زوجي يمن علي!

السلام عليكم ورحمة الله وبركاته!
انا توني عروس مالي ٣ شهور!
المهم ان طفشت من المشاكل مع زوجي من الملكه!
عشان تكونون بالصورة!
المشاكل كلها بأسباب تااافهه جداً!!!
يعني يسوي مشكله ان والله ليه ماطبختي؟
ليه ماحملتي؟ ليه ماتلبسين العبايه الفلانيه!
ليه تلبسين لقينز؟؟ تخيلوا يزعل ويتمشكل على هالاشياء التافهه!!
المهم وكل بين فتره وفتره يمنّ علي!
مره يقول ليتني ماسويت العرس مغير دفعت على الفاضي؟
مره يقول ليتني ماستاجرت فندق ليلة العرس ماااله داعي؟
مره يقول ليتني ماتزوجت الحين،ياليتني قعدت عزابيّ؟
انا ردودي عليه دايماً!
( محد جبرك،،وقالك تعال وخذني وتزوج انت جيت برجولك )!
طبعاً مره سمعته يتكلم بالجوال ويقول لخويه لاتتزوج الحين! احسنلك فلها وسافر وإذا وصلت الثلاثين تزوج!
< طبعاً انا زعلت وقلت له وش بيفهم قصدك من هالكلام؟ بيفهم ان مو مرتاح مع زوجته صح ولا لا؟
قال لا انا مو قصدي كذا قصدي له لاتتزوج وعليك ديون!
المهم! مشت الدنيا! وبعد شحاذه دامت شهور جاب لي جوال ايفون!
والله يابنات أني ما اطلب واني دايم ساكته وطيبه
وبالعكس!! وماعمري طلبت منه وإذا طلبت ومامعه
أقول له خلاص مو لازم بعدين !!
المهم مشت الدنيا،، وأنا إنسانه تعبانه من اسناني!
اسناني عقده،،وتألمني مره رحت الدكتوره وسوت لي حشوها ضرسين ومن بعدها صرت لأكلت يعورني مره
ومقدر اكل ونفسيتي تعبت منها مره شي يتعب النفسيه
وكلها اسناني خربانه وصرت ابكي منها! المهم قلت له اليوم بروح لدكتورة الأسنان تشوف وش الوضع؟
المهم بعد مارحجعنا منها قال انتي وشفيك مزاجيه
قلت له والله اسناني قالبه مزاجي آلم ولاقدر اكل!
غصصب نفسيتي تقلب!! قال لا فيه شيء ثاني؟
قلت والله مافيه شيء ثاني بس والله سنوني متعبتني مره و ودي اسويها بس مافيه مبلغ💔!!
المهم قال والله مدري وش اسويلك انتي ومزاجيتك وقال:
( جيت واخذتك وعطيتك مهر ولعبتي فيه وتكاليف ودنيا والحين جبت لك جوال وأخذت جوالك القديم الخرابه وكل هذا مانفع فيك )..
قلت لحظه وش دخل هالكلام وش جاب طاريه؟
قلت أولاً إذا على الزواج فـ مو انا اللي جيتك وقلت لك الا وتجي تأخذني! انت جيت برجولك لبيتنا وخطبت! محد جبرّك!!
ثانياً المهر اللي تقول لعبت فيه مالعبت فيه! كلها ٤٠ الف ٢٠ كلها راحت بـ ذهب والعشرين الباقيه حجز مصوره! وفستان وملابس ومكياج وعطور وصندل! وعبايات وساعات وبجايم واشتريت منها هديه لك ومانسيتك وانت
الحين جايّ تمنّ علي عشان جبت لي جوال؟
الجوال ترا مو شيء خارق عن العاده؟ والمفروض
تجيبه لي من بكرية العرس! وهذا اللي تسويه كل الناس!
كل الرجال يجيبون لحريمهم جوالات وذهب وألماس بعد!
وماقاموا يمنون عليهم ويقولون حنا سوينا لكم وجبنا لكم!
خلاص مابي منك شيء ولاعاد تجيب لي شيء!
دام ان هذا أسلوبك!! تقعد تمنّ مابي منك شيء!
والجوال والله لايرجعلك وماحطه بيدي مره ثانيه!
انقهرت وتعبت والله من اول ماتزوجت وأنا مشاااكل!
تعبت خلاص نفسيتي صفررر! مدري شسوي؟