.
.
.. بـسـم الله الـرحـمن الـرحـيم ..
.. السلام عليكم ورحمة الله وبركاته ..
.. مساءكم / صباحكم سعادة ورضا من الله ..
حابة أكتب لكم اليوم مآسآة أحزنتني رغم إنها ما تخصني وما هي لي ,
بس شعرت فيها وكأنها قطعة من قلبي ..
جت بنتي أمس من مدرستها وكـ عادتها تسرد علي موجز حكاويها وأخبارها
في المدرسة فترة ما أكون في المطبخ ..
بس اليوم ما دخلت لي فتحت لها الباب وحضنتها والبنت ساكتة ..
تركتها ورحت أكمل شغلي و انتظرها تدخل علي في مطبخي مثل ما عودتني , بس ما صار ..!
تركت إلي في إيدي ورحت لـ غرفتها وأسألها اش فيكِ حبيبتي .. تعبانة ..؟
ردت : لا ما فيني شيء ..
وأقلها سارونة وين حكاويكِ الحلوة , ما تخبينها إلا إذا كنتِ مريضة ..
ابتسمت .... ومن هالإبتسامة قتلها : قومي تحممي يا حلوة ,
وصلي الظهر ونامي شوي , والعصر أقيمك ..
قالت : طيب وخرجت من عندها ..
وهي رايحة للحمام الله يكرمكم وقفت شوي وجلست تطالع فيني , وكأنها تبغى تدخلي ومترددة ..
وشوي ... جتني ودموعها تنزل ..
استغربت قتلها مالك يا بنتي .. صاير معاكِ شيء ..؟
طالعت فيني وسكتت عرفت إنه فيها شيء ..
أخذتها ورحت لـ غرفتي وقلبي بغى يوقف ..
وقتلها سمي بالله واهدي واتكلمي وخليني أفهم منك ..
قالت : ماما تعرفي رفيف ..؟
قتلها : إيوا مالها ..؟
قالت : هي دايما تجيب معاها آيفون تقول حقها ..
بس ما كنت أعرف إنو تصور فيه الأبلات ...!!
قلتها ... إيش ..؟ قالت : تصور الأبلات ..
قلت : لا حول ولا قوة إلا بالله ..
قتلها كيف , وليش وحكتلي كل الموضوع ..
وبعدين قالت اليوم شفتها تصور الأبلات وهما واقفات عند فصل سنة ثالث , وبلغت عنها ..
قتلها كويس , خير ما عملتِ ..
قالت : بس جابت صديقاتها الكبار وضربوني ..!
قتلها معليش إنتِ أنكرتِ منكر ولك الأجر من ربنا ..
و حروح معاكِ بكرا وأكلم أبلتك وأعرف منها ..
رحت اليوم وشفت معلمتها و على طول عرفت إني جيت عشان سالفة أمس ..
وقالت الحمد لله البنت صحيح كانت دايم تجيب آيفون من غير ما ننتبه لها ,
لأنها كانت تخيبه داخل مريولها ..
بس فتشناهـ ما فيه صور غير صورها وعائلتها وما لقت تصور فيه أحد بالمدرسة ..
واعترفت هيا بكذا ..
قتلها الله يطمن قلبك وسألتها وين أم رفيف جت , درت عن سالفة بنتها ..؟
قالت : طلبناها هاتفيا بس قالت ما فيها تقوم الصبح وتجينا :
واختصرت دورها ك أم في هالسطرين :
أعرف بنتي فـاشلة ويجي منها أكثر ..
خذوا الآيفون وكسروهـ لا ترجعونه معاها ..!!
سألتني المعلمة وش رايك في كلام الأم ..؟
وعشان لا اغتابها اعتذرت من المعلمة عن الإجابة ..
ومن داخلي مقهورة على هالبنت الصغيرة ..
بنت موهوبة ولها حس فني جميل وضاااع مع الإهمال ..
.
.
بنتي يا أمهات يا غاليات صف رابع وزميلتها معها بـ الصف ..
أعمارهم تسع سنوات يعني لازالوا أطفال ..
تتوقعوا من أفسد على رفيف طفولتها لـ درجة تطارد ورا معلماتها عشان تصورهم ..؟
و للأسف إنه رفيف هنا مو موضع اتهام ..
و عتبي على أمـها وعلى كل أم تخلت عن مسؤولية التربية ..
ومن هالموضوع ودي أدردش معاكم ونخرج مع بعض بأكثر صدق مع أنفسنا ..
ونعترف إنا قد نفشل في تربية أولادنا في مواقف كثيرة وأمام سلوكيات كبيرة ..
ومن هالإعتراف ماراح يخلينا كبريائنا إنا نكبرهم على الغلط ونحملهم إياهـ ..
وأقولها لكم يا غاليات بـ مجرد ما نعترف بفشلنا أمام أي موقف خاطيء ,
أو سلوك مزعج راح نكسب وقت في إصلاح هذا الخطأ وتقويم السلوك ..
وراح تنجحون بإذن الله مستقبلا تعرفوا ليش ..؟
لأني متأكدة إن كل أم مؤمنة من داخلها إنها مربية ناجحة فما بقي إلا إنكم تشعرون بسهولة هالأمر ..
التربية يا أخوات متعة وليست عقدة ..
متعة لها أساليب , وخطوات وطرق وفنون , عشان تنجح ..
