يازين البدو ويازين حياتهم البسيطة الرايقه ،،، المشكلة فيك مو في عمتك ،،، خجلك من حياتكم في البر جعلهم يستنقصونك،،،المفروض ماتورينهم انك متضايقه من ماضيكم ،،، بل بالعكس تذكرين الجمال اللي فيه بعيد عن المدن وتكاليفها وضجتها و زحمتها،،حبيت أصحح لك كلمة (يسرحون) : ) أنتي تقولين اخواني كانوا يسرحون بالغنم بعد ما يرجعون من المدرسة وهذا غلط ،،، يسرح بالغنم معناها انه يذهب بها للمرعى في اول النهار يعني من فجة النور وعكسها كلمة( يضوي) اي يعود بها في اخر النهار مع غروب الشمس،، شفتي كيف أني اعرف كلمات البدو وانا ما عشت بالبر بس أسمعها من قرايبي وهم يحكون لنا عن حياتهم اللي عاشوها في البر يحكون لنا عن جمالها واصالتها ،،ايش كانوا يشتغلون وايش يعملون وايش كانوا ياكلون ،،،يحكون لنا وهم كلهم فخر بماضيهم اللي من كثر جماله بأنفسهم انعكس علينا فصرنا نشوف جماله مع اننا ما عشناه

قولي :
إيه بدويه ريحتي بن وبهار = هذا شرف ماهو بحقي خطيه
أنا بدويه بنت حرٍ من أحرار = فزعات ربعي بالشدايد قويه 
أنا هلي يا بنت وافين الأشبار = كانك جهلتي من أنا يالغبيه
يابنت لو بكتب من أشعار أشعار = تعجز معاني حوفي الأبجديه 
اللعب خلي اللعب لعيال شطار = لا تدخلين السيل وأنتي نديه 


المعذره على الاطاله أهم شي خلي ثقتك بنفسك قويه وطنشيهم والبداوه مو عيب

ردي عليه قولي ايوة بدوية بدوية كشخة ايش عليك لا توضحين له انه انكسر خاطرك كل ماقال لك بدوية نطي من الفرحة وقولي الله على ايام زمان حياة بسيطة وحلوة اذكري محاسنها بيصير مايعتبرها سبة لانه يبغى يقهرك بيروح يدور على غيرها

ثاني مره لحد جاب سيرة البدو سوي نفسك مبسوطه وقولي احلا حياه ياليت ارجع وكل شي تعرفينه قولي اعرفه ترا عيشة البدو عز وقعدي امدحي فيها اخر شي بيسكتون عنك قولي اهم شي الذكا والفطنه كنت شاطره بالمدرسه وقعدي كل شوي امدحي بنفسك وفتخري في البداوه وشوفي كيف راح يعاملونك وبعدين بلبسك دايما خليكي اناقه ببشرتك لبسك كلامك ولاتخلي احد يقلل قيمتك واهتمي بعطورك كريماتك احذيتك الله يكرمك وادق التفصيل بس بنعومه واحتشام ورقه في الكلام والمعامله مع الناس

لاتزعلين انتي اللي حساسه زياده عن اللزوم
انا احب البر واغليه واحلا اوقاتي وقت اطلع البر
هل صار عيب اني اصير بدويه ولو فرضت اني ماصرت ماراح انكر ان اجدادي كانوا بدو

زيدي ثقتك بنفسك عن طريق اخذ دورات تطوير الذات وثقفي نفسك وتعلمي
وخالطي الناس وتاكدي تماما شخصيتك بتتغير
اشغلي نفسك بحفظ القران عوضا عن التحسس من الناس