زوج معدد يحكي قصة على زوجاته ﻷيفووتكم ***

012, 07:31 AM
بسم الله الرحمن الرحيم 
انا ابدخل بالموضوع على طوول وماعندي وقت اقعد انمق وازين
انا رجال سعودي عمري حوالي 47 سنه تقريبا
كنت اعيش مع حرمتي وعيالي بحب وسلام ولا كان ينقصني شيء
وكانت زوجتي تقوم بكل امورنا على اكمل وجهه وانا مشغول ب العمار والعمل وتامين الحياة 
ومع هذا كانت حاتنا سعيده ومريحه صحيح ان فيها شوي مشاكل بس مو لذيك الدرجه
وكنت انا من البيت للعمل والمسجد والحاره والاقارب ومالي اصدقاء كثيرين الاحقين العمل بحكم اننا دايم بوجيه بعض لساعات طويله وكانو كلهم نفس الرتم اللي انا عايش فيه
بيت وعيال وحرمه وعمل وحاره وجماعة مسجد ما عندنا لف ودوران ولاننا تزوجنا صغار وبدينا حياتنا صغار كنا مشغولين عن الالتفات لامور كثيره كان الشباب يدور عليها
والحين الواحد ياصل عمره 33 سنه ولا بعد تزوج وانا كان عمري 30 ومعي اربعه وكانت زوجتي حبوبه ورحومه وحطو على رحومه اربعه خطوط لانها فعلا كانت ترحمني بجد وتخاف علي 
وفي اخره سنه من سنوات العمار اللي كنت امر فيه بيت الملك كنت ابحث عن معلم جبس ومن واحد لواحد الين عطوني رقم واحد كلمته واخذت معلم من عنده ونسيت رقمه وخلاص
جاني العامل وصار يشتغل معي ويكلمني عن هذا وانه حبوب انا عادي عندي لانه يمر علينا باليوم ناس واجد مادريت يوم الا وهو جايبه يشوف العماره دخل الرجال وسلم وسولفنا مع بعض ولقيته انسان حبوب فعلا والواحد يرتاح له وصار يتردد علي في العماره وانا خلاص على وشك الانتهاء منها
ونجلس نتقهوى الشاهي ونسولف ونتبادل الاراء وكل واحد يروح المغرب وارجع لبيتي وحياتي وعيالي وزوجتي الحبيبه وكنت اجلس واسولف معها واحكي لها حتى عن الخشب والمسامير وكل شيء يعني والله ما اخبي عليها شيء وكنا نسولف وننبسط واذا رجعت ولقيتها مبسوطه ومرتاحه احس ان التعب يروح ويجيني نشاط عجيب واجلس اسولف معها في المطبخ او اذا كانت مخلصه شغلها جلسنا في الصاله نشوف التلفزيون واعلمها عن اللي صار اليوم وهي تعلمني عن كل شيءوعيالنا عندنا واذا كان مدارس نامو بدري طلعت انا وياها ورحنا لبنده او احد المراكز اللي ما تصك مبكر وشرينا اغراضنا
وكانت نعم الحرمه اعترف واعترف ومدبره وسنعه وكل شيء زين فيها
وهذي حياتي انا وبيتي وحريمتي
وخلصت الفله
وقضى العمار
وبديت ارتاح
0000000000000000000000000000
تابعوني :)
دلة الرسلان
08-01-2012, 07:36 AM
يالله نكمل
المهم انتهيت من العماره وبديت ارتاح وصار عندي وقت فراغ وصرت ما ادري ايش اسوي زوجتي تساعد العيال في المدارس وتسوي الاكل ومشغوله مهيب فاضيه تقعد معي مقابلتني كل الوقت
طرا على بالي الاخ اللي كان يجي عندي ايام العمار ودورت رقمه ودقيت عليه وكان له شله يعرفهم ومتصادق معهم
وتواعدنا وصرنا نلتقي بين وقت واخر في البر او في احد بيوتناوتوثقت علاقاتنا جدا وصار يعلمني عن سفراته
اثاري الرجال يسافر ويروح ويجي وانبهرت بجلستهم كان عمري 37 سنه يوم تعرفت عليهم
كانو على ال .....ورقصهم او على البنات اللي دايم رقص وتعال شف بس بنات في التلفزيون وتعليقات من هالشباب
هذي يا......0 وهذي يا..... وهذي شف باقي شوي ويطلع000000
وتوجد على ليت من ظمها وليت من حبها وليت من قعد معها وما يروح الواحد الا وهو مستوي
والاسوالفهم عن اللي.............. وغيرهم بدات احب تجمهم هذا لقد اخرجني من عالمي العادي الى عالم غير والنفس تحتاج للتغيير
لا اكذب عليكم ان قلت لكم انا والله والله احب زوجتي ولانني احبها كنت اشوفها اجمل الجميلات
وكانت ما تقصر تلبس بنطلونات وقصير وعاري وكل حاجه يعني مو متبهذله او شينه بس حبي لها كان مخليها جميله لو عليها جلابيه لكن بعد شوفت القنوات تغيرت نظرتي ومدري وش صار فيني صرت ماودي اشوفها ولا ودي اجلس معها ودي بوحده جديده مثل بنات القنوات واتخيل نفسي اشيلها واركض مثل الفديو كليبات
وتخيلت روحي مثل الشباب هذولا سكسوكه صغيره وملابس ضيقه وشعر طويل شوي ومظهر شبابي صح
بس انا بين غار ونار المجتمع اللي حولي مارح يتقبل تغيري ورح يقولون انهبل
بعدين انا وشكلي عند زوجتي وعيالي وانا اللي كنت ما اهتم بالشكل ولا غيره اجي الحين اتنمق واتغير وشلون؟؟؟
كانت زوجتي تحبني اني اصير اشيك الناس وكانت نظافتها في الغسيل واضحه على لبسي وكانت حريصه علي بشكل كبير ودايم تدهن رجولي وتحطهم في كيس علشان التشققات وانا اضحك عليها وش تبين برجولي وهي تقول احسن
وكانت تجهز لي المعجون والفرشاة لاسناني وانا ما استعملها الانادر 
لاني انا ما اهتم اجل الحين ايش اسوي؟؟ وبلشت في عمري
