زيادة سماكة رقبة الجنين

السلام عليكم ورحمة الله
ابغى اكتب تجربتي مع هذا الموضوع عشان افيد اي وحدة مرت بهذي المشكلة.
واللي مو فاهم انا اقلكم، لمن نوصل الاسبوع رقم 11 بالحمل يبدا الطبيب بطلب قياس سماكة رقبة الجنين الخلفية اي السائل بها وهذا القياس يتم من الاسبوع العاشر الى الاسبوع ال 14 فقط. فاذا كانت السماكة لا تتجاوز 2.5 مم فهذا ممتاز وبعض الدول تقول لازم ما يتجاوز 3 مم زي بريطانيا، انا رحت وكشفت وطلع 3 والاسبوع 12 طلع 3.2 تقريبا، وقالوا ان هذي علامة ان الطفل يكون داون. طبعا تخيلو شعوري. انهرت بكاء عند الدكتور وصار يقول مو شرط هو خمسين بالمية يكون داون وخمسين بالمية ما يكون فيه شي. بس لمن تزيد السماكة احنا نتوقع كذا. لانه اطفال داون اغلبهم عندهم سماكة في الرقبة وهم اجنة.
طبعا عشان اتاكد كان امامي احد ثلاث خيارات: الادق انهم يسحبو من الماء اللي بالمشيمة ويحللوه ويتاكدوا ان كروموزومات الجنين سليمة وهذي اذا سواها دكتور مو شاطر بيسقط الجنين، الثاني اني اسوي اختبار ماترنيتي 21 الموجود بالحبيب وقيمته 6 الاف، ويرسل لامريكا والنتيجة تاخذ من 10 الى 14 يوم وتطلع. والخيار الثالث اني اروح مركز ذرية عندهم اختبار ادق من حق الحبيب بس ناسية اسمه. المهم انا سويت حق الحبيب. ومرت علي 14 يوم كانهم 14 سنة. كانت دموعي ما توقف وكنت ادعي طول الوقت واتصدق واستغفر، واقول حسبنا الله سيؤتينا الله منفضلة انا الى ربنا راغبون واستودعه الله.
في هذه الاثناء راجعت اطباء تخصصهم اجنة كثيير وكان افضلهم دكتور محمد الشيخ بالحبيب العليا وهذا لمن سوا لي السونار واعاد القياس قال انه سماكة الرقبة عندي 3 تماما وهذا يعتبر في حدود الطبيعي وانه الطبيبة اللي سوت لي القياسات في فرع الحبيب التخصصي اخذت القياس والبيبي في وضع رافع فيه رقبته، والمفروض عند قياس السماكة ان يكون الطفل في الوضع القياسي اي انه في وضع مسترخي فيه بدون ما يكون شاد راسه على ورى.
رحت مركز ذرية وقابلت طبيب اسمه سمير عبد الله وهو الافضل على الاطلاق هو يعمل بالمستشفى التخصصي بالرياض بس يداوم عند مركز ذرية يومين بالاسبوع وتخصصه اجنة. وقال نفس الكلام حق دكتور محمد واخذ القياسات وقالنا ان القياسات حقت الحبيب التخصصي غلط واني بحدود الطبيعي وشيك على علامات ثانية لاطفال داون وما لقيها مشاء الله تبارك الرحمن.
وأخيرا طلعت النتيجة








وجات النتيجة سلبي يعني باذن الله سليم. يااااارب لك الحمد ولك الشكر، يا رب لك الحمد ولك الشكر كما ينبغي لجلال وجهك وعظيم سلطانك....
فرحت جدا لكن كان فيه احتمال ان الاختبار مو سليم وجلست شايلة هم الى ان ولدت. والحمد لله جبت نونو بفضل ربي سليم.


حبيت انقل تجربتي للفائدة