سؤال عن ماكينه خياطة تخيط مثل الجاهز

عزيزتي ندوو..أولا أحب أعرف إنت إش غرضك من شراء المكينة هل حتعملي مشروع خياطة من البيت وحيكون إستخدام المكينة كثير وعلى يد خياطات ,ولا لإستخدامك الشخصي..عموما المكاين اللي في المصانع كثير من الخياطين يستخدموها وهي غالبا سريعة جدا (ما تناسب المبتدئات) وما تعمل غير غرزة مستقيمة وتجي ثقيلة وحديد وبطاولة وتتحمل شغل كثير ,وغالبا المتوفر عندنا ماركة جوكي. وبالنسبة للتنظيف (السرفلة)هذه ليها مكينة خاصة غير مكينة الخياطة ...بس للعلم فيه مكاين تخيط وتعمل تنظيف في نفس الوقت (هي أصلا مكينة تنظيف_أوفر لوك_ بخمسة خيوط) ..
أنا عندي مكينة عادية منزلية إسمها ياسمين ومكينة تنظيف عادية برضه ماركة جانوم وخياطتي نظيفة مثل الجاهز ,يعني بإختصار يعتمد على اليد اللي تخيط وعلى وجود مكينة أوفرلوك للسرفلة.
أي سؤال أنا حاضرة باللي أعرفه..أتمنى أفدتك ,ويا ريت تقولي إنتي من أي مدينة علشان إذا تبغي تعرفي أماكن بيع المكاين ممكن أحد يساعدك.

هلا بك اختى السنابل

اشكرك على الرد

غرضي منها تجاري في عمل مشروع

طيب المكينة جوكي تقدر تستخدمها الخياطة الى تستقدميها لنفترض انها كانت متوسطة الاحتراف ام في مشاكل وتحتاج ايدي مدربه
وانا من السعودية وين ممكن القاها
والله يوفقك

أهلا ندوو..المكينة مو معقدة ولكن تحتاج تدرب على السرعة لأنه تحسي القماش يجري تحتها..أنا شخصيا ما أحب السرعة هههههههههههه وجربتهاصراحة في بدايتي أول ما رحت أتعلم خياطة في مشغل _يمكن أتعقدت في بداياتي_ ,فما أدري اللحين لو أخيط بيها كيف أسوي ..
وطالما تبغيها لمشغل لا يهمك جيبيها وحتى لو ما كانت الخياطة متعودة على السرعة تتعود غصبا عنها ههههههههههه.
كنت أتمنى تحددي المدينة اللي عايشة فيها وليس الدولة فقط ,لو كنتي من جدة تلاقيها في البلد ,شارع الذهب هناك محلات بيع المكاين ,وتلاقيها عند با عقبة هو وكيلها...بالتوفيق أختي.
أتذكرت شي ممكن تحتاجي مكينة تعمل غرزة زجزاج علشان العراوي حق الأزارير ,فممكن تشتري مكينة عادية صغيرونة لهذا الغرض وتنفعك لو ما كانت الخياطة لسة أتدربت على السرعة .

اشكرك حبيبتى على التفاصيل

وانا يعنى قريبة من جدة واعرف المكان الى قلتي عليه

ومشاء الله من كلامك شكلك خياطة وتعرفي فيها

هل تعرفي مشغل يشتغلو بهذي المكاين بروح اخيط عندهم واشوف الشغل قبل مااشتريها ؟؟؟

ويسعدك يارب على ردك عليا

ربي يسعدك إنتي كمان ويوفقك ,شكلك من مكة..ههههههه ,وبعدين ما يحتاج تروحي تشوفي الشغل عند مشغل ..روحي المحل نفسه وجربي زي ما تبغي ,ولو معاك الخياطة تجرب بنفسها وإذا لا دي ولا دي خلي البياع يجربلك بنفسه ويوريك الخياطة كيف..بس ترى جوكي ما يحتاج تجربيها معروف شغلها ..يمكن فيه مكاين ثانية ما أعرفها ..بس إنتي قولي للبياع إنك تبغي وحدة قوية علشان مشغل ,أذكر فيه محل ما يبيع غير مكاين المصانع (يمكن يكون عنده غير جوكي ما ركزت صراحة)وأعتقد إنه باعقبة بس مين فيهم ما أدري لأنه فيه أكثر من واحد (فهد با غقبة_سالم با عقبة_وواحد ثالث أعتقد)..
وترى أنا خبرتي بسيطة جدا في المكاين ,لكن قلت اللي أعرفه وأسمعه ومع إني ما أروح مشاغل كثير لكن شفتها عند أكثر من مشغل .