زيوت عطرية لازالة اثار الحبوب وغيره!!

سلااام عليكم جميعا
مشكلة الحبوب كبيرة و الاكبر منها هي الاثار السوداء الشينة اللي على الوجه او الظهر و غيره:09: !!
و انا تعبت من اثارها اللي في جسمي و لقيت معظم الخلطات هنا للوجه:( فرحت ادور في مواقع اجنبية و لقيت موقع حلو كاتب عن فوائد بعض الزيوت للاثار (تنحط مباشرةعلى الاثر) وهذي سهلة علي اني احطها على ظهري او اي مكان ثاني:icon28: . . المهم طرت و ترجمت لكم وش يقول:

1\زيت بذور كوز الورد (rosehip seed oil) هذي ما قد سمعت فيها بس سمعت عن شاي كوز الورد انه مرررة مفيد للجسم و للبشرة بشكل عام
كاتبين في الموقع انه يزيل حتى اثار الجروح و انه يخفف من تجاعيد البشرة<< بس خففوه بزيت لوز لانه مركز

2\جل الصبار و هذا سهل و نعرف وين نلقاه :D << قاعدة احطه لي فترة بعد الصنفرة بس توني بادية فيه يعني لا تسالون عن نتايجه ما بعد طلعت

3\ زيت الخزامى (اللافندر) يقول انه اكثر الزيوت المستخدمة للعلاج << ريحته حلوة و يريح النفس وهو زيت آآآمن ان شاء الله يعني هو الوحيد من الزيوت العطرية اللي تقدرون تحطونه على البشرة بدون تخفيف او خلطه مع شي ثاني بس تقدرون تحطونه على زيت لوز مر (احتياطا) و هذا عن تجربه شخصية ضفت زيت خزامى على زيت اللوز لاني ما كنت حابة ريحة اللوز و صدق توحد لوني بس ما كنت دارية ان الخزامى لها دخل كنت احسب ان اللوز هو السبب الاساسي بس الحين بعد ما جربت زيت اللوز لحاله شفت الفرق بالتفتيح .. صدقوني بنات يوم استخدمته مخلوط بالخزامى مرررة فرق يوم استخدمته لحاله و بعدين حلوة ريحته :D

4\corsica << هذي ما عرفت وشهي صراحة بس يقول ان لها خواص تجديدية للبشرة (زي خواص الصبار يعني )

5\عجينةمن خشب الصندل وموية الورد توضع قبل النوم و تغسل بالصباح << اللي اعرفه عن خشب الصندل ان خواتنا السودانيات يستخدمونه و معروف عنه انه يشد البشرة بشكل ملحوظ .. بس هنا مدري شلون نستخدمه هل نطحنه ونخلط معه موية الورد او شلووون؟؟

6\ عصير الخيار يوضع لمدة 20 دقيقة ثم يغسل << سهلة ذي خاصة للوجه

و بالنهاية قال الموقع انه اهم شي الاستمرار مو تبدون فيه و توقفون و تنقلون لوصفة ثانية و على هذا الحال! عطوه فترة شهر او شهرين عشان تشوفون النتايج<< عارف لنا هههههههههه


طبعا انا ما وقفت عند هالموقع حست زود و طلعت بكريم اسمه ميديرما Mederma يقال انه المنتج الاول اللي ينصحون فيه الدكاترة لازالة الندبات (حتى الجروح).. بس ما اتوقع انه موجود بالسعودية :(
يا ليت يا بنات اذا احد يقدر يسال لنا عنه و اذا في بنات في الخارج يعرفونه او سمعوا عنه يا ليت ما يبخلون علينا باي معلومة عنه لاني حسيت حسيت حسيييييت انه كويس:D


هذا كل اللي عندي وشرايكم نجرب و الا ؟؟
و عقبال ما اشوفنا كلنا حلوين و قمرات و نكون احلى ناس بعيون ازواجنا الحاليين او المستقبليين <<ما بعد اعرست:angry:


*** اللي تبي تستخدم اي معلومة و تنقلها تذكر انها ماخذتها من حواء***