واستشرت صاحبي اياه وبدا يعطيني توجيهات ومعلومات المهم بدا شكلي يتغير بالتدريج وصرت اهتم في اشياء انا مالي فيها صرت انا اللي ادهن رجولي ورحت الصيدليه وجبت عصارات وكريمات وصرت احطهم على رجولي اللين صارت تقل بطن بزر وفرحت زوجتي وقالت ياعمري اثرك ماتلقى وقت يومنك ماتهتم والحين ظهر اهتمامك وقلت الله يعين وانا والله مستحي منها بس مدري وش ارد
المهم اللي ابيكم تعرفونه اننا يا الرجال اذا حبينا حبينا واذا عافت النفس عافت الا من كان عنده دين وخوف من الله ووفاء وهذا تراه نادر عندنا حنا اهم شيء الوالحد راحته وناسته لو مع اي وحده
وترا مجتمع الرجال مافيه ناصح للخير الامن رحم ربك يعني كلهم يشجعونك على قل الاهتمام في زوجتك وعيالك واكثر قولهم ((يالله لك الحمد بخير وعافيه تاكل وتشرب وتنام وفي بيتها))
وهنا يصير اي شيء يسويه الواحد منا عادي
لكن لو كان فيه احد يستنكر عليك ويقولك ليه كان الحال تغير بكثير من بيوتنا
المهم بدا حالي يتغير وافكار واعترف لكم اصابتني مراهقه جديده ما عشتها ذيك الايام لانني كنت في نظر نفسي واللي حولي رجال البيت وصارت تجيني افكار
وبدات الافكار تقلقني
تابعوني :)
دلة الرسلان
08-01-2012, 07:41 AM
نكمل
المهم بديت افكر اسافر ثم هونت وقلت بعد ها العمر ولقيتها شينه اسافر وخفت اطيح بالسفر وابعدت الفكره وجلست بس اسهر مع الرفقه المذكوره عند الدش ونشوف ها البنات مع انهم والله ما كانو اهتمامي ولا التلفزيون ليس من اهتمامي ابدا لكن رفقتك هي من تحدد لك مسارك
لقد كنت في عملي اجد رفقه مكافحه تحب العمل والجد والالتزام بالبيت والاسره
اما هولاء الجدد وهم رفقة السهره فكانو عكس هذا تمام ولهذا بدات اخذ بطريقتهم وانا هنا اعترف انني لو لم اكن مستعدا للتغير ماتغيرت ولكن انا اتكلم عن التاثر حتى ولو الانسان كبير فالصاحب ساحب
المهم بديت مثل ما قلت لكم اتغير بالشكل خففت لحيتي وقصقصت منها وشريت لي كم تكميله وحطيت البنطلون نوع من الجنز بس واسع شوي قلت مهوب على طول جنز ضيق لكن كان في مخي اني اجيب جنز ضيق وتيشيرت
وشريت لي برمودا كاروهات اسود بابيض وتيشيرت اسود وكاب ابيض المهم رحنا للثمامه ولبس واحد من التطقيمات هذي وضحكو علي عيالي وقالو خل اللبس هذا لسعود وسعود ولدي الكبير وكان يدرس باول ثانوي وعندي قبله بنت
تدرس ثالث ثانوي ونت في ثاني متوسط وولد في رابع ولد اربع سنوات المهم اقولكم ضحكو علي ضحك وانا ما اهتميت وزوجتي قالت بالعكس المفروض من اول انك تلبس وتكشخ وفرحت فيني000وهي ماتدري ان هذا مراهقه
اناوالعيال حقين السهره اخذنا استراحه بالسنه وصرنا نجتمع فيها والاستراحات سببا كبيرا لبعد الرجال عن بيوتهم
والله ان الواحد منا تتصل عليه حرمته ما يرد واذا رد قال دبرو روحكم انا مشغول وهو قاعد متركي ويشرب شاهي
وبعض المرات الواحد منا يشوف اتصالها ويخليها مايرد وتحسبون ان فيه احد يستنكر هذا ويقول حرام عليك ابدا
الا بعضهم هداهم الله يقولون خلها ماعندها الا وجع الراس
واكثر الرجال يشيشون الرجال على حريمهم بكلام مثل لا تدلعها او لاتخليها تمشي كلامها
او انا والله لو حرمتي تقول كذا ما يردها الا بيت اهلها
اما رفقتي الاولى اصحاب العمل والناس الفاهمه صح كانو دايم يقولون الحرمه مسكينه وشف ام سعود وش تبي
واذا ما رد الواحد قالو شف لياها تبي شيء ضروري
والله انهم يعطون بعض جوالتهم اذا مافيه رصيد اوشحن علشان ندق على بيوتنا
وعندهم الحرمه شيء كبير وشخص له اهميته ويوم قلت لربع الاستراحه عنهم صارو يضحكون يقولون هذولا
ماعندهم سالفه هذولا حريمهم مشينهم على كيفهن
المهم اني اناصرت غريب على ربعي الاولين وحقين العمل وحتى شكلي صار شاذعنهم شوي
صحيح يلبسون تكميلات وملابس رياضه وكشخه بس مهيب حقت عيال مراهقين مثل اصحاب الاستراحه
وصرت اسحب نفسي منهم شوي شوي اللي تركتهم بس اشوفهم بالعمل ومجرد زماله والا انشغل بالعمل علشان متى اطلع واروح للاستراحه
وصرت سيده من العمل للاستراحه وما امر البيت ابدا واقول للحرمه لاتحتريني تراني ابا اتاخر
وهكذا والله ثم والله لم اعد ارى اولادي الا اوقات قليله ولم تقصر زوجتي على الرغم مما افعله اجدها قد تجهزت ولبست وبخرت غرفتها وجلست تنتظر عودتي ومعها كتاب او عمل تقضي به وقتها مثل تلف سنبوسه اواو غيرها من الاعمال التي تقضي بها وقتها لعلي اعود ولكن انا لااعود الا وقد بقي على الفجر ساعه وكثيرا ما تقول اجلس وخا ننتظر الفجر واخبرها انني تعبان واتركها وانام وهنا تنتظر هي الفجر وتصلي ثم تنتظر الاولاد ليذهبو لمدارسهم ثم تنام اما انا اسحبها نومه لحد وقت العمل بين الساعه الثامنه والثامنه والنصف وساعات امطها للساعه التاسعه او العاشره ولا نطلع من العمل الا الساعه خمس قبل المغرب ولهذا كنت استخسر ان اعودلبيتي ويضيع الوقت
