زيت خطير للشعر

مرحبا خواتي
حبيت افيدكم بزيت استخدمته وكلمة شوية روعة عليه
قبل كل شي اذكروا الله وصلوا على النبي وادعوا لي انه الله يرزقني العلا من الجنة ومرافقة نبيه عليه افضل الصلوات واتم التسليم

قبل ثلاث شهور شعري تساقط كثير يجوز من حبوب تاخير الدورة يوم سرت العمرة
وصلعتي بينت حتى اللحمة تشوفيها شي مقرف بصراحة ومحزن في نفس الوقت

بالعادة احب زيت جوز الهند باراشوت الازرق واحط بين الفراغات زيت انوب
بس مشكلة انوب انه غرشته صغيرة مرة وما يصلح لكل الشعر وفيه تحفظات للاستخدام وما يصير تنامي فيه
والدتي الله يحفظها احيانا ترتب غرفتي وشافت زيت انوب فسألتني عنه
فقالت لي انه ريحته كريهة ويذكرها بزيت كانت تستخدمه ايام زمان قبل التقاعد ونصحها فيه زميلها الهندي وتقول انه كان شعرها ثقيل مرة وطويل واسود(ماشاءالله)
بالفعل انا اذكر شعر امي غليظ كان بعدين هي توقفت عنه وصارت تحط نارجيل ابو علبة خضرة
المهم ..انا ما كذبت خبر وشريت منه وحطيت
بعد اسبوعين ماشاءالله تبارك الرحمن حسيت بالفرق حتى خواتي بعد شهر قالوا لي انه شعري متغير طبعا الى الاحسن
انا على بالي انه الشامبو هو اللي سوا كذا فقلت خل اجرب واحط باراشوت
وتغير عن اول..فعرفت انه زيتي الحبيب هو اللي كان مسوي هاللمعة والصحة(ماشاءالله ولا قوة الا بالله)

ادري اني طولت بالكلام بس احب ادردش معاكم علشان تحبوا الزيت مثلي
نجي لمواصفات الزيت وجدولي:
اولا الزيت اسمه(ramtirth)
ومكتوب عليه براهمي اويل وصناعته هندية

العلبة لونها اخضر ومرسوم عليها بنت جايبة شعرها على صوب <---ياحليل الهنود اذا بغوا يسوا دعاية

الزيت لونه مثل دابر اخضر غامق ولو قلبتي الغرشة بتشوفي اعشاب تحت متراكمة اظن انها نفسها اللي بزيت انوب علشان كذا امي استرجعت الذكريات هههه
الريحة نارجيل بس شوية مختلف عنه اعتقد بسبب الاعشاب
بس يظل ارحم بكثير من ريحة دابر
استخدمته ثلاث مرات بالاسبوع بانتظام(وهذا ضروري علشان تبين النتيجة)
الاحد والثلاثاء والخميس ازيته بالليل وانام فيه واغسله علشان غسل الجمعة
وهالشي لكل الزيوت علشان تبين النتيجة حطي منه ثلاث مرات بالاسبوع ولو تلاحظين كل الزيوت يكتبون على العلبة نفس هالكلام
سعره نص ريال ومتوفر في كل المحلات وموجود بس محد يعبره

حبايبي حابة انبه لشغلة...وحطوها حلقة في اذنكم
عليكم بالصبر ثم الصبر ثم الصبر والمداومة
انتم تحطون الزيت اسبوع وتبغي مفعول السحر!!
ما يصير..لازم تصبري عليه الصابر ظافر حبايبي مثلما قالوا الاوليين
نحن وش ضيع شعورنا غير التغيير كل يوم
مرة دابر ومرة زيت الثوم ومرة زيت الحية
هذا مو تقليل من شانهم بس اللي قصدته داومي مثلا على دابر اقل شي 3 شهور وهكذا
الصبر ثم الصبر ثم الصبر
انا لي الحين شهر ونص استخدمه
والحمدلله وبفضله خلصت غرشة وحدة وشريت الثانية وان شاءالله الثالثة والرابعة الى ما يصير شعري كشة
في شغلة بعد انا اسويها لشعري اني احنيه مرة او مرتين في الشهر والحنة ما احط فيها اي شي

الحنة العمانية الاصلية معروفة بفوائدها عجنيها مع الماي وحطيها اقل شي 4 ساعات على شعرك وادعي لي ..والله لون ولا احلى والريحة روعة لاو اللمعة والقوة بالشعر (لااله الا الله)ما يحتاج ا تكلم

المهم حبيباتي...حبيت افيدكم باللي اكرمني فيه سبحانه وتعالى عن طريق والدتي الله يطول بعمرها ويحفظها
للعلم منقول بس حبيت أعرف حد سمع عن هالزيت أنا شريته أمس وحبيت أسأل قبل استخدامه