زوج اختي انتشلني من الانحراف ، قصه كتمتها 13 سنه/ قديم

بسم الله الرحمن الرحيم


اخواتي انا عضوه جديده لكن متابعه للمنتدى من سنوات واستفدت منه كثير ، قررت اخيرا اني اسجل واشارك وحبيت تكون اول مشاركه لي هي اني اذكر قصه كان لها اثر كبير في حياتي كتمتها عن الكل ولازالت في الذاكره بعد مرور 13 سنه ع القصه لكن هالقصه او الموقف كان له دور كبير بتغيير مجرى حياتي كله لانه حصل لي وانا كنت مراهقه في سن 16 ولولا رحمة الله ولولا الموقف اللي صار كان ممكن تكون حياتي كلها مختلفه

كنت في اول ثانوي واختي اللي اكبر مني تزوجت وانا كنت بالاول متوسط ، تزوجت اختي شخص عاقل ومتعلم وله احترام وتقدير وهيبه عند الناس وكانت اختي فرحانه كثير معاه وكان حنون ورحوم ويحترمها جدا وكانوا كل اهلي يمدحونه ، شفته اكثر من مره وكان شخص انيق ووسيم وبحكم اني مراهقه كنت كل ماينذكر طاريه اشوفه يكبر بعيني وانجذب له واحنا ماعندنا اخوان ولاعيال عم وكان هو اول رجال اشوفه واشوف شخصيته من قريب وبحكم اني مراهقه ومااعرف وانجذب لوهم العواطف اللي احس فيها حسيت ان قلبي دق له وكل يوم احس بشعور غريب له
مااطول عليكم القصه بعد ماصار عمري 16 ماكان عندنا جوالات كنت اتصل عليه من الثابت وانا ادري ان ماكان عندهم كاشف رقم كنت ابي بس يرد اسمع صوته ولما يرد اسكر السماعه ومره بعد مره لين تشجعت وتجرأت وتكلمت معاه كان يسكر السماعه بوجهي ويصدني وماكان يعرف من انا
ماقدرت اصبر اكثر من كذا وقلت لازم اعترف له بمشاعري ويصير اللي يصير فعلا كنت جاهله ومراهقه ومندفعه جدا المهم كلمته وقلت له انا فلانه وانا احبك
رد علي بكلام كثير هو اللي صحاني من الوهم اللي عايشه فيه وعلمني وانتشلني من ضياع كنت على وشك اني راح انجرف فيه لو مو معاه مع غيره قالي كلام غير مجرى حياتي وخلاني اتغير 360 درجه والله يابنات اني كاتمه هالموقف من ذيك اللحظه لكن هالموقف فعلا هو اللي تسبب اني اتغير واشوف الدنيا والناس بشكل مختلف وخلاني اتفوق في دراستي لين نجحت وتخرجت من الجامعه امتياز
ابرجع واقولكم تكملة الموقف
لما قلت له انا فلانه واحبك وكذا قال لي كلام كثير اللي اتذكره منه انه قال يابنت الناس انتي مشاعرك هذي وهم لازم تشيليها من راسك وتنتبهي لنفسك لانك بنت ناس معروفين ولو الكلام اللي تقولينه لي وجهتيه لشخص غيري كان استغل هالشي ضدك حتى لو قالك انه يبادلك نفس الشعور ومهما قالك احبك تراه يكذب ، انا رجال واعرف تفكير الشباب بهالايام راح يتسلى في مشاعرك كم يوم واذا زهق راح يسولف فيك عمد اخوياه لين تصير سيرتك على كل لسان
انا ماراح اقولك ان هذا حرام وكذا وماراح اذكرك بالحلال والحرام لان هذا بينك وبين ربك والمفروض انتي ادرى مني بهالشي لان يوم الحساب محد يهمه الا نفسه لكن انا يهمني ابوك ، والله لو تشوهت سمعتك عند اي احد انه راح يوطي راسه عند الناس وهو اللي مجلسه عامر وكل الرجال تحسبه الف حساب وانا متأكد انك ماتحبين تشوفين ابوك ينهان قدام اللي يسوى واللي مابسوى
واهلك اللي الكل يذكرهم بالخير والطيب وش يكون موقفك لو صترت سمعتكم بالتراب بسبب لحظة طيش او وهم
لاتحسبين اني اقولك هالكلام لاني خايف عليك او كذا انا اقول هالكلام لانك خالة عيالي وابوك جد عيالي ولما تتشوه سمعتكم تتشوه سمعة زوجتي وعيالي وانا
يابنت الناس اللي يحبك مو الشخص اللي يقولك بالتلفونات انا احبك حتى لو اعطاك الشمس بكف والقمر بكف
اللي يحبك هو اللي يجي عند ابوك ويطق الباب وياخذك على شرع الله وسنة رسوله
لو انجرفتي ورا اوهامك وسوالف البنات اللي بالمدارس والله ماراح تتهنين لاانتي ولااهلك وراح يبقى هالشي معاك مو بس بحياتك
راح يبقى معك حتى بعد ماتموتين في كل شخص له صله فيك
انا اقدر الحين اسكر السماعه بوجهك ولاتهميني بشي ابد
لكن قلت هالكلام لان حرام تضيع سمعة ابوك عند الناس وحرام يطيح قدر اهلك بسبب اوهام مراهقه ، وترى الانسان بكل شي يخطي ويخطي ويخطي ويخطي وبالاخير يستفيد ويتعلم من اخطاؤه ، الا خطأ البنت بسمعتها وسمعة اهلها هالشي الوحيد اللي من مره وحده ممكن ينهي كل شي ويحطم كل شي وماينفع معاه الندم ولاينفع معاه اي شي لانه وقتها بيروح كل شي ولايرجع


والله يابنات الكلام اللي قاله لي اكثر من كذا واكبر من كذا بس من 13 سنه اكيد نسيت كثير منه لكنه كلام هزني بقوه وظليت فتره طويله وانا متأثره بكل كلمه قالها اقسم بالله ان ضميري عذبني لدرجة ان حتى اهلي حسو ان فيني شي غريب
لكن الحمدلله كنت قويه وعاهدت نفسي اني احاول استفيد من كلامه
واخليه بمثابة النور اللي انطلق منه والباب اللي انفتح لي للطريق الصح
والحمدلله الحمدلله الحمدلله اني ماغلطت ابد بعد هالغلطه وتفوقت في دراستي وكنت قدوه حسنه لكل زميلاتي وصديقاتي
وابوي دايما كان يقول لي انه يفتخر بتربيته لي الله يخليه لي تاج على راسي ولايحرمني ابتسامته بهالدنيا


سامحوني طولت عليكم ، لكن كنت بحاجه اني افضفض وابوح بالسر اللي عجزت سنين وانا كاتمته بقلبي