اليوم راح أكمل لكم عن جولتي في سوق الصواريخ
طبعا الموضوع الأول كنت مخصصته عن الكنب وهذا رابط الموضوع
http://forum.hawaaworld.com/showthread.php?t=2227374
أما هذا الموضوع راح أخصصه زي ماوعدتكم عن غرف الأطفال
أنا عندي بنت وولد البنت عمرها خمس سنين والولد عمره سنتين المهم فكرت إني أفصل لهم غرفة نوم لوحدهم ولأني في شقه حطيت لهم أكبر غرفه حجمها ( 6*5 ) المهم رحت لمحلات الموبيليا الخاصه بغرف الأطفال لقيت أسعارهم غاليه .
يعني سريرين مع كومدينتين مع دولابين ملابس مع تسريحه للبنت سعرها ( 4700 ) ريال طبعا أنا تفاجأت وإنصدمت لأنها تعدت الميزانيه إللي أنا مخصصتها لغرفة أطفالي بكثييييييير .
المهم لفيت أكثر من محل نفس الأسعار تقريبا . وبعد تفكير طوييييييييييييل كلمت زوجي على أساس ينزلني (( لسوق الصواريخ بجده ) المهم توكلنا على الله ونزلنا طبعا يابنات مهما راح أوصف لكم عن الموديلات والأشكال والألوان اللي لقيتها ماراح أوفيها حقها أبدا .
يعني في ( الطائف ) موديلاتهم وأشكالهم والوانهم ماتتجاوز عدد الأصابع ومع كذا أسعارهم ناااااااااار .
بعكس جده أشكال وألوان مررررررررره خطيييره وأسعارهم جدا معقووووووووووووله .
وقبل لا أخبركم عن الأسعار لا تجي وحده وتقول خشبهم أو شغلهم ماهو كويس . صحيح للآن ماخلصت غرفة اطفالي ولاجربتها . لكن أنا سألت عن نوع الخشب وقال إنه ماليزي وطبعا قال إن الخشب الماليزي في منه أنواع غاااااليه مررره لكن النوع اللي راح يصلحوا منه غرفة أطفالي هو إللي أغلب المحلات يستخدمونه وصدقت كلامه لأن العامل اللي في محل ( الطائف ) قال لنا نفس الكلام .
المهم فصلت لأطفالي بمبلغ ( 2500 ) ريال فقط . مع العلم إن المبلغ كان في البدايه ( 2000 ) ريال .لكن زاد السعر علينا لأن الموديل إللي أنا إخترته يبغى له شغل أكثر .
الشئ الثاني دولاب الملابس خليته ثلاث أبواب علشان يكفي والعمق خليته ( 50 ) سم علشان ينفعهم لفتره طويله مع إن الغالب يكون عمق الدولاب للأطفال ( 40 ) سم .
الشئ الثالث إحنا شرطنا عليه إن السرير يكون عليه ضمان خمس سنوات ماينكسر محل الإسفنج علشان إنتم عارفين الأطفال والنطنطه على السرير فهو قال أنا راح أعطيكم ضمان بدل الخمس سنوات عشر سنوات لكن أزيد عليكم في كل سرير ( 100 ) ريال قلنا ماهو مشكله بس كيف . قال راح أحط لك داخل كل سرير صندوق خشبي نحط الإسفنج عليه وشرح لنا الفكره ومع إني مافهمتها كثير لكن حسيت إنه واثق من كلامه . بس بكذا ماراح تقدر تحط لك أدراج تحت السرير لأني كنت طالبه يحط لي أدراج تحت السرير . فقلت له ماهي مشكله خلاص بنلغيها مقابل أضمن سلامة السرير لفتره طويله .
وعلى فكره أهلي لما عرفوا طلبوا مني أفصل لهم أربع غرف كلفتهم ( 4000 ) ريال فقط .
وبالنسبه للشحن إنتي على كيفك إذا تبغين تشحنينه من خارج المحل بس بكذا ماراح يركبون لك الغرفه يعني راح تخسرين أكثر . لكن إذا شحنتي من خلالهم راح يرسلوا لك نجارين من عندهم يركبون لك الغرف مجانا .
بالنسبه لنا إحنا إتفقنا معاهم يشحنون لنا الغرف وكان عددها مع غرف أهلي ( 6 غرف ) وكان قيمة الشحن ( 300 ) ريال مع التركيب لأنهم راح يوصلون لنا الغرف للطائف في سيارتين لأن سياراتهم على كلامه ماتتحمل عدد كبير .
الحين أترككم مع الصور وزي ماقلت لكم السوق ملييييييييييييييان من كل شكل ولون أتوقع كل اللي يخطر ببالك من غرف الأطفال تلاقينها عندهم وطبعا لما تختارين الموديل لك الحريه في تغيير الألوان والمقابض بدون مايزيد عليك في السعر .
تفضلوا بعض الصور اللي قدرت أصورها لكم مع إني تمنيت إني صورت لكم كل إللي شفته لكن من كثر ماصورت خلص شحن جوالي وطفى وأنا في السوق وجلست طووول الوقت مقهوووووووووره . لأن فيه أشكااااااال مرررره حلوه لكن البركه في الموجود .
لاني اعرف ناس كثيير مايأثثون الا من جده بس من وين مااعرف ...