وكان هناك برك الظهر للغداء واول كنت احب اروح لبيتيوعيالي اتغداء معهم وتالي الوقت لا وش ابي فيهم
صرت اروح لمسجد الموسسه وانام فيه ساعه علشان اقدر اسهر مع الشباب
وعلى هذا الحال مرت اياميوانا ما اطلع من الاستراحه الامستوي من تعليقات الشباب وخصوصا فيما يتعلق بالامور
الج000000لانها كانت تستهوينا ونحب نتكلم فيها كثير ونتخيل الليالي الرومنسيه واالحلوه وتراني هنا اعترف واقر ان زوجتي لم تكن تقصر لقدكانت بين فتره وفتره تقيم ليال رومنسبه جميله وكانت تعد مفاجئات كثيره لي
ولكنني انا لم اعد استمتع بها ولا ادري لماذا هل لانني احب ان اجرب اخرى ام لانني اصبحت ارى نساء اشكال والوان
ولهذا اصبحت اتهرب من ليالي زوجتي حتى الفراش لم اعد احبه معهامع انني اول الامر كنت لاامل الفراش معها ابدا
وعاودني التفكير ولكن هذه المره بطريقه غير
تابعوني
دلة الرسلان
08-01-2012, 07:49 AM
تعرفت على واحد من قرايبي يعني ملتزم قليلا مومتشدد ولا فالت وسافرت معه ورحت اشوف الدنيا اللي العالم يتكلمون عنها لكن السفر مصاريف وما فيه شيء استهواني ابد
وجلسنا حوالي عشر ايام اوتزيد شوي ورجعنا بس والله كنا محترمين وما التفتنا للحرام وعلى فكره انا والله ما احب الحرام ابدا مثل المغازل في التلفون او الجوال ولا طلعات بنات وغيرها وهذا من فضل الله علي
المهم رجعنا وانا خلاص افكر بالزواج لان الحرام ما بيه والنفس هفت والهواء هب00000000
تدرون يا كل الحريم انا ابقولها صريحه للي تدور على سبب لزواج زوجها؟؟؟؟؟؟؟؟؟؟؟؟؟؟؟؟؟
والله ثم والله ان مهنا سبب ابدا والله ان الكثيرات من الزوجات الاوليات سنعات وحبيبات ونظيفات ومهتمات بازواجهن ومع هذا يتزوج تدرون ليش انا ابقولكم الصحيح واللي يصير يصير السبب انه يكون هزه الشوق
والواحد منا اذا جت ها الهزه معد يدري وادري انكم تبون تقولون ليه يهزه الشوق وهو عنده وحده اللي اقصده انه هزه الشوق لوحده ثانيه وشكل ثاني وطبع ثاني ولهذا يسعى ويدور ويتسلف ويبيع علشان ها الهزه البسيطه اللي لو الواحد جلس وحسبها صح كان ابعدها عنه وترا كل الرجال تجيهم بالعمر اكثر من مره :eek5:
بس اكثر ما تتسلط فيه ها الهزه من عمر خمس وثلاثين الين خمس وستينيعني ها الثلاثين سنه ممكن تتغير افكار الرجال واساليبه وطريقته وكل احواله 00ولا ااكذب اذا قلت لكم ان كل واحد منا تجيه الافكار هذي وهزة الشوق بس فيه ناس تفكروتخاف على سمعتها وعلى عيالها وعلى حريمها وفيه رجال ما همهم الاانفسهموابقول للزوجات الثانيات ترا والله يوم يجي الواحد يبي يتزوجك مو لان فيك شيء غير عن حرمته ولافيك زود عن الحريم كلهم بس انتي كنتي نصيبه يوم هزه الشوق للتغيير ولهذا اعرفي انه ممكن يهزه الشوق وانتي معه
ويتزوج ثالثه ورابعه ولو يحصل اخذ مئه بس الشرع الحمد لله والاكان الواحد ما يدري وش يسوي0000000المهم بدات الافكار براسي تزاحم وقررت ابعد عن الزملاء الاولين لانهم من النوع اللي يرحم الحرمه وعندهم وفاء ولو ابقول لهم شيء ها وشوني لهذا طلبت النقل لفرع اخر من فروع المؤسسه وتم النقل وجيت ناس ما يعرفوني
ولا يعرفون زوجتي مثل ذولاك المهم وصرت اقول اني ودي اتزوج وكل واحد اعطيه سبب بس والله ما سبيت زوجتي ابدا احد اقوله ماتكفيني الوحده واحد اقوله ابي عيال اكثر واحد اقوله انا قادر وغيرها من الاعذار واحد اعلمه بالحقيقه اقوله النفس هفت والشوق هزني للعرس وهذا السبب الوحيد اللي الرجال مقتنعين منه حتى ان الواحد منهم اذا قلت له كذا قال اجل مانقول شيء0000المهم وصرت ادور واسالابي بنت والصغيره لقيتها غاليه والكبيره ابصير شماته لزوجتي وللناسوالنفس هبت لبنت مو ارمله او مطلقه اوممن فيهن اجر لا والله اننا ماندور الاجرلو الواحد يبي يدور الاجر كان تزوج ام يتمان او وحده ظروفها صعبه الواحد منا يتزوج علشان روحه وشوقه الجديد
ومسكينات البنات تحسب انه الواحد منا جاء يبي يتزوجها معناه انها تبي تملكه وتخليه لها لحالها لانها تعتقد انه ما يبي ام عياله يوم تزوج عليها وهذا اكبر غلط والله ان الواحد يحب ام عياله ويموت فيها ويحب الارض اللي تمشي عليها ومع هذا يتزوج للسبب اللي ذكرته لكم قبل وممكن يحب الثانيه ويتزوج عليها وممكن يحرم الزواج ثالثه لانه عرف ان هزة شوقه غلط بغلط وهنا اقول للاولى خذيها كلمه ترا مهوب علشان الثانيه قاعد ما اعرس رجلك مهوب تراه انه يحبها او يخاف عليها بس لانه عرف خطاه ولا هوب مكررهوانتي يا الثانيه ترا مهوب كل واحد تزوج على حرمته معناه ما بغاهاوالا انك انتي تبي تصيرين الكل بالكل ابدا كل وحده يزينها اخلاقها وتعاملها وممكن ان زواج الرجل يخليه يكتشف عالم زوجته الخفي والجميل او القبيح المهم ان الرجال حاط في باله وعيونه وعقله ميزان
وهذا تفكير كل عاقل يخاف الله يوازن بين التعامل والاسلوب الحلو وحسن العشره000
والله لو ان الواحد يموت في زوجته ويحبها واخلاقها زفت كان مع الوقت راح الحب ولو فيه واحد ما يحب زوجته واخلاقها واسلوبها حلو والله غصب عليه يحترمها مو يحبها ومع الاحترام والتقدير يجي الحب والخوف عليها
المهم دلوني على ناس عندها بنات كبار شوي وخطبت وما صدقت انهم وافقو مع ان الملاك اللي في البيت ما يقصر بس مثل ماقلت لكم ويوم وافقو بديت اراهق صح وتطلع المراهقه اللي ما مريت فيها عند البلوغ
وصارت امور كثيره ومشت الين جاء وقت الزواج وعلمت زوجتي وهنا احب اقول لكل واحد ترا اللسان اللين يغلب على الحق البين ها الحين تبي تروح وتعرس وتخليها بعد ها العمر ولا تبيها تاثر خلك محلها لو مره لكن الله المستعان
رجعنا لمجتمع الرجال اكثر اللي استشرتهم ولا واحد يذكرك بالعدل الاقليلون جدا اما غيرهم همهم التعليق على= تشبب=
ايه كذا الرجال = ايه من قدك= وينفخونك وهم يعرفون انك طحت طيحه مهيب سهله ولا اذكر ان فيه احدقال ليش ترا مهوب سهل الزواج والمسوليات لا كل واحد يفكر بطريقه مختلفه وعلمت زوجتي مثل ما قلت لكم وحلفت لها اني ما تغير عليها وحلفت وحلفت ووعدت وكل شيء ابيه يتم بدون مشاكل علشان انا ابي اعيش فترة العرس بطريقه حلوه
ومافيها منغصات ولا مشاكل وعطيتها ارضااوه وحاولت اواسيها باللي اقدر عليه
المهم كنت اذا دخلت بيتي وشفت زوجتي وعشرة عمري رحمتها وضاق صدري
بس وش اسوي انا بعد احب نفسي ودي ارضي روحي وارضي اللي فيني ومسيطر علي
واذا طلعت مع الباب كنت ادور الاعذار الكثيره لي مثل الحمد لله انا ما قصرت انا من حقي اعرس
وغيرها كثير ثم انسى ام عيالي واروح اراهق واتكلم وعيش جو اللي ما بعد اعرس وصرت اكلم زوجتي الجديده واخطط معهاوكيف رح يتم الزواج00000000000
تابعوني :nice:
دلة الرسلان
08-01-2012, 07:55 AM
نكمل0000000000
المهم عشت ايام الزواج وانا في قمة الفرحه وكانه اول زواج لي مو كره في زوجتي لا والله بس شيء بالنفس وده يطلع وكنت اخطط للزواج هذا واحاول اظهر اني اعرف اشياء واجد ابي زوجتي الجديده تشوفني باحسن صوره
وصرت اقولها على حركات انا تعلمتها من زوجتي الاولى وكانت دايم تحب اني اقولها لها وتم الزواج وكانت ليله حبيت
اكون فيها فارس متوج لكن البنت طلعت اللهي تتكلم عن الحقوق والواجبات وغيرها من الامور اللي ما لها داعي في نظري تلك الايام
فمراهقتي كانت تدعوني لان افكر فقط بالجسد دون الروح وهذا اغضب الزوجه الجديده
ولكنني الان اتسال انتي ايتها الزوجه الجديده
عندما تزوجتي معدد ماذا كنتي تعتقدين انه يريد؟؟؟؟غير ان يستمتع بشكل اخر
خصوصا اذا كانت حياته قبل زواجه منك مستقره يعني بالعامي عنده بيت وعيال وزوجه صغيره وكل شيء تمام
ليه راح وتزوجك الا اذا كان يبغى متعته الا من رحم ربك
من يريد التعدد فهو من يتزوج ام لايتام او مطلقه ليستر عليها او اذا كان ليس لديه اولاد ويريد الذريه اما غيره فانا اعتبرها مراهقه وحب للاستمتاع وتغيير اللوك لواحد جديد 
المهم كانت اللي تزوجتها كبيره بالسن وتبي تكون اسره وانا والله عندي اسره وماعندي استعداد الحين للعيال والمسؤليات بمعنى كنت ابي اقعد ارتاح معها وكاننا اصدقاء ننام وقت ما ننام ونقوم وقت مانقوم ونطلع وندخل مع اني كنت مع زوجتي الاولى كل هذا لاقيه بس سبحان الله ما كنت التفت له معها لكن الجديده صارت تشوف ان هذا قل عقل وطحت من عينها وصارت تضحك علي باشياء كثيره وانا اللي كل عمري وان شايف نفسي وزوجتي الاولى مكبره راسي ونافختني بتقديرها لي
المهم الله عطاني زوجتين طيبات وحبوبات وانا ما استاهل
ومه هذا بدت حياتي توتر لانني ضيعت الطريق صح000000
حسب ان الزوجه الثانيه رح تقدسني وتحبني خصوصا اني طلعت لها مهاراتي واساليبي الكثيره الي تعلمتها من خلال عشرتي مع زوجتي الاولى لكنها هي اكتشفت شخصيتي من اولها عرفت انه ما فيه شيء يثمر فيني
وان زوجتي الاولى ما قصرت بس انا اللي ما استاهل وعلى هذا الاساس عاملتني الجديده
وزوجتي الاولى تغيرت نفسيتها وصارت تحب نفسها وتدور على مصلحتها وضعت انا معد ادري كيف اكسب الثانيه وخسرت الاولى وما لقيت اهتمام من اي وحده وانا اللي كنت امني نفسي بالحب والاهتمام من الثنتين
وحملت الثانيه وحملت الاولى كل وحده تقول رح انا متنازله عنك رح لهذيك
وتصدقون اكثر شيء يضايق الرجال اذا حس ان الوحده مستغنيه عنه ومتنازله عنه
كانت زوجتي الاولى دايم تقول رح لمها الله يعافيك انا مالي خلق واقول سبحان الله وشلون تغيرت كذا
مع اني انا السبب
المهم هذي جابت بنت والاولى ولد وقلت لهم يالله كل وحده ابجيب لها حبوب تاكلهم لمده ثلاث سنوات لكن ما وحده التزمت باللي قلت وصارو يتنا فسون على الحمل وان كل مالي انهد زياده مصاريف ومشاكل وغثا وقل اهتمام
وهذا اللي ذبحني وين الاحلام وينالليالي الرومنسيه وين وين
كل شيء راح وفكرت اطلق وحده منهم بس زوجتي الاولى اجوديه وعشرة عمري وام عيالي وحرام لو ابسوي لها كذا
والثانيه بعد بنت حلال ومالها دخل في حياتي الاولى انا اللي جيت وخطبتها وخفت الله فيها
ولا ادري ويش اسوي ؟؟ الاجازه اكثرها لحالي
الاعياد لحالي وكل خميس وجمعه لحالي وتركت الشباب والاستراحات لانني انشغلت وهذا الموضوع سبب لي مشكله كبيره انا عترف ان الثانيه فتحت عيني على الحقوق بس مهوب كله حب فيها مثل ما تعتقد الزوجه الاولى
زوجتي الاولى كانت تردد انا ما استاهل انك تقعد عندي علشان كذا انت كل يوم بالاستراحه والحين يوم جت زوجك الجديده صرت ما تروح0000000
والثانيه تقول انت اخذتني مهوب علشان تحبسني انا ابي اروح واجي واعيش المهم عشت مشتت ولا عاد لي احد وبعض الرجال صار يتحاشى الجلوس معي لانني معدد وبعض الزوجات ترفض اجتماع زوجها معي 




المهم تابعوني لتتعرفو على المزيد00000000000000
دلة الرسلان
08-01-2012, 07:59 AM
المهم اكمل لكم بعض من مواقف في حياتي بعد التعدد
تعبت جدا وما ادري كيف اتصرف الاولى تقول رح للي فضلتها علي رح للي اخترتها ودورتها وانت مو ناقص شيء
والثانيه تقول اذا انت مو قد الزواج والتعدد ليش تاخذ بنات الناس وتعذبهم
وصرت اجلس في المسجد اذا رحت اصلي ابي بس ارتاح شوي واثر هذا سبب توتر اكثر لان اللي هو يومها تحسبني رايح عند الاخرى وتعال تحقيق ليش تاخرت وليش سويت جالس عندها ويبدا موال جديد
صرت اجلس في السياره وكثير من جيراني يقولون وش فيه ابو سعود قاعد وحاط ايده على خده وبالسياره ما درو اني ابرتاح لو شوي المهم
مليت من الوضع هذا ورحت استشرت مستشار اسري واجتماعي وقال لازم تكسب وحده منهم كذا انت ضيعت نفسك وضيعتهن معك لازم تحاول تكسب وحده علشان نفسك
وفكرت في كلامه وقلت خلاص ابدا بالثانيه لعلها تكون لينه وتوها جديده ويمكن يثمر فيها
وبديت اهتم فيها واحقق مطالبها واحاول اراضيها حتى لو على حسابي وكانت حامل بالثاني وعندها بنت توها كملت سنه ومع هذا حملت بس لانها تحب الاطفال وتقول لاتكون اناني لان عندك اولاد من اول ماتبيهم وفضلت السكوت وصرتاحاول فيها
وادلع فيها واهتم واستمريت كذا بدون اية جدوى او نتيجه لانها ببساطه تشوف ان هذي حقوق لها وعادي كل الرجال يسوون كذا لحريمهم وجلست حوالي سبع شهور وانا احاول فيها وهي ولا جابت خبر كل امورها عادي جدا
واقول لها يابنت انا ابي اهتمام انا ابي احساس وهي تقول انت دلوع تبي مثل عند زوجتك الاولى انسى انا غير
المهم جيت قلت اجل خل اجرب مع الاولى عسى ولعل فيها خير
وكان عندها طفل عمره احدى عشر شهر ومع هذا طلعت حامل وكانهم في سباق تسلح ومدري ايش الحكمه من هذا السباق الا ارهاقي بالمصاريف ووجع الراس
وبديت مع الاولى وحاولت لكنها كانت من النوع اللي اخذ مناعه ولا صار ياثر فيها اي كلام او مشاعر
اذا حاولت اقول لها كلام حلو قالت ايش عندك او تحسب اني فلانه انا ام سعود مو غيرها وتضحك واذا قلت والله انه لك انتي تقول باستهتار لا والله من جدك تحسب اني ابي ها الكلام رح ياحلو قله لها يمكن هي تحب الكلام هذا
انا ابغى فلوس وافعال وقلت ابشري وش تبين بس قالت البيت ابغير اثاثه والسياره نبي نغيرها ونبي نجيب سواق انا مشاويري كثرت وماني طايقه اشحذ خلق الله قلت يابنت الناس انتي تشوفين المصاريف ايش كثرها والله ان قوطي الحليب لبزارينكم الواحد 26 ريال وما ياخذ اسبوع والحفائظ اكرمكم الله اجيب بالكرتون الكبير ولا يقعد شهر
قالت مالي خص هذا شيء انت جبته لروحك اهم شيء مصروفي وعيالي لاينقص
وعرفت ان ما فيها فايده خلاص راحت ام سعود الاولى الرحومه الحبيبه وانا اللي ضيعتها من يدي بس هذي مكاتيب ربك وللدت الثنتين في نفس السنه وصار عندي اربعة اطفال في سنتين هي عمر زواجي الثاني التعيس واكبرهم ابو سنه واحدى عشر شهر يعني تخيلو وشلون بس الازعاج والمصاريف
لا تسالوني عن الازعاج ياكثر مانمت بالمقلط او في غرفه ثانيه
وكنت اشوف نظرة تشفي من زوجتي الاولى كثير
اذا قلت تعبان ضحكت بتشفي وماتقول الا الله يعين
واذا قلت مانمت ضحكت وقالت وين نوم عشر ساعات اول
وكثيركانت تتشفى فيني
ويمكن ها السبب هو اللي خلاني ما احاول اتراجع عن زواجي من اول الايام لانني كنت ما احب اظهر بدور المنهزم
برغم انني مهزوم صح وكثير والله
المهم حاولت وحاولت وبان على الارهاق والمشاكل والعصبيه حتى وصرت اتعب كثير ولا اللقي اهتمام احد
