زوجي يقول لا تذكريني بذيك الأيام ..ليه ؟

السلام عليكم ورحمة الله وبركاته
حبيباتي الحوائيات أحب أشكركم كثير على نصائحكم اللي استفدت منها ...واليوم عندي مشكلة غريبة أحب أسمع رايكم فيها ..
حياتي مع زوجي الحمد لله مثل اي حياة تجي ايام حلوة وأيام تعيسة ..وفي الأيام التعيسة يصير والعياذ بالله كأنه عدوي مو زوجي ..وفي الأيام الحلوة لو تشوفونه كأنه بيموت من حبه لي ..أحبك أموت فيك أنتي نعمة من ربي أنتي مافي مثلك انا محظوظ ..بس صرت ما أصدقه ولا أفرح بكلامه ..
المهم ...مرة من المرات في الأوقات الزينة يعني مو التعيسة ..تكلمت معه عن ذكريات شهر العسل فصدمني قال لي كلمة قتلتني وما أدري ايش يقصد بها ..قال : لا تذكريني بذيك الأيام ما أحب أتذكرها ..قلت له : ليش ؟ قال : بس ..
ومن يومها يابنات وانا كل ما تذكرت كلامه أحس بغصة في حلقي ....
أكيد مشكلتي غريبة صح يابنات ؟والا في وحدة مر عليها شيء زي كذا ؟
مع انه كان في حالة رضى يوم يقولها ..وزي ما قلت لكم إذا كان راضي كله يمدح فيني ويبالغ بعد ..
وأحب أقول لكم أن زواجي كان بأسهل الظروف مهري كان قليل وسفرتنا كم يوم داخل المملكة وكنت خجولة جدا ولا لي طلبات وكل ماقال شي : سم طال عمرك ..وكان مبسوط مرة ذيك الأيام ..
يعني ايش تتوقعون سبب الكلام اللي يقوله لي بعد هالسنين كلها ؟
الله يوفق كل من ترد علي ويسخر لها زوجها وإذا مو متزوجة جعل ربي يزوجها الزوج الصالح اللي ما يزعلها أبد ..