استخيري
لكن اتوقع زوجك عنده خلل في شخصيته

حبيبتي دام مافي بينكم عيال

خربيها قبل ماهو يخربها على راسك

تعيشي عنده طول عمرك مذلولة ومهانة وفي الآخر هو بيرميك لو مو اليوم بكرة لانه بايع

اليوم وانت خفيفة وبراسك وماوراك اولاد يذلك ويوجعك بهم اقلبي السحر على الساحر وقوليله انا مابيك وماتحملتك طول السنة اللي راحت الا لأني مشفقة عليك وعلى حالك من بتقبل بك من بعدي .... انت مب كفو واللي مثلك مايستاهل اللي مثلي
والله بيرزقك باللي من نفس طينتك .......اما انا ماأعز مني عند اهلي وما أغلى

ولمي اغراضك وخليه يوديك بيت اهلك

على رأي المثل :اهلك يحبوكي غنية .....وزوجك يحبك قوية

الحرمة اللي تنذل بعض الرجال يحطوها على رؤوسهم وبرحمو حالها وضعقها وبعض الرجال لما تدوسي عليه يرتاح يببسط ولو ضعفتي قباله يتنمرد عليك حسبي الله عليهم

قال رضينا بالهم والهم مارضى ينا .........والله نتحملهم لأجل عيون عيالنا الله يكتب الأجر

واللي يبيعني ماشتريه ولو بتراب

لا تقولي اني ابغى اخرب بيتك لا والله انت اخت ونصيحتي لك لوجه الله .....صحيح ان الله مبشر الصابرات بأجر عظيم ..... بس هذا بايع بايع ............بس مستني انك تعطيه حجة ....... وانت عشان تفوتي عليه كابتة نفسك من كل حقوقك......لين متى ؟؟؟لين يجيك مرض نفسي الله يبعد عنك وعنا

وابنك على ماتربيه وزوجك على ماتعوديه

شوفي اختيروحي عند اهلك روحي احسن لك قبل ما يجيكي ولد او بنت وتبتلشين فيهم روحي احسن

السلام عليكم

الله يهديه و يصلحه و يصلح حالكم

بقولك حبيبتي انا نفسك تقريبا .. زوجي والله نفس الاسطوانة ..

كلمة هذا انا ,عاجبك اجلسي مو عاجبك قومي لمي اغراضك و اوديك بيت اهلك ..

مثلك كنت اخاف من الطلاق .. لأني حامل للاسف !!

لكن الفرق انا ما اترجاه, يخسي رجال ارتجاه عشان يخليني وياه, بس ما انجرف وياه , اذا هو سفيه , انا مو سفيهه , لو بتطلق مابي اتطلق في وقت فورة غضب,ابي اتطلق في هدوء نفسي و بعد ما استنفذت كل الخيارات الممكنة للاصلاح عشان مايجي يوم و اندم , و لانه دايم لما يقول لي هالكلمة يكون معصب , انا ما اعطيه وجه لاني احس انه مو بوعيه حتى لو يبين انه صاحي
ابيه يقولها لي و هو بكامل قواه العقلية ,بس ما قالها

و قالها لي و انا حامل .. لا تفكرين ان الحمل بيمنعني اني افكر في طلاقك , حتى لو عندنا بدال الواحد عشرة طلقتك !!!

هذي آخر مرة فتح لي هالموضوع بهالطريقة ..

و كان قبل رمضان تقريبا بشهر , وقتها حسيت انه سخيف و غبي و مو عارف وش قاعد يقول .. قمت و تركته يولي جلست بغرفة النوم و سكرت على نفسي ..


لكن قبلها بشهرين تقريبا كنت رايحة بيت اهلي و جلست فترة عشان هالمشكلة .. اول شي طنش و انا طنشت بس بعدين لما عرفت امه _ والله انها طيبة و بنت حلال بس ما عرفت تربي عيالها _ المهم انها اتصلت علي و ترجتني ارجع له .. و كلمته و خلته يعتذر لي .. المهم و رجعنا ..

لكن نفس الشي بو طبيع ما يجوز من طبعه .. و صارت الكلمة اللي قلت لك قبل رمضان ..

كنت ناوية بيني و بين نفسي اني اعطيه مهلة شهر واحد بس .. اللي هي فترة رمضان المبارك .. ان عادها فهذا فراق بيني و بينه و طز في الولد اللي بيجيني منه , اذا هم مو مهتم ليه اهتم , مع انه يصعب علي احيانا طفلي , بس ماراح اسمح اعيش انا وياه بذل و هوان ..

