زوج مطنش

حياكم الله
بطرح عليكم موضوع للنقاش الصراحه لما سمعته اليوم بإجتماع الأهل طنشته وماعطيته اهميه لكن عقب مارجعت لبيتي وجلست مع نفسي رجع في بالي وقعدت افكر فيه لو انا مكان هالأنسانه هل ممكن اتحمل ؟
الزبده اليوم اجتمعت مع خواتي وبناتهم المتزوجات
وكنا نتناقش انه لازم نسوي هالاجتماع باستمرار وان ضروري نخليه بشكل الزامي كما لو كان امنا وابونا عايشين عشان نشعر بجو الالفه (طبعاً هالكلام ماخوذ خيره دايم نقوله وبالأخير مايجمعنا الا قروب الواتس😂)
المهم قالت بنت اختي انا مو بس ابغى اجتماع اهل انا ابغى اكون صداقات ويكون عندي معارف تقول انا طقت كبدي من الوحده المهم بدت تتكلم تتكلم وحنا نناقشها وفيه اللي يقول صح ويأيد وفيه اللي يقول لا كثر العلاقات مو زينه
بعدها البنت انفجرت وحسيتها مخنوقه وشوي وتبكي قالت محد حاس انا اقضي يومي كله لحالي ومع بنتي وولدي الصغار طفشوني عيالي كل يوم ينعاد علينا نفس الروتين انا مالي علاقات وان صار لي علاقه بأحد يصيرون اجتماعاتهم لازم بمناسبه
تقول وهالكلام وهالجزئيه اثرت فيني (انا)
ان زوجها غايب عن البيت تحلف انه ماتشوفه الا وقت النوم واحيانا ينام برا او يجي للبيت ومايدرون عنه وينام بالملحق وان دخل عليهم ماجلس الا اقل من ربع ساعه وهي فعلا انا كل مااكلمها او اسألها تقول لحالي عمرها ماقالت ابو فلان عندنا او انا مشغوله كلموني وقت ثاني
تقول زوجي مايشيلني ولا يخدمني سيارته تحلف انه يمر ثلاث شهور ماركبتها كل مشاويرها مع اخوانها
وهي تتكلم انا تعاطفت معها وقالت لها امها الشكوى لله تحملي واصبري عاد هي هنا ماسكتت قالت انتم اللي زوجتوني اياه وانتم عارفين انه مليان عيوب ( حنا ماندري ياخالاتها بس ماسألناها وقتها)
قالت وحده منا طيب هو وين يروح واذا قلتي ودني او اجلس معي وش عذره؟ قالت يتعذر بشغله وانه يطقطق بشغل خاص غير وظيفته وعذره انه مشغول مايقدر يخدمني او يجي للبيت يقول تعبان
تقول مو طبيعيه حياتي احس اني معلقه او زوجه مسيار
لا يطلعنا او يمشينا او حتى يسهر معي او يتغدا ويتعشى
تقول ان جلس عصريه في البيت هذي معجزه
او تعشى بالبيت معنا هذي مصيبه
تقول حتى السوالف مانسولف مع بعض ابد ابد يدخل يشوف عياله يسأل عن اخبارنا تبون شي بسس ويروح ياينام يا يطلع
تقول نفسي اسولف معكم عن مواقفي مع زوجي سوالف تضحك تقول مشتهيه اضحك مشتهيه اصور طلعتي مع زوجي وعيالي بسناب مشتهيه افرح مليت من الروتين
تقول اذا طلعت لمكان وشفت الحريم كيف عايشات وعيالهم وبناتهم كيف يحبون ابوهم استغرب ليش اولادي يخافون من ابوهم معقوله لان تواجده بالبيت معدوم !
المهم هذي السالفه ولو انها اطول واحداثها اكثر وسوالف قالتها ماعرفت اصيغها او يمكن بعضها مو فاهمتها منها لكن وقتها انا قلت لها انتي الزميه تكلمي معه قالت يقول هذا اللي عندي وهذا انا تقول احسه يوصل لي معلومه ماتبغيني اطلبي الطلاق
بعد مافضفضت قالت ماقولكم عشان تضيق صدوركم علي بس عشان لاتلوموني لاصارت طلعاتي قليله لانه مايطلعني اخواني هم اللي يخدموني
انتهى
ايش رايكم جد انا بعد مارجعت للبيت وصفنت مع نفسي عجزت اتخيل وعجزت اتحمل اكون مكانها ممكن انفجر وممكن اتخانق معه ولا احد يعاملني كذا بهالبرود..
هل فعلاً هذي حياه طبيعيه او هل فعلاً الزواج كذا واجبات وحقوق فقط
يعني اشياء ثانيه الجلوس مع الاولاد والكلام مع الزوجه والضحك والطلعات والترفيه عن النفس وخدمة الزوجه والخ مو ضروريات ؟ !