حبيباتي اليوم بكتبلكم تقرير متكامل بالصور
لأني لاحظت ان الكثير مايعرف اش المقصود بيوم الأم الزائره!!
وتجي أحياناً وحده من الأمهات تقول المدرسه ارسلت لي بطاقه لزيارة فصل بنتي, وطلبوا مني اسوي فقرات وأنا ماني عارفه ايش اعمل !!
وكثيرات أعرفهم راحوا في يوم الأم الزائره ومجرد وزعوا هدايا على بنات الفصل وطلعوا !!
وكثيرات أعرفهم يعتذرون في يوم الأم الزائره !!
بس انا بصراحه كنت استنى هذا اليوم بفارغ الصبر. لأن له ايجابيات كثيره ويعطي الطفل الثقه بنفسه ويخليه أقرب إلى اصدقائه خاصة لو كان منطوي. وغير كذه والله لو تشوفون فرحة الصغار وخاصة الي يكون يوم امها تلاقي الفرحه والسعاده في عيونها ودها تطير من الفرحه .
فحرام علينا نحرم أطفالنا من هذي الفرحه .
الكلام يطول ويطول بس انا بقلكم اش سويت وإن شاءالله تستفيدون من تجربتي .
اول شي المدرسه أرسلت ورقه مع بنتي فيها دعوه لزيارة فصلها وطلبوا مني أختار اليوم الي يناسبني خلال الأسبوع القادم وحددوا لي وقت الحضور .وكتبوا لي عدد طالبات الفصل لأنهم طلبوا تقديم هدايا رمزيه وبسيطه لطالبات الفصل .
يعني تصير الهدايا مقدمه من بنتي لصديقاتها .
عشان قلوبهم تتآلف ويصيروا يحبوا بعض .
بنتي كانت وقتها في التمهيدي وكان فصلها كله بنات وعددهم 23 . انا شمرت عن ساعدي وسويت الآتي .
جهزت ملابس بنتي يوم كان عمرها شهور وأغراضها الي كنت استخدمها لها في الأكل مثل الصحن والملعقه ,المهم أخذت الأشياء الي كنت محتفظه فيها لأنها شبه جديده وغاليه ع قلبي لأنها أول بنوته كانت لي .
واشتريت قصة الأرنب العنيد .
واشتريت بالونات أوزعها ع البنات في المسابقه .
واشتريت ميداليات أوزعها على البنات لمن اسألهم ويجاوبوا عليّ .
واشتريت لكل بنت كيس وكان بداخله مجموعه من الهدايا حتشوفونها في الصور.
ودبست بطاقه على كل كيس وكتبت فيها عباره أهداء من صديقتكم .... فصل الزهور .
ووصيت محل سنابل السلام يسويلي قاتوه كبيره وعليها اسم بنتي.
واشتريت حليب صافيو بعددهم .
جاء اليوم الموعود..وقبل تروح بنتي الفجر المدرسه قلت لها انا بجي اليوم فصلك وبسويلك مفاجأه وبجيب هدايا توزعينها على صديقاتك ودخلتها المجلس وفرجتها في الشغلات كلها وخليتها تشوف القتوه وتتهجى اش مكتوب عليها
يااعمري بغت تموت من الفرحه حسيتها شوي وتبكي من الفرحه , طبعاً هي عارفه من اول اني بروحلهم وتشوفني من كم يوم أحوس وأشتري بس ما خليتها تشوف كل شي ولا علمتها بالتفاصيل عشان ما تعلم بنات الفصل وعشان ما تطفشني بالأسئله وتعرفون الصغار مااافيهم صبر .
المهم أخذت لبنتي صوره تذكاريه مع الهدايا والشغلات وسلمت عليها وخليتها تروح مدرستها وقلت لها قلي لصديقاتك ماما بتجي اليوم وتسويلكم حفله ومفاجئات .
لمن جاء على الساعه 10 أخذت أغراضي ورحت للمدرسه .
أول مادخلت الفصل سلمت على المعلمه والطالبات .
أعطتني المعلمه كرسي لي وكرسي لبنتي وجلسنا انا وياها قدام السبوره بنتي وقتها انتــــفخ راسها هههه
والبنات صاروا قدامي كلهم .
المعلمه جلست في آخر الفصل ونادت معلمه ثانيه تحضرلي زيارتي .
انا وقتها حسيت قلبي يطربق كأن عندي درس نموذجي .
بدأت اتكلم مع البنات وكانت البدايه كالآتي ...
تعرفت على اسماءهم وحده وحده
عرفتهم على بنتي وطبعاً هي جالسه جنبي , وقلتلهم اسمها بالكامل وعدد أفراد أسرتها وكم ترتيبها في الأفراد.
وبدأت اتكلم عن برنامج بنتي اليومي وأنفخ وأمدح فيها وهي عيونها بتطاير من الفرحه .
يعني اقلهم كيف انها تفطر فطور صحي قبل تجي المدرسه وتقول أذكار الصباح وتودعني وإذا جات أول ما تدخل تسلم علي وتحل واجباتها وتحب أخوها وتلعب معاه وترتب غرفتها وتساعدني وتنام بدري وتقول أذكار المساء و..و..و...ومن هذا الكلام الحلو.