وعجزت انسى يوم كان عندي شغل كثير ورايح من الصبح واشتغل في بيت لي ابي اااجره لعلي استفيد من دخله
واستخسرت اني اجيب عمال لانهم رح ياخذون فلوس قلت انا اشتغل بيدي ومنها اوفر الفلوس اللي رح ياخذونها العمال لعيالي ومنها اصد عن البيتين وارتاح منهن كلهن وغثاهن
المهم وجلست اشتغل اللين بعد المغرب ومريت على بيت الاولى وانا نفسي تقولي لعلها تحس فيك وتواسيك وتحاول 
تشوفك يوم جيتها لقيتها واصله الاتش وسلمت ويالله ردت علي وتكتفت وقالت بحواجب مرفوعه وش فيك وينك ما وراك بيت وعيال او خلاص جيت متمشي معها ومتقضي ومدلعها والحين جاي تتمسكن عندي وحلفت لها اني تعبان
واني كل النهار اشتغل وردت الرد المعتاد الله يعين وراحت وقالت سكر الباب اذا طلعت
ورحت بيتي الثاني وان اقول لعل فيها خير ويوم جيت لقيتها كاتبه ورقه وحاطتها انا عند الجيران عندهم عشاء ورايحه اتصلت عليها وقلت انا في البيت وتعبان ابي قهوه وعشاء قالت وش تبيني اسوي دور اي شيء وتعش
المهم سهرت وجلست الين الساعه 11 ونصف ولا اهتمت اهم شيء سعة صدرها
وخفت اروح للاولى واتعشى عندها تتشمت فيني وتعرف ان هذيك مهملتني وان ما احب الشماته وانا اللي كل عمري منفوخ والناس تشوف خاطري واليوم هذا حالي
المهم اخذت سندوتشه من بيت الثانيه واكلتها وصعبت علي حالي المهم من بكره رحت للاولى وجلست ابسولف وعاتبتها على موقفها امس تدرون ردها لي ايش (تبيني ادهنك واراعيك وانشطك وتروح لم الثانيه جاهز انسى اني ابسوي لك شيء في غير يومي))
المهم اني تعبت مره ولا عمري لقيت وحده منهم راضيه الا في حاله وحده اذا عطيتها فلوس وخليتها تروح وتجي على كيفيها ممكن يروقن شوي بعد مهوب مره
المهم صرت اشكي لواحد من ا صدقائي وشار علي بشور وبديت افكر فيه....تابعوووني:nice:
دلة الرسلان
08-01-2012, 08:05 AM
نكمل
المهم مثل ما قلت لكم شار علي صديقي اني اتزوج الثالثه لانه على حسب كلامه مهوب كل الحريم سواء
وان فيهن حريم سنعات وحشامات وكانت زوجتي الاولى منهن بس انا اللي ما قدرت النعمه
وانا ابقول رأيي الصحيح بالحرمه((الحرمه عندنا مثل الجحه تشوفها من برا وتعجبك وتوكل على الله وتشتريها واثرها من داخل مهنا شيء اما خربانه او بيضاء ما استوت اوحمراء فايته يعني الواحد اذا جازف واشتراها لابد انه يرضى فيها بكل عيوبها لانها طاحت في سبده وهذا حالنا معكم يا الحريم00 ))وادري ان ها الوصف بيزعل الكثيرات
من اللي رح يقرون قصتي في يوم من الايام 
المهم انا طرخت اذني وصرت اهوجس بالموضوع قلت غديني اللقي وحده تبيني انا مهوب تبي فلوسي ومويتي بس
وكاني في نظرهن مكينة صراف وثور تلقيح وبس انا انسان ابي الدلع وابي الكلام الحلووابي الاهتمام مهوب ثيابي صارت فيهاكدره من ان كل وحده تقول هذيك ما تعرف تغسل
وكل وحده منهن تبي تاخذ وبس اما تعطي مهوب من اختصاصها انا ادري اني انا اللي ضيعت نفسي بالزواج الغير مدروس اللي ماكان له اسباب الا المراهقه المتاخره بس عاد صار اللي صار المفروض يتنا فسن علي وانا والله ما قصرت ابد صرت اسوي لهن حوافز اجي للثانيه واقول لها ان الاولى تسوي ليوتدلع فيني تقوم تضحك وتقول اجل ليش تزوجت وش تدور؟؟ واروح للاولى واقول لها والله يالثانيه انها شايلتني عن الارض وتقول الله يهنيك مهوب من كثره وانت تقل سواق عندها او صبي رح لها خلها تدلعك انا ما عندي دلع الدلع راح00000 ولا يفيد بهن الحوافز ولا غيرها قلت يمكن كلام صديقي صح واطيح لي بجحه زينه قصدي حرمه لكن فكرت بالمصاريف والاجارات وغيرها والسباق اللي صاربين الاولى والثانيه لانجاب اكبر عدد من الاطفال وفكرت وفكرت وقررت بعدها اني ابعد الزواج بالثالثه من مخي نهائي لانه رح يسبب ازمه عالميه لي
زوجتي الاولى تحسب انه علشان تمسكي بالثانيه وخوفي على مشاعرها
والثانيه تحسب انه خوف منها واني ما احد يبيني لاني ابو عيال ويا كثر ما كانت تردد علي احمد ربك اخذتك وانت ابو عيال وهي المسكينه ماتدري اني انا كنت لها منقذ من العنوسه والدليل هوسها على انجاب اطفال قبل تتعدى السن 
وتدخل سن الياس اجل في ثلاث سنوات اربعة اطفال حمل واحد منهم توائم وزوجتي الاولى شامته فيني وتضحك ضحكة المكر والخبث وتقول عساك على القوه
ومثل ما قلت لكم اني صرفت النظر عن الامر وبديت احاول اتاقلم مع الوضع
لكن هاجس الثالثه يدور في مخي
ووضع حريمي ما يساعدني اعيش مبسوط تدرون ان كل وحده تتصل وسط الليل تعال ود عيالك تعبانين
مع ان زوجتي الاولى في اولادها الكبار كانت تتصرف وتعطيهم علاجات حسب اللي تقدر عليه والحين لا بس لعانه منها تحب انها تقومني من النوم قم ود عيالك او تخليه يصيح اللين انا اقوم وكلهن نفس الطينه
