سؤالى عن الخثرة طبق كويتي؟

يسلمووو

الحقيقة ماعرفها ولكن سويت بحث في قوقل وطلع هالطريقة وان شاء الله تكون اللي تقصدين:


المقادير

3 سمكات زبيدى متوسط الحجم منظفين جيدا ويرش عليهم الملح والبهار ويتم قليهم بالزيت ويتركون جانبا


يفرم 3 بصلات متوسطة الحجم وتوضع فى القدر والدهن ويترك حتى يصفر لونه ثم يوضع الثوم المدقوق وملعقة الكارى وملعقة البهار المشكل ويقلب جيدا ثم يوضع 5 حبات طماطم مفرومة ويقلب جيدا ثم علبتين معجون طماطم مع التقليب ثم يوضع الشبت وع الكزبرة المفرومة حسب الرغبة ثم يضاف 6 اكواب ماء
ويترك حتى يغلى ويضاف اللومى الاسود بعد خرمه بالسكين ليمونتين او 3 وعند الغليان يضاف السمك ويترك يغلى قليلا ثم يضاف كوب الرز والملح ويترك على نار هادئة حتى يستوى


وعندما يستوى يضاف ثوم مقشر ويترك حتى يستوى الثوم


وبالهنا والعافية
................................
اتمنى اكون افدتك

ان شاء الله البنات بيفيدونك

وهذي وحدة اسمها دندرة في منتدى كويتيات كاتبة هذي الطريق مادري هي نفسها ولا لا مفصله فيها صاحبتها مره<<<<<<<<<الاخت مفتوحه نفسها اليوم على الكتابة امشي وأرد

بسم الله بدينا وعلى النبي صلينا .. اول شي نجهز جيلتين عيش ونغسلهم زين ونقعهم ونخليهم على كتر .. وبعدين نبدي بالمرقه .. انيب زبيديه ونغسلها زين ونفركها بكركم ونخليها على كتر .. طبعا انتوا تعرفون طريقة المرقه وانا الحين بقولها بشكل سريع .. شدتين كزبر ومثلهم شبنت و3 بصلات و4 طماطات ..4 فصوص ثوم.. والبهار عباره عن .. ملح .. فلفل اسود .. لومي اسود سحاري .. كمون.. كركم..والحين نبتدي

اول شي نحمس الطماط مع نتيفة دهن وقفشه صغيره مالت الشكر ملح وننطر لما يذوب وبعدين نحط البصل ونحمسه وبعدين نحط البهار والبهار قياسه قفشة الحوس مالت الشكر ماعدا اللومي السحاري قفشتين او اكثر على حسب ذوقكم .. وبعدين نحط الخضره ونحمسها مع الحميس لمدة عشر دقايق .. واخر شي نحط الثوم وبعدين الزبيديه .. والزبيديه في ناس يفضلونها مقطعه وفي ناس يبون على عدالها وفي ناس يقلونها نص قليه وفي ناس يحطونها على من غير قلي يعني على هواكم ..وتخلون الماي يغطي السمجه وعقب نص ساعه شوفي الماي اذا نازل عن السمجه عادليه انزين؟؟ مو تخلينه يزيد ولا ينقص والحين نبدي نكت العيش .. اي هني الحجي العيش تيودينه بايديج يعني تخمطين خمطه وتكسرين العيش فوق المرقه وشوي شوي لما تخلصين الجيلتين .. اي وقبلها ذوقي المرقه وشوفي ملحها شلون صار اذا ناقص زيدي الملح لان العيش راح يغير طعم الملح .. عقبها حركي الخلطه بالملاس شوي شوي ومن ينزل مستوى الماي حركي شوي شوي وديريبالج لايتلزق العيش حدر ويحترق .. وخلي الخثره تصير مهموجه يعني مثل المريس لاهي اللي فيها ماي وايد ولا اهي الناشفه وبعدين قصري على النار وحطي الجدر فوق الحديده ونطري ربع ساعه وعليكم بالعافيه
طبعا تقدرين تحطين لومي سحاري عدل مع المرقه وتقدرين تحطين فلفل خضر .. و وقت النجاب تيبين قنجه وتنجبني فيها الخثره ولازم تحطين فوقها دهن عداني تمسحينه مساح وكثري منه عشان ريلج ينقث ويمكن يوقف قلبه ومايحن عليج عقبها
.............................
اسلوبها يجنن ، اتمنى اني افدتك

ينقل من الاطباق الساخنه لاطباق عالم حواء