ومن خلال هالمتعة راح تخرجين أجمل لوحـة من إيدينك وتتركينها للزمن إلا هي { أولادك ..
فكيف نطالب إحنا بمجتمع حلو وراقي وصالح إذا كان مو قادرين من أساسه نخرجله أجيال يعتمد عليها ..
تعرفي وش هي بوادر نجاحك ..؟
- إنك تقنعي نفسك إنك أم مسؤولة , قادرة على بناء طفلها بناءً
- إجتماعيا ودنيا وأخلاقيا ودراسيا ..
- وضروري أيضًا إن تحطي في اعتبارك إن لكل طفل شخصيته تختلف عن غيرهـ عن أخوانه ,
- أقاربه , أصدقائه ..
- ومن شخصيته هذي تمسكي أول الخيط ,
- فـ تفجري طاقته , وتكتشفي مواهبه , وتدعمي قدراته , وتعززي قيمه ..
.
.
راح تواجهك متاعب كثير وخاصة بـ السنوات الأولى من عمر ولدك والي يتميز فيها بـ العناد والعصبية ..
هنا أقولك دورك يا غالية إنك تضبطي نفس طفلك وتتحكمي فيه ..
العناد وباقي السلوكيات ما تيجي من فراغ ..
هي نتاج موقف تعرض له , أو تصرف قادهـ لكذا , أو قدوة أمامه يقلدها ..
فـ اعرفي إنتِ كيف تدخلي لولدك وتخلصيه من إلي هو فيه ,
بحكمتك وبمجهودك وَ بكونك مثله الأعلى في كل تصرفاته ..
وركزي يا حبيبة على الأخيرة لأنو ما ينفع إنتِ تعصبي وتيجي تطلبي من ولدك إنو ما يعصب ولا يصرخ ..!
طيب العوامل والعوائق من حولنا كثيرة ومو قادرين نربي براحتنا ونتعذر دايما بالمجتمع إلي يخرب ويدمر ..
هنا أقولك عزيزتي :
إن البيت هو الأساس للتنشئة ..
ومن هالبيت يخرج الطفل للمدرسة , للشارع ولغيرهـ ..
فكل وحدة فينا تشوف كيف بيتها وهل هو مهيأ عشان يربي أطفال ؟
لو دورنا ورا حفظة القرآن والناس المبدعة , وأئمة المساجد وغيرهم ..
راح نلقى إنو بيئتهم بيئة صالحة , أينعت نماذج صالحة ..
وحتى لما خرجت للمجتمع المخرب المدمر ما تأثرت ليش ..؟
لأنها و ببساطة تأسس صح في تربة صالحة للزراعة ..
.. أختي الغالية ..
تعبك من المفروض يكون في الخمس السنوات الأولى لأنو بعد كذا ما عاد تربية ..
من ست سنوات وفوق المفروض نعدل ونصلح أخطاءنا في التربية ومو نرجع نربي ..!
ومؤسف إنو نشوف ناس كبيرة ولازلوا أهلهم يربوا فيهم ..
كلوا كويس , ناموا كويس , بطلوا شقاوة , لا تكببوا على ملابسكم , سلموا ع الكبار ...
ماعاد تنفع هالأشياء لأن المفروض تكون مخزنة في ذاكرة الطفل منذ نعومة أظفارهـ , ويعملها تلقائيا من نفسه لمن يكبر ..
ولكن لا بأس ما راح أحطمكم وحقول :
شيء خير من لاشيء و إلي ما أدركناهـ راح ندركه مع العزيمة بإذن الله ..
.
.
تذكروا أخياتي دايما قول عمر بن الخطاب رضي الله عنه وأرضاهـ :
" لاتربوا أبناؤكم كما تربيتم فهم خلقوا لزمان غير زمانكم" ..
شوفوا متطلبات أولادكم المتزامنة مع هالعصر الحاضر ما أقولكم لا ولكن ...
كونوا متوازنين في تلبيتكم لاحتجاتهم المادية والمعنوية ..
أولادنا بحاجة إلى الحب والانتماء وإلى تقدير الذات والاحترام ..
بحاجة لمن يسمعهم ويشاورهم ويتناقش معهم ..
بحاجة إلى من يحسسهم بالأمان ..
محتاجين أشياء كثيرة فاقدينها حسيا وروحيا ..
فتفقدوها إنتوا وأشبعوهم فيها قبل لا يفوت الآوان ..
وأختم موضوعي إلي ومهما أسهبت فيه ما ينتهي الحديث عنه بهمسات أخيرة ..
وأقول :
يا فاضلة تأكدي إنه ما يصير خلل في تربينا إلا لمن نركز على شيء واحد في أولادنا ,
ونترك تغذية باقي عوامل شخصيتهم ..
علميهم يحبوا الحياة ويحبوا أنفسهم من خلال تقديرك لهم ..
امدحيهم , شجعيهم , ادعميهم ليس ماديا وحسب !
بل هناك أشياء لا يستطيع فعلها إلا قلبك ..
.
.
أصلح لنا المولى ذرياتنا أجمعين وبارك فيهم وجعلهم من الصالحين ..
كتبته من قلب أم مقهور متأملا باق من الخير في ثمار طيبة ..
{ إن أخطأ فمن نفسه والشيطان وإن أصاب فمن الله }
.. دمـــتـم في رعاية الله ..
.
.
وتربيه الاطفال والله مو سهله