سأخبركم عن مشكلتي ... وتجربتي التي انتهت قبل أن تبدأ مع الحقن المجهري

السلام عليكم ورحمة الله وبركاته

كيفكم يابنات ان شاء الله بخير ...

يمكن كثير منكم مايعرفني لأني ما اكتب كثير لكن أنا أعرف كل وحدة منكم تكتب هنا وأتابع مواضيعكم واهتم بمشاكلكم وأفرح مع اللي تفرح منكم وأدعي للي حزينة أو فيها مشكلة وإن كنت ما أشارك كثير بمواضيعكم لكن يعلم الله إني دئماً ادعي لكم في سري

لأني ببساطة عايشه وضعكم وحاسة بكل اللي تحسوا فيه ...

أنا متزوجة من أكثر من سنة وثمن شهور وإلا الآن ماحملت ...في البداية ما أشغلت نفسي بالموضوع لكن بعد ماكملت سنة زواج قررت أشوف وش المشكلة
.
.
سويت تحاليل فقط وطلعت عندي الغدة الدرقية فيها كسل وهذا عندي من قبل الزواج بس كنت مهملة في العلاج
أخذت العلاج وكملت مشوار التحاليل

دكتوري رفض يسويلي أي كشف لين أول يسوي زوجي تحليل

ولله الحمد من قبل ومن بعد طلع عند زوجي ضعف بالحيوانات المنوية

وكنت كل ما أروح للدكتور وأقوله طيب أنا متى بتكشفون علي يقولي بعدين أنت من تحاليلك الأولية ماعندك مشكلة أول شي أعالج مشكلة زوجك وطبعاً مراجعتي في مستشفى حكومي وانتم عارفين طولة بالهم يعني بين الموعد والموعد أقل شي شهرين إذا مو أكثر

طبعاً بديت أهتم بالمواضيع الخاصة بضعف الحيوانات المنوية وعرفت أنه نسبة العلاج لهالحالات تكون ضعيفة وأن الحل هو أطفال الأنابيب أو الحقن المجهري

وبما أن العمر يجري والفرص تقل قررت ما أتردد أبداً فيها ولا أتأخر

بدأت البحث عن أفضل المستشفيات وأفضل الأطباء واخترت الأفضل وفي شهر ذو الحجة راجعت في الرياض وقابلت الطبيب وأعطاني فكرة عن العملية

وقررت إني أسويها في شهر واحد عشان أقدر استفيد من إجازة نصف الترم لأني مدرسة

المهم حسبتها باليوم والساعة والدقيقة والثانية ... متى بتجيني الدورة ومتى آروح الرياض عشان أبدا الإبر التنشيطية ومتى أرجع لدوامي ومتى آخذ إجازة عشان عملية السحب والترجيع ...

طبعاً خلال كل هذا الوقت ماتركت الدعاء ولا الإستخارة

لكن أنت تريد وأنا أريد والله يفعل ما يريد .... الدورة هانم جات على غير موعدها:eek: مع إنها ماشاء الله منتظمة عندي والظاهر إنها من الحالة النفسية والتوتر والتفكير

جات قبل موعدها بخمس أيام

وبدل ماأسافر الرياض يوم الخميس صار لازم سافر بوسط الأسبوع

أول ماجاتني الدورة أتأثرت واتنكدت وقلت خلاص كل شي خرب ... وقلت يمكن إنها إشارة إني أوقف
حتى زوجي مسكين نكدت عليه

بعدها استغفرت الله وفكرت قلت ليش لا ...أروح بكره الرياض مايفرق آخر الأسبوع عن وسط الأسبوع المهم ...اتسهلت كل أموري اليوم الثاني وأخذت إجازة ليوم من دوامي

ونزلت الرياض ورحت المستشفى ...

طبعاً كنت مكلمتهم ومعطيتهم خبر عن موعد دورتي وسولي أشعة تلفزيونية

وقد ماكنت شايله همها لأنها أول مرة إلا إن ربي يسرها لي وتمت على خير ...

حسيت بشوية ألم وقلق خصوصاً إن الممرضة ضغطت كثير على أسفل بطني من جهت اليسار وصارت تكلم زميلاتها بس مافهمت وش المشكلة

لكن عرفت إن في شي لأن هالمنطقة توجعني من زمان وكنت احسبه ألم تبويض:(

المهم انتظرت فترة طويلة لين دخلت على الدكتور وزوجي كان صايم وافطر إلا كاس موية واحنا في المستشفى من 5 العصر مادخلنا للدكتور إلا سبع ونص

كنت تعبانة وطفشانه وسألني إذا كانت أول مرة أسوي كشف في حياتي قلتله ايه

فقال إنت عندك كيس دموي كبير على المبيض وضاغط عليه ومانقدر نسوي عملية حقن مجهري لأن المبيض مابينتج بويضات عشان نسحبها ومبيض واحد مايكفي ... ولازم عملية منظار عشان نشيله
:44:

كان الدكتور يتكلم وانا حاسه براسي بينفجر الصرررراحة انصدمت كنت مستعدة أبد ابرنامج الحقن واتفاجأ بانه حتى الحقن المجهري مابقدر عليه

ماقدرت أسمع وش يقول قعدت أستغفر بيني وبين نفسي وأقول لاحول ولا قوة إلا بالله

المهم طلععع الدكتور وقال فكروا ...وراح يسوي عملية ورجعلنا بعد أكثر من نص ساعة

كنت أبغى استفسر منه عن العملية وأشياء كثيرة مخوفتني ...

لكنه كان معصب ومستعجل ورد علي بنرفزة ويقول يالله الآن تقولوا لي تبغوا عملية ولا لا ...

وانا ما أقدر أقرر بلحظتها لازم أقرا عن المشكلة لازم أجمع معلومات وقبل كذا لازم أفكر واستخير

قام قال خلاص فكروا برى أنا عندي مريضة وهو اللي مأخرنا أكثر من ثلاث ساعات بالمستشفى بخل علينا بشوية وقت:icon36:

كنت متحمسة أسوي عنده العملية ولكن انكسر خاطري منها ومنه

غير كذا إذا سويت عملية المنظار بيشيل نص الميزانية اللي كنت شايلتها لعملية الحقن المجهري

خرجت حزينة ومكسورة ومحتارة ...

وما أقول غير اللهم أجرني في مصيبتي وأخلفني خيراً منها


كتبت لكم قصة حياتي وأرجوا المعذرة على الإطالة

لكن صدري ضاق ... وماعندي أحد أشاركه همي

أرجو منكم الدعاء لي

واش تنصحوني فيه

واذا أحد فيكم يعرف معلومات عن الكيس الدموي على المبيض أو قد يكون ما يسمى بالبطانة المهاجرة لا يبخل علي

لا إله إلا أنت سبحانك إني كنت من الظالمين

استغفر الله وأتوب إليه

ربي لا تذرني فرداً وانت خير الوارثين