لازم نمدح الطفل بهذي الطريقه قدام الآخرين عشان يتشجع أكثر لفعل السلوكيات الصحيحه والمحافظه عليها . وطبعاً خلال ما اتكلم معاهم اناقشهم واسألهم من تسوي كذه زي بنتي ومن تقول الأذكار زي بنتي وزي كذه ,يعني اتكلم وأسمعلهم كمان .
بدأت في الفقره الأولى وطلعت لهم جميع أغراض بنتي يوم كانت طفله وأشرحلهم هذا لبس النوم وهذا لبس الشتاء وهذا لبس الصيف وهذي الشراريب اش فايدتها في الشتاء { للمعلوميه كان عندهم اسبوع الملابس وقتها}
ولو تشوفون كيف تجمعوا البنات على الملابس والأغراض فرحاانين فيها وبنتي فرحتها أكثر وأكثر , ويحليلهم ماكانوا مصدقين ان بنتي في يوم من الأيام كانت بهذا الحجم!!
الفقره الثانيه..طلعت قصة الأرنب الجائع وفتحتها قدامهم وحكيتلهم الحكايه وهم يناظرون في الصور ,طبعاً انا اشتريت قصه حجمها كبيـــر ورسوماتها واضحه وكلامها قليل عشان الكل يشوف ويستوعب .
بعد ماخلصت من القصه رجعت لأول صفحه وأحط يدي على الصوره واسأل سؤال وتجاوب عليه وحده فيهم , وقتها انا أعطيت بنتي كيس البالونات وقلت لها اي وحده تجاوب أعطيها بالونه ,وسألتهم كلهم بالدور وحده وحده طبعاً الأسئله كلها كانت من نفس القصه الي حكيتها لهم ,وطبعاً بنتي أول وحده اسألها في اي فقره وأول وحده تآخذ هديتها في اي فقره ,لأن الأسبوع اسبوعها. وطبعاً ربطت القصة بالواقع يعني قلت لهم انتم لاتكونون مثل الأرنب العنيد ولازم تطيعون ماما ومن هالكلام .
الفقره الثالثة رسمت لهم على السبوره سبينج بوب
وعيون وضعت فيها النقطه وعيون بدون نقطه , وأختار طالبه طالبه وأقومها عند السبوره وأغم على عينها وأعطيها القلم وأخليها تحط النقطه داخل العين وبعدين أعطيها هديتها الي هي عباره عن ميداليه وكلهم أعطيتهم الي تصيب والي تخيب ,وأول وحده خليتها تلعب طبعاً بنتي .
بكذه خلصت فقراتي .
بعدين قلت يله الحين وقت الحفله
فرشت السفره ووزعت الصحون عليهم والمناديل والملاعق والشوك وخليت بنتي توزع عليهم الطرابيش وحطيت لهم القتوه ولمن شافوها ما تسمعون الا الصيحات والضحكات ,كانت الفرحه واااضحه عليهم مررره وخليتهم يقرأوون اش مكتوب عليها وقطعتها لهم ووزعتها في صحونهم وبنتي توزع الحليب .وأعطيت كل معلمه قطعة قاتوه .
وذكرتهم بالتسميه وبآداب الطعام وخليتهم ينشدوون مع بعض وصورتهم صور ثابته وصور فيديو .وجلست انصحهم كيف لازم في البيت يساعدون امهاتهم ولازم كل وحده تشيل صحنها وملعقتها وما يخلون كل الشغل على مامتهم.
ولمن خلصوا خليت بنتي توزع عليهم أكياس الهدايا والله لو تشوفون فرحتهم , ياعمري عليهم وكلهم يشكروني ويقولن حفلتك احلاا حفله ويومك احلاا يوم ويقولون لبنتي أحسن شي حفلة امك مره حلوه عجبتنا كثير ولله ماصرت أعرف اسمع لمين ولا مين كلهم يتكلمون مع بعض فديتهم .
والمعلمتين الي حضرولي شكرووني وقالوا بصراحه يومك مميز ورائع , وقامت تدعيلي معلمة بنتي تقول شوفي الفرحه الي دخلتيها بقلوب البنات . وكل وحده أخذت هداياها وانطلقوا على الساحه , وانا لميت أغراضي وأخذت بنتي ومشينا وكانت زياره مووفقه والحمدلله .مستحيل انسى هذا اليوم من كثر فرحة بنتي فديتها, وكل شي وثقته بالصور وحملته في سي دي وإن شاء الله اعطيه بنتي لمن تكبر وبكذه تكون أحلى ذكرى لها وهي في مرحلة التمهيدي. الحين بنتي ماشاءالله في الإبتدائي ودايم تذكر هذا اليوم ماهي قادره تنساه لبي قلبها .
الحين اترككم مع الصور ياحلوات
هذي صورة دفتر تلوين كان من ضمن الهدايا الي داخل الكيس
وهذي صورة الصحون والملاعق والشوك الي وزعتها ع السفره
وهذي صورة الطرابيش الي خليت بنتي توزعها على البنات
وهذي صورة البطاقات الي دبستها في الكيس وكتبت فيها عبارة الإهداء
وهذي صورة الكيكه