السلام عليكم ورحمة الله
بنات تعرفون الحفريات الموجودة في كل حارة
دائما يكون بجانبها محول كهربائي وسلك طويل من انارة حول الحفرية تنبيه للسيارات اللي تمر
الحاصل يالغاليات انه قدر الله وحفرو حفرية كبيرة قريب من بيتي
وبجنبها محول كبيييير مرة وصوته مزززعج
اللي لفت نظري وانا جايه للبيت بالليل كان فيه عامل متلحف بطانيه ونايم بجنب المحول عشان يحرسه
يا اخوات متخيلين كيف قضى العامل ليلته وسط ازعاج المحول والغبار والبرد
متخيلين كيف نايم بوسط الشارع وازعاج السيارات من حواليه
يعني وانا نايمة بفراشي كنت منكتمه من الغبار ومو قادره اتنفس
فتخيلي معي هو كيف قضى ليلته..؟؟؟
المشكله ان لهم اكثر من اسبوع يشتغلون والله العالم متى بيخلصون..
يعني وش بيضر لو وفرو له كبينه متنقلة ينام فيها حالها حال هالمحول اللي ينقلونه من حارة لحارة
والله يبنات وضعه وهو متقرفط بالبطانيه يصعب على الكافر فمابالك بنا كمسلمين وين الرحمة من اللي رماه هالرمية
المهم يااخوات حبيت الفت نظركم لهالفئه اللي لاحول لها ولا قوة والله حطهم بين ايدينا
ليش يابنات مانسوي حملة لأطعام وكسوة هؤلاء المساكين
ايش بيضرني لو سويت له براد شاهي او عطيته لقمة او بطانية زايدة او قبوع او قفاز
دائما اشوف عمالة بوسط البرد مايقدرون يتحركون وملابسهم باليه ووضعهم مزري
وبالصيف يشارفون على الموت وهم يشتغلون بعز الحر واجسامهم تفقد الكثير من السوائل
ليش مانعطيهم من الفائض اللي عندنا
يمكن البعض يفكر انهم مو بحاجة مادام يستلمون رواتب لكن الحقيقة هم امانه ونشوفهم كل يوم امام عيونا
وحنا مسلمين والمسلم للمسلم
فيه بعض الشركات ماتخاف الله تجيب العامل وتكرفه كرف ولاتعطية الا اليسير
السنة الماضية سمعنا انه يمنع منعا باتا تشغيل العماله وقت الظهيرة
ولكن مع الاسف قليل اللي التزم
حبيت انبه لنقطه انه مو بس عمال الحفريات بحاجه
ابواب الخير كثيره وقريبة منك مو محتاجه انك تبحثين او تدورين
بس يبيلنا نحس ونستشعر معاناة غيرنا
عندك عمال المحطات
عمال البناء
عمال النظافة والبلدية
عارفه ان كلامي مخبوص ومو مرتب بس اهم شي وصلت الفكره
خواتي..ارفعوا الموضوع ولو بكلمة عشان يقراه الجميع
واعلم انكم سباقات لفعل الخير
الله يفتح للمسلمين اجمعين ابواب رحمته وفضله
دمتم بحفظه
U-TURN @u_turn
محررة برونزية
يلزم عليك تسجيل الدخول أولًا لكتابة تعليق.
امجاد15
•
جزاك الله خير والله انك صادقه يكفي بس لما نساعدهم نشوف الفرحه في عيونهم ياحلوها من لحظه لما تحسين انك ادخلتي الفرحه على قلب انسان كانك مالكه الدنياء وما فيها
يارب اني اسالك رضاك والجنه
يارب اني اسالك رضاك والجنه
الصفحة الأخيرة
و الله يرزقنا من واسع فضله