو كبير بس حلوو حتى لو انه شعبي ...

وجاء نصيبي وتزوجت زوجي ..
وبحكم انه من الاقارب , عارف اننا كنا ساكنين في البر

وام زوجي بعد

بسسس اهل زوجي وام زوجي ساكنيين بقرية من يومهم بسس متحضرررين جدا جدا .. يعنى كانهم عايشين في المدن وافضل من بعض اهل المدن في التحضر ..

بسسس ام زوجي من يوم جيتها معتبرتنى بدوية .. بدوية خاالص وما اعرف من التحضر شئ .. وشايفه نفسها علي ..
وكانت تحكي لنا انا وبناتها الكبار بناتها بعضهن اعمارهن اربعين سنة وانا وقتها كان عمري 20 سنة

كانت تحكي لنا عن القصص القديمة والبدوو اول

وكانت تشررح حاجة تحط على الحمار وانتم بكرامة

وهي تششرحها التفتت حولي وقالت :: طبعا انتى تعرفينها ما يحتاج اشرحها لك .. انا انحرررجت وبقوووه وصار وجهي زي الجزمة .. واشلت بخاطري شوي .. وانحرجت بقوة .. بس بلعتها وسكت ..

وزوجي اذا ابديت رااي بشئ او قلت شئ عن الحضارة والتحضر .. قال وشش عرفك انت ؟؟ خابركم في البر ..؟ في المنطقة الفلانيه
اقسسم بالله يا بنات كاني مصبوب علي مويا حاااره من الحرج
واقوله مااتذكر هالشئ كنت صغيرة .. قبل ادخل المدرسة ..

المشكلة امي على نيتها ماهي قادرة تنسى انها عاشت في البر سنة ونص

دايما تذكر لام زوجي مواقف وسوالف يوم صارت لها في البر ذيك السنين

وام زوجي تفرررح وتستغل هالفرصة في تجريحي

مع العلم ان امي عاااشت في البيوت الكبيرة والفخمة وكانت تسولف حتى بالتليفون الثابت ... !! وام زوجي في هذاك الوقت عايشه في الطين بيت الطين ..

هي مجرد حكاية وقصة

وارجوكم لاتكذبوني لانها فعلا حقيقية وليست من خيالي

انا عششت الحضارة بكل تفاصيلها وعششت البداوة بكل تفاصيهاا :2thmup:

21K

يلزم عليك تسجيل الدخول أولًا لكتابة تعليق.

تسجيل دخول

nada 1410 • 10 سنوات

ياحليلك انا اتزوجت بدوي مع اني ماني سعوديه لكن حبيت زوجي واللي جذبني فيه بدواته مع العلم ان زوجي مثلك ما عاش في البر كثير يمكن وعمره 4 سنوات انتقل للمدينه لكنه مفتخر ببداوته واذا صار رومانسي اخذني للبر وشب الحطب وجلس يقول شعر لا تستعري من هالشي حتى لو مانتي بدويه بالعكس افتخري انك جربتي كل حياة الحضر وحياة البدو واتفاعلي مع ام زوجك وبيني ان هالشي عادي

ام كآدي • 10 سنوات

لاتزعلين انتي اللي حساسه زياده عن اللزوم
وماتبين طاري البر
خلي عندك ثقه بنفسك وهذي الدنيا يوم لك ويوم عليك
ولو منك اذا جاء طاري البر اقول يازين البر احلئ ايام
مرت علي
بالنسبه لي اموت ع البر والخيام ولو بكيفي عشت
بخيمه وحلال وماشوفها عيب

lena93 • 10 سنوات

الحل انك ماتسكتي
ووقفي الي يجرحك عند حده
مابي احرضك ع اهل زوجك
بس تعلمي فنون الرد
الناس اللي تتمسكن خلاص ماتو

خليك قويه

زي ماقالت لك الشغله الي ع الحمار
كان قلتي انتو تعرفو اكثر مني بحكم طول عمركم ب قريه
واغلب سنيني ساكنة بالمدن ماشاء الله عليا وضحكتي هههههههه كان شفتي كيف بتنقهر

شكلها من النوع المريض الي يحبو يشوفو الناس منكسرين

وخير ياطير ؟؟ وشفيها البر صحيح العيشه ماتتقارن بالمدينة
بس ليش مصدومه وزعلانه هذي الحقيقه تقبليها ولو كانت مره

كمان زوجك بالمستقبل اذا قالك وش عرفك
قولي خير ماخذني من ملجأ كل شي عارفته ع اساس انك ساكن ب امريكا ومتحضّر كلنا بالهوا سوا:S_45: واضحككككككككي

لايعرفون نقطة ضعفك
مع انها مو ضعف
بس انتي طيبه حيل والناس مابترحمك

والي فات مااااااااااااااااااااااااااااااااااات
تغيرت الاحول
ودوام الحال من المحال
ماحزني بالقصه غير ابوك الله يرحم حالها .. عين حسبي الله ع الناس الي تشوف ولاتسمي
لازم التحصين :(

pink fo0ofo0o • 10 سنوات

وعليكم السﻻم

.خﻻص ياحبيبتي انسي الماضي بحسب كﻻمك الحين عمرك حول الستين ﻻن غزو الكويت له تقريبا 23 سنة وقلتي هالكﻻم قبل الغزو بثﻻثين سنة يعني ماضي واندفن ويمكن ام زوجك توفت سامحيها دامها بقبرها

وزوجك ﻻقال شي افتخري بشجاعتك قدام اوﻻدك بايام ماكنتو بالبر ﻻتستعرين من هالشغلة موعيب

اغلب الجزيرة العربية من ستين سنة بيوتهم بين طين وﻻ بيوت شعر

(فيء) • 10 سنوات

حياتك كانت حلوه ومافيها شيء يفشل بالعكس المفروض ماتزعلين ولا تنحرجي بالعكس احكي له إنها كانت ايام حلوه وما تعوض على شان ما تكون نقطة ضعف يستغلها في رفع ضغطك ،، وبرضوا اللحظات الحلوه الي تذكريها احكيها له ولعمتك وكيف إن أبوك كافح وما استسلم وبكذا صدقيني ترتاحين