المهم جلست مع زوجي جلسة صريحة , صارحته و قلت له انه لو يعيد هالكلمة مالي قعدة وياه بالبيت ولا دقيقة ولا راح امزح ولا اسامح , هو جلس يبوس في ايديني و يحلف انه يحبني و انه ما يقصد اللي قاله وانه يقوله بس لما يكون معصب .. انا قلت له 99% من العالم المتزوجين تصير بينهم مشاكل بس مافي رجال كفو يهدد مرته .. تمن علي يعني تزوجتني؟ .. انت تعرف اني حتى بدونك اقدر اعيش حياة كريمة بدون ما احتاج لاحد ولا راح اوقف عليك _ انا موظفة و راتبي قوي و كمان جميلة_

فهمت امه بعد انه شخص مو متربي _احس اول مرة اتكلم بهالجرأة مع مرة كبيرة_ , المهم قلت لها انتو يومن جيتوا خطبتوني من بيت اهلي ابوي قدركم و كرمكم و اعتقد انه عطى بنته ناس بيعاملونها مثل بنتهم , مو واحد يفكر الزواج لعبة و بنات خلق الله يلعب فيهم زي ما يبي .. قلت لها عشان اذا صار شي لا تلومني باي تصرف اسويه , ولا تترجى فيني ..

المهم خلال فترة رمضان .. ماعطيه وجه حيل .. كنت اجازة فكنت اسوي شغلي و اطبخ و انظف بعدها اجلس عند التلقزيون شوي بعدها اخليه بروحه و اجلس على النت اسوي اشياء انا احبها ..

والله العظيم انني خلال هالشهر اني ماشفت منه الا كل خير , قليل نختلف و اذا اختلفنا ما يجيب هالطاري ابددددد, مع اني في داخلي اكون متوقعة انه يقول شي زي كذا , و بنفس الوقت اتجنب اني اخليه اعصب لدرجة انه يطلع من طوره ..

الى الان اوضاعنا الامنية مستتبة , حسيت بعد رمضان صار يحس بقيمتي في حياته اكثر , يحس انه شي يفقده اذا اروح عنه , لدرجة اذا انشغل عنه يجي يناديني قومي جلسي وياي نطالع هالبرنامج ولا خرابيط , كمان بالليل انا ما انام على طول اجلس احوس بجوالي شوي و فيس بوك ومسن بعدين انام , صار يقول خلااااااص عاد خلي عنك هالاشياء و خليكي معاي ..

ممكن تكون هالتطورات ايجابية , لكن الشي اللي مايعرفه هو , اني بالفعل احس بكرهـ ناحيته , احس ذلني و ابغى اذله ..

<<< وحدة حقودة خخخ

يمكن في فترة من الفترات هو يقول لي بطلقك بسهولة , اللحين انا اللي من يسوي شي مالي خلقه صرت اقول له طلقني , هو يضحك و يقول خلااااص عاد عقلي يا بنت ترا السالفة ماتسوى

تدرين اني اكره كل الرجال السعوديين , لو بيدي امحيهم من على وجه الكرة الارضية

احس شايفين روحهم مدري على ايش , والله لو بيدي اربطهم في سيارة غمارتين يسوقها هندي مسطول و اخليه يحوس فيهم و يسحب خششهم على الزفلت لين يقولون آمين بعدين ارميهم برا مجرة درب التبانة <<< الحمد لله ان الموضوع مو بيدك ههههه

حبيبتي انا قلت لك قصتي و نشرت غسيلي عشان تستفيدين .. هذول الرجال و اسمحي لي بهيمين

ماينفع وياهم ضعف .. خلك قوية , خليه يعرف انك ماراح تموتي بدونه .. و طز فيه وفي اللي جابوه يالله يعرف قدرك

زوجي و زوجك من هالنوعية اللئيمة اللي مايجون الا بهالطريقة << ملاحظين اني مزحفة زوجي , بس والله من قهري عليه , هو اللي وصلني لهالمرحلة , و لما صار هو زين و كويس معاي , انا وش يمسح الاشياء اللي تراكمت بقلبي عليه

الله يكون بعونك ياقلبي ويختار لك الي فيه الخير يارب

انا من رئيي اذا ماعندك عيال منه انفصلي وبيعوضك ربي بالي افضل منه ان شاء الله