وانا ابقولكم شيء يارجال ترا الحريم ما فيه وحده تتميز عن الاخرى باي شيء سوي الاخلاق الزينه وهذا هو السبب اللي يحبب وحده ويرفعا او ينزل وحده ويبعدهاورح ارجع ها النقطه بعد ما اخبركم ايش قررت :(
الحياة الخالدة
08-01-2012, 08:17 AM
:telephone: كملي :(
دلة الرسلان
08-01-2012, 08:17 AM
نكمل المهم تزوجت مسيار على شرط مافيه أطفال واللي حصل وماكنت حاسب حسابه ان مسياري طلعت حامل وترجتني اني ارضى بالحمل هذا وصارت تحب يديني ورجليني ورحمتها وقلت الشكوى لله بس انا ابقول لكم ان فيه امور تجبر الواحد انه يغير قناعاته مهوب كله حب لا في وحده ولا كره في الاخرى ابدا بس غصب تجي امور مثل اللي صار مع مسياري وهي والله تستاهل من يضحي علشانها
لانها حبتني انا مهوب مثل الثانيه حابه روحها ونفسها والا اولى اللي نست كل شيء
المهم قلت خلاص وانا ضايق صدري بس امر الله وين اروح منه 
وصارت امها تلمح لي انه لازم اعلن زواجي من بنتها والبنت بعد تقول لازم انك تخبر حريمك لانه خلاص يبي يجينا عيال وعطتني من الوعود انها مارح تطالب بشيء ابدا لامصروف ولا ليله ولا حاجه وان حياتنا رح تكون مثل اول بس رسميه امام الناس وواضحه وقلت خلوني افكر وانا عارف وش نهاية الامرهذا0000
وجلسا اسبوعين بعد خبر حمل مسياري وجانا الخبر المحزن وهو وفاة ابو مسياري لانه طاح في الدرج حق المسجد
المهم وحزنت مسياري وصارت تقولي ترا مالنا الا الله ثم انت
خلاص مالنا احد لااقارب ولاجماعه ولا احد لاننا عائله قليلة الرجال وفعلا وجدت ان اكثر اقاربهم نساء وكبيرات سن
المهم انا قلت ابشري وطقيت صدري لها وقلت انا لك والشر ما ينالك
وصار ابو سعود اللي هو انا في حيره
مدري وش اقول لحريمي ولا وش ابرر ولا وش ادور المهم قلت ابعلم الاولى واشوف
جيت لمها وسلمت وجلست وقلت يا ام سعود انا ودي اقولك على موضوع وضحكت وقالت وش عندك مفرختك طاردتك او زعلانه عليك قلت يابنت الناس حنا كبرنا على ها المواضيع قالت وه وه انت اللي كبرت انا توني بعدي صغيره ومملوحه قلت طيب انا ابقولك اني متزوج مسيار يوم درت وهي تشيش وتهوش تدرون ليه لاني تزوجت مسيار وراك ما اعلنته او تخاف من مفرخك تقصد زوجتي الثانيه ليش ماتزوجت زواج صدق واعلنته للعالم وفرحت قلبي
قلت خلاص هذا انا ابعلنه للعالم كلهم بس اهم شيء تفرحين
قالت ايه الحين صح وزغردت وفرحت وقالت تراني ابعطيها ليلتين هديه من عندي وابزورها
قلت الليلتين مقبولات اما الزياره لا تدرون خفت انها تغير مسياري وتقلبها علي وطلعت من عندها وهو منزاح عني هم كبير ورحت لبيت الثانيه وسلمت وجلست قلت تعالي ابقولك على موضوع قالت خير طلقت ام سعود قلت الله يستر ليه يابنت الناس الواحد ما يحب الشر قالت علشان تفرحني وتصير لنا بس قلت الله يهديك المفروض تحثيني على الخير
قالت كله منك انت اللي وصلتني لكذا اول انا والله ما احب الشر بس انت بتصرفات كرهتنا في بعض
قلت المهم انا ابقولك تراني تزوجت مسيار ما دريت الا وهي تصرخ وتهوش وش فيك من زينك ترا والله ما احد يبيك
بس انا اخذت الاجر فيك وصارت تقول انا ابترك عيالك وابروح لهلي وكلام ما ينقال قلت لها الله واكبر يوم اجي اخطبك وانتي كنتي تقولين عادي الرجال له اربع وتقولين خل ام سعود تزعل لها يومين وبعدين ترضى نسيتي كلامك او يا زيناه للناس ياشينها لكقالت بسانا كامله ومكمله وماناقصني شيء وبعدين وش تبي بنت واخذت واحد معه عيال وش تبي فيه حب لسواد عيونه لا والله انا كنت ابشوف مصلحتي بعد واجيب لي كم بزر قبل يفوتني القطار يوم شفتها كذا عصبت وقلت والله يا ام سعود انها ما فيها شيء واني انا اللي مصقوع على راسي يوم جيت وتزوجت من البدايه بس امر الله والخبال اللي جاني ولا تحسبين انك مميزه في شيء
وعلشان كذا احب اقول لكل زوجه ثانيه ولكل الناس ان والله ثم والله انه لاهو نقص ولا عيب ولا اي امر من الامور
يعيبان الزوجه الاولى عند زواج زوجها والله انها اسباب تافهه وكثيرا ما نسمع عن رجال يعترفون بانفسهم انهم ندمو اشد الندم بعد تفريطهم بزوجاتهم الاوليات
انا هنا ادعو كل زوجه ثانيه ان تعرف ان الرجل لاتهمه المرأة الامن كانت ذات اصل طيب واخلاق عاليه اما موقعها وعددها فلا ينظر له الرجل
سوف اكمل لكم المقطع الاخير
قريبا تابعوني :nice:
بلوتنيوم
08-01-2012, 08:20 AM
صداع
نبي تلخيص في اربع اسطر :)
دلة الرسلان
08-01-2012, 08:25 AM
المقطع الاخير
اعلنت زواجي من مسياري والتي كانت ملاذي عند فراري من زوجاتي وهنا انكشف الغطاء وبدات تمارس حقها في المطالبه بجميع حقوقها وبدات تحاسبني على الساعه والنصف وغيرها صحيح انها اخف بكثير من الثانيه بحكم ان والدتها موجوده عندها وبحكم انها موظفه ولكن لابد وان تطالب وتتأمر مثلها مثل زوجاتي
