السلام عليكم ورحمة الله وبركاته
كيف حالكم جميعا بدخل بالموضوع على طول .
حبيباتي حبيت اكتب قصتي ومعاناتي انا واختي حصة تزوجنا بنفس السنة مع بعض وكتب ربي لي الطلاق وكنت حامل ولدت وجبت ولد زوجي كان طيب وحبوب لا كني ما قدرت اعيش معاه لظروف عائلية ومشاكل لها اول مالها آخر المهم جبت ولد زي القمر وطول فتره خطوبتي كان زوج اختي يقولها حرام نورة يأخذها واحد مثل هذا ..... المهم بعد الطلاق كنت احتاج وظيفة اعز فيها نفسي انا وولدي خصوصا ان ابوه ما كان يعطيه ولا ريال زوج اختي يهتم فيني واي شيء يشتريه لولده يأخذ مثله لولدي انا كنت ارفض هالشي وكان دايم يتصل فيني يسأل اذا ناقصني شيء ولا محتاجه شيء فيه مره ارسل لي فلوس مع اخوي الصغير وبنفس الوقت حصة تهاوش وتشتكي تقول اخذ فلوس من محفظتي نفس المبلغ الي اعطاني اياه نذل المهم مرت الأيام وكثرة اتصالاته وقام يرسل لي رسائل حب انا صرت اعطي الجوال لأمي واقول لها عن مكالماته قالت لي لا عاد تردين وبالفعل ما عاد رديت عليه ابدا بعد فتره قال ان فيه وظائف وان عنده واسطة يقدر يخليني اشتغل طبعا قال لواحد من اخواني ورحبنا بالفكرة وكان الوعد بكرة الصباح اروح اقدم اوراقي انا واخوي وزوج اختي الي هو الواسطة المهم نزلت في مكان التقديم وراح هو مع اخوي يفطرون وانا داخل مقر تقديم الوظيفة وبعد نص ساعة اتصل فيني زوج اختي وقال اطلعي انا عند الباب طلعت والسيارة مظلله وانا مغطيه عيوني وركبت وراء ومشى فالسيارة يوم طليت قدام ما لقيت اخوي وقلت له وينه قال نزلته الورشة وبمره الحين آخذه استغربت وخفت ما حسيت بالأمان توجه جهة مزرعة وفتح البوابة هندي يتضحك كأنه متعود على ها لحركه قلت وين رايح قال بأخذ حاجة وبطلع والله العظيم ان عرقي يصب من راسي الى طرف رجلي ما ادري ايش اسوي صابتني رعشة حتى الجوال ماني قادره امسكه نزل من السيارة ولف وجاء من جهة الباب الي انا جالسه فيه افتحه وقال انزلي ما رضيت وحاول يقرب مني وقمت ابكي وقلت حرام عليك انا بمكان اختك فلانه تراجع وركب السيارة وطلعني من المزرعة وكان ندمان ونزلني فمكان تقديم الوظيفة واكتشفت انه نزل اخوي فالمطعم وقاله بعبي السيارة زيت وارجع لك الخائن الكذاب انا بصراحة خفت اقول لأهلي وتصير مشاكل وتتطلق اختي بسببي وبقى فتره طويله وهو ساكت عني لا كني لاحظت ان اختي تغيرت علي الى ان جاء يوم سمعتها تقول لأمي واخواني الحين تقولون لي ايش الي بين زوجي وبين نورة ليش يهتم فيها كل هذا الاهتمام هي الي معطيته وجه قالت امي الموضوع هذا عندي ونورة مالها اي علاقة بالموضوع وكانت تجي تشتكي منه وانا اقولها طنشيه وفهمت حصة واخواني الشباب بكل الي كان يصير معي الا سالفة المزرعة انا ما قلت لأحد
عشت وقتها صدمة فوق صدمة طلاقي كيف تشك فيني وانا اختها ؟؟؟
