زوجي يقول لي انا وانتي ماننفع لبعض

السلام عليكم ورحمة الله

بنات انا عندي ثقه كبيره بأفكاركم وعقلياتكم وحابه استشيركم بموضوع حساس جدا

ونفسيتي منه تعبانه مر شهر رمضان وانا يوميا افطر بدموعي يشهد الله ان عدد الايام اللي فطرت فيها وانا مرتاحه ماتتجاوز عدد اصابع اليد الوحده


انا متزوجه من فترة ماتتجاوز السنه وبيني وبين زوجي فرق بالعمر مايقارب 12 سنه مشكلتي معه هو

الواضح انه تزوج بس عشان يجرب الزواج واسم انه خاض التجربه خاصه انه ماتزوج الا باخر الثلاثين والظاهر انه بس يبي يوضح للناس انه قادر يتزوج لكن فعليا هو مايبي ارتباط

هو ابدا ماهو متمسك فيني ولا بهذا الزواج طول الوقت من بداية زواجنا الكلمه اللي يرددها انا وانتي ماننفع لبعض والله العظيم تو متزوجين مالنا الا شهر مابعد شاف زيني من شيني يقول لي هالكلام ويكرره والى الان وانا اعاني من هالموضوع معه على كل هوشه تصير بيننا يقول لي نفس الكلام واجلس اترجاه واقوله انا احبك وابيك
اقسم بالله لو نختلف على قارورة مويه بالنهاية راح نوصل لنفس الموضوع وراح يقول لي انا وانتي ماننفع لبعض وحنا مو اول ولا اخر ناس انفصلنا وانا بجلس اترجاه وراح تنعاد القصه

طبعا اكيد راح تقولون لا تترجيه وهو ماتصرف كذا الا لانه عارف انك راح تترجيه لكن هذا مو صحيح

كم مره يوم قال كذا ماترجيته وقلت له اوكي طالما هذا اللي تبيه هو مره عادي عنده ومافرقت معه قال اوكي اجل رتبي اغراضك عشان اوديك بيت اهلك ولو سمحتي لااحد من اهلك يتدخل لاننا اتخذنا هالقرار عن قناعه !!

شوفتوا كيف ماتفرق معه !!!!

وبأخر لحظه رجعت اترجاه عشان ماننفصل !!!

انا مو قادره اعيش معه بطبيعتي ماني قادره اعيش بأريحيه مثل ماانا اذا كنت زعلانه لازم اتكتم على مشاعري ومااظهرها لاني لو اظهرتها راح تصير مشكله وبالنهاية راح اسمع نفس الكلام والله حتى اذا جتني الدوره مااقدر اعيش مثل اي امرأه بطبيعتي ومزاجي مقلوب لازم اتظاهر ان مافيني شي وانا هموم الدنيا فوق راسي
اذا غلط بحقي مااقدر ازعل او اعتب لاني لو زعلت راح تصير مشكله وبالنهايه راح اسمع نفس الكلام

حقوقي ضاعت ونفسي ماهي نفسي مااقدر اعبر عن رغباتي وخياراتي لان مجرد ماتختلف عن رغباته راح تصير مشكله وراح اسمع نفس الكلام وحتى اذا زعلت وكان الموضوع قوي من حقي ازعل منه يقلب الزعل عليه وهو اللي مايكلمني بعدها يجي يقول لي نفس الكلام


انا قاعده اضغط على نفسي والله العظيم اني اعاني واحس اني ذليله كل مره يقول لي انا وانتي ماننفع لبعض واجلس اترجاه لاني ماابي الانفصال

انا ماني عارفه هو ماهو مقتنع فيني انا كشخص والا موضوع الزواج كله مو مقتنع فيه بس اللي متأكده منه انه طول الوقت يبي ينطلني عند اهلي طول الوقت يقول لي روحي لاهلك خلك عند اهلك نامي عند اهلك وهذا الكلام من بداية زواجنا


انا دخلت على الله ثم عليكم شوروا علي وش اسوي والله انا ماابي الانفصال لكن ماني عارفه كيف اسوي تعبت من هالحياة اللي كلها تهديد وترجي

بالله شوروا علي وادعو لي بتفريج همي