اما الثانيه فحدث ولا حرج فقد كانت تعتقد انها بزواجي منها قد امتلكتني واخذت صك الملكيه وهذا حط من قدرها عندي كثيرا لانها كانت تحل لنفسها ما تحرمه على خيرها لقد حاربت الاولى وكأنه ليس لها حق في
ولم تتقبل الثالثه وكأنها قد اجرمت ان تزوجتني ونسيت نفسها يوم ان تزوجتني واخذتني من بيتي واولادي ((ولكن هذا الامر كان بسبب ان كل زوجه ثانيه تعتقد ومقتنعه ان الواحد منا لم يتزوج على زوجته الاولى الا وفيها نقص ويتلبسها غرور كبير انها اي الثانيه كامله والذي اعرفه انا من مخالطتي للكثيرين من المعددين اننا عندما نتجرأونتزوج المرة الاولى فنحن نكون قد كسرنا حاجز الرهبه ولم يعد يهمنا احد لو تزوجنا الكثيرات بعد ذلك ولاننا خسرنا فلم يعد هناك شيء نخاف عليه فا الثانيه عندما نتزوج عليها ثالثه لانحمل هما كبيرا لها ولا نخاف خوفنا من الزواج الاول
فنحن على اقتناع انها لم تحبنا كثيرا وانها تبحث عن مصالحها كثيرا ولهذا على اخواتي زوجات ثانيات ابعاد هذا الاعتقاد وان تعرف كل واحده منهن انهن لايمثلن لنا حاجز كبير او مهم فمن رضيت ان تدخل وتاخذ النصف ليس لها الحق في الزعل عندما تعطى الثلث او الربع))الاولى اصبحت بدور المحايد وكانت تتشفى بالوضع الذي كنت فيه وقد ابدت لي تحالف واضح مع الثالثه 
المهم سارت الحياة وكانها بركان شهر يثور وشهر خامد وشهر يناوش بشكل بسيط
كنت اسعد باليوم الذي لايحصل فيه نقاش مع احداهن لان هذا يعتبر ان من عدى يومها ولم يحصل فيه مشاكل انها راضيه وماشيه امورها
اما من ادخل عليها وهي مبوزه ونفسها شينه فاعرف ان يومها لن يمر دون مشكله ونقاش لاينتهي ولها اكون قد استعديت له بانني متعب او معصب وان نفسي بطرف خشمي وهكذ ابدا بالهجوم قبل ان تهجم علي وقد وجدت هذا الاسلوب ناجح كثيرا ولهذا امضي يومي معها بالنوم او الجلوس امام التلفاز او الخروج مع احد لارتاح منها
اصبح لدي 15 ولدا وبنتا وانا لم اكمل من عمري الا سبعة واربعين واخذت قرض من البنك وبنيت اربع بيوت دبلوكس
ووضعت كل واحده في بيت واجرت الرابع وكنت وضعت في المنتصف نوعا من الجلسات والدكات التي اجلس بها لوحدي بعيدا عن زوجاتي واصبحت اجلس فيها ومن تغضبني منهن انام في هذه المجالس بعيدا عنها واريح مخي من مشاكلهن وكثيرا ما هربت من ازعاج اطفالهن الى مجلسي المستقل لانعم بالراحه واعترف لكم انني كثيرا ما رايت احداهن تتلصص في الليل لترى انني ارقد في المجلس ام لا!!!!
وعندما تجدني من تكون ليلتها بعد تلك وفي صباحها انعم بالدلال لانها تعرف انني لم اكن البارح راقدا عند تلك
والان بعد هذه السنوات اجدني وحيدا لا هناك من يهتم بي ولا هناك من يراعيني فقد اضعت انا كل هذافكل واحده منهن تقول عندك من يدلعك وكل واحده تقول انت وش تدور عندي رح ل هاذيك وانا من ضاع حقا
واليوم اجدني كثيرا اتذكر حياتي مع زوجتي الاولى وكيف انني اضعتها
اتذكر حنانها واتذكر محبتها الصادقه واتذكر امرا كثيره لكن لم يعد الامر بيدي
الان من تبتسم لي وتعاملني بعطف وحنان احسها تحسن لي واحمل لها هذا
الان من ادخل عليها وتسلم علي وتبادلني الابتسامه اشكرها لان هذا اصبح عديما في بيوتي رغم انني لا اقصر
وانا الان ارقد في مجلسي واجلس في دكتي وحيدا مع كمبيوتري وتلفازي
ومن هو يومها ترسل لي بقهوتي وبعض الاوقات حتى يرسلون عشائي وكانني سواق
واسمع ضحكاتهم ولعبهم مع اولادهن او مع زوارهن وان وحيدا الا اذا تكرمت احداهن وجاءت ولكن كثيرا ما يحصل
المناوشات بسبب ان احداهن جاءت بغير يومها وانني انا احبها اكثر والا لما تجاوزت حدودها وكثيرا ما اضطررت للحلف انها هي من اتت وانني لا اعلم من هو يومه وتنقلب تلك الساعه الى نار مشتعله اوقفها عند حدها وكلام كثير وتهديدات خطيره وانا الخاسر الوحيد لانني عندما اسعد بعض الوقت تفسد احدهن بقية اليوم بمشكله
ووالله انني اصبحت اظن انهن لايحببن ان يرينني مرتاح
والان في اخر اعترافاتي ادعو كل من قرا قصتي او تابعني بالدعاء لي والرفق بي لانني فعلا اخطاءت يوم تبعت هوى نفسي وخسرت انا ولم اكسب بالتعدد وخسائري كثيره ولاتعد
فاقول لكم ادعو لي وسامحوني
وللنساء اقول من ترى في نفسها انها سوف تحسن لي وترحمني واهم من هذا تكون عقيم لاتلد ومقطوعه من شجره
فانا على استعداد للزواج بها والهجرة بعيدا عن هذا الواقع المرير الذي اعيشه 




هههههه00ههههههههه




وانا اعترف لكم ان السطر الاخير مزحه ولكنها امنيه تتحاشى الخروج من نفسي فلا تهجمون علي




دمتم بخير وسلام 




النهـــــــــــــــــــايــــة








منقووووووووووووووول للعظة والفائدة :nic