بعد فتره رزقني الله بوظيفة كان فيها اختلاط صدقوني يا بنات الي تحفظ نفسها لو معاها مليون رجال ما يقدرون عليها ما امدح نفسي لاكن كان كل همي اعيش بحلال واصرف على ولدي زوج اختي يوم عرف ارسل رساله يبارك لي فيها وجاء لمقر دوامي وراح للمدير وقال انه اخوي من باب التعارف (لقافة) وما ادري أيش دخله اخوي كان يوديني ويجيبني للعمل وكان زوج اختي يحاول يوصلني بأي وسيله وصلت فيه انه يرسل لي رجال يحاولون يتعرفون علي ويختبرني بكذا طريقة يبي يمسك علي الزلة لدرجه انه كان يقول لأختي اني البس عباية ضيقة تحت عباءتي واذا جيت الدوام ابدلها المهم توظفت مدة 6 شهور كل ها لفتره وهو يحاول بشتى الطرق يوصل لي قليل ادب لأبعد الحدود الى ان جاء اليوم الي وصلت فيه جاني الى المكتب وقالي بصريح العبارة انا احبك قمت شرشحته ومسحت فيه الأرض وسبيته وسبيت اهله خاف وطلع يركض قال اسكتي يا (حيـــــ ) فضحتيني وانحاش انا فرحت حسبت اني قويه وقدرت عليه واخذت ساعة الا المدير يدق علي قالي ليش تبين تقدمين استقالة ؟؟؟؟؟؟؟؟؟؟؟؟ انا انصدمت قلت مين قال ؟ قال اخوك (يقصد زوج اختي) لسى عندي وطلب انهاء خدماتك طبعا انا انصدمت واتصلت على طول بأخوي الكبير ابكي وقلت له زوج اختي فصلني ولاقلت لأي احد من اهلي عن الي سواه فيني المهم اتصل اخوي عليه وقاله ليش سويت كذا قال فضحتنا مابقى رجال ماتعرفت عليه واتصل علي المدير وقالي الموضوع بيني وبينك افصل اختك من الوظيفة قبل الفضايح والله العلي العظيم العالي في سماه انه كذاااااااااب وظلمني وقذفني انهرت وتركت الوظيفة ابي ربي يفكني منه امي فيها ضغط يوم درت بغت تموت واحلف لهم انه كذاب لاكن لافات الفوت ماينفع الصوت ياليتني من البدايه علمت اهلى الله يعلم ان كل الي سويته عشان اختي وكان عندي من المشاكل مايكفيني امي كانت تبكي على سجادتها وتقول اللهم عجل بموت نورة قبل تفضحنا واخذوا اهلي مني الجوال واحبسوني فالغرفة وقاطعتني اختي 3 سنوات ماتكلمني ولا اكلمها والله العظيم وصلت فيه لدرجه انه جاب رجال شاهد علي يكلمه بالجوال ويحطه سبيكر والرجال يقول لأخواني ايه كنت اعرف اختكم ظلمني ظلم حسبي الله عليه وقابلت سجادتي ليل نهار اهلي ماكنوا مصدقين لاكن سبحان الله جاب شواهد واقنعهم صارت فيه فجوه بيني وبنهم وسمعت امي مره تقول من عذر زوجها يوم طلقها وقام ينشر الخبر بين الناس وامه واخواته ماقصروا يمشون ويذيعون الكل تركني وهجروني اعز الناس على قلبي وزني فوق الـ 70 وصلت الـ 50 تغير حتى لوني من القهر تعرفون القهر الي استعاذ منه الرسول احسه جاني لاكني التجأة لله بغيت افقد عقلي من كثر التفكير والهم الله لايوريكم كنت اكثر شي اطلبه ربي انه ينصرني ويعوضني بوظيفة حكومية ومرت السنة الأولى وانا في كرب شديد مقابله 4 جدران ماحد يسأل عني انا وولدي واذا طلعوا يتمشون ماحد يعطيني وجه ومن غرفتي ماانزل خصوصا لاصارت اختي حصه موجوده ما احب اسمع دق بالكلام وتلميح والمفاجأه الي فجرت الدنيا وكانت نقلة كبيره فحياتي هي ان الديوان اتصل على تلفون البيت وقالوا جاني التعيين الرسمي الحكومي الي كنت احلم فيه طرررررررررررررت من الفرحة حاجز وانكسر والحمد لله رحت ثاني يوم وخلصت اوراقي لاكن المشكله بقت فجوه عند اهلي وحزازيه خايفين كيف يعطوني جوال قامت امي عندها جهاز قديم وشريحة شحن عطتني اياها وشوي شوي تعدلت الأمور بفضل دعائي لله وكنت في محاضره سمعت الشيخ يتكلم عن قطيعة الرحم والتسامح حسيت كأنه يقصدني وقررت اسامح اختي وابدا بالسلام والحمد لله اول مااقبلت عليها ضحكت وحضنتني هي عارفه زوجها لاكن الشيطان شاطر سبحان الله يابنات كل ما اتذكر اليوم الي هجموا فيه علي اخواني واخذوا الجوال والكلام الي سمعته احس بنفجر واصيييييييح بأعلى صوت انا مظلومة والله مظلومه صرت اطلب ربي ليل نهار يرزقني الزوج الصالح الي مايكون من اهلي عشان الفضيحة الي صارت لي وكل اهلنا القريبين لاحظت انهم مانعين بناتهم مني وبعد مرور 4 سنوات تزوجت واخذت واحد من برا العائله وبنفس المواصفات الي دعيت فيها ربي بالضبط وتم كل شي بخير وسلام لاكن بدايه زواجي اخذ طليقي ولدي الحيت بالدعاء لله كنت ابلل السجاده وانا ساجد من كثر الدموع والحمد لله فرجت بعد 3 شهور رجعه لي وعاش عندي معزز مكرم والحمد لله جبت بنت وولد ما اكذب عليكم احس ربي نصرني بأستجابه دعائي والحمد لله على كل حال.
اكيد الحين تبون تعرفون وش صار لزوج اختي كل يوم اختي معاه بمشاكل وجايه عند اهلي تبي الطلاق ويرجعونها عشان عيالها وهو طبعا ماسك منصب في وضيفته وبحكم طبيعة عمله مداهمة الشقق المشبوهه كل يوم له وحده شكل اختي تشتكي من خيانته لها وقالت لي انه يستغل البنات الي يمسكون بقضايا اخلاقه ويسجلونها تستر ياخذ ارقامهم ويكلمهم بالقوه استغلالي لظروف الناس ومازال يعثو فالأرض فسادا
انتهى
دعواتكم لي بالتوفيق دنيا وآخر ماعاد همي الدنيا كل الي ابغاه الجنة وبس حبيت تستفيدون من قصتي وتاخذون منها العظة والعبره
نورة نور @nor_nor_8
عضوة جديدة
يلزم عليك تسجيل الدخول أولًا لكتابة تعليق.
سبحان الله
الله يعوضك
بس ياليت هذا يكون درس لك طول عمرك ولكل وحده تسكت عن اي شي يصير لها مهما كانت الظروف
طيب ماصارحتي اختك باللي سواه معك الى الأن
الله يعوضك
بس ياليت هذا يكون درس لك طول عمرك ولكل وحده تسكت عن اي شي يصير لها مهما كانت الظروف
طيب ماصارحتي اختك باللي سواه معك الى الأن
نورة نور
•
ماصارحت اختي يكفي صدماتها فيه وانا من النوع ما احب اتدخل باي احد ابد
الله يجزاكم خير على هالردود مالي الا 3 مشاركات فقط
الله يجزاكم خير على هالردود مالي الا 3 مشاركات فقط
الصفحة الأخيرة
عجبني برك ب أ مك