سؤال لبنات دبي

السلام عليكم ورحمة الله وبركاته ..
إختي أنا من الشارجة مو من دبي ...
وأتمنى أساعدج بس أنا أعرف الأماكن في الشارجة ..
لو تقدرين تروحين سووووق (( الغوير ))
تلقين فيه الأقمشة الخاصة بالمفارش لأنها عريضة في أنواع كثيرة وبأسعار حلوة ..

أما بالنسبة للقطن ((الحشو)) ..
في محل ادوات الخياطة بعد في الشارقة عنده ويبيعها بالمتر ..ولو تبغين تفاصيل أكثر لا تترددين
وأتمنى بنات دبي يساعدونج ..

على فكرة شوفي موضوعي مفرش للطفل ..يمكن يساعدج ..

:26: :26:

وعليكم السلام ورحمة الله وبركاته
انا روحي اسوي المفارش اذا تبين الخام قطن عادي بتحصلينه مثل ماقالت اختي *** دموع الاسلام***
في الشارقة ( سوق الغوير ) ومن افضل المحلات الموجودة هناك محل الزبير المتر على 4 دراهم
وعندج في دبي ( شارع نايف ) بس القطع فخمة شوي من 20 درهم للمتر وانتي طالعه
وبالنسبة للحشو انا افضل انج اتسوين كفرات والحشو واحد ومنفصل
واذا تحبينه قطعه وحدة فصعب عليج اتسوينه فالبيت لان يباله ماكينات خاصة
عندي لج اقتراح سوي اللحاف وخلي القطان يحشيه
واذا عندج اي سؤال انا حاضره

السلام عليكم ورحمة الله
مثل ماقالوا الاخوات بتحصلين خامات شحلاتها في سوق الغوير في الشارجة
انا مرة خذت قطعة وخيطتها مثل كيس كبير حق البطانية
ودخلت البطانية داخل الكيس وسويت ربطات على اساس اقدر اغسل الكيس
وسويت حق المخدات لبسة من نفس القطعة ولحاف وستارة ولبسة حق الزبالة

والسمووووووووووحة

مشكورات الغاليات ما قصرتن..انا ما عندي مشكله لو المحلات في الشارجه عادي بسير تراها اللا عدالنا بس دلوني على هذا السوق لو سمحتوا (الغوير) هل هو مثل نايف؟ و لو تدلوني على محل لادوات الخياطه يبيع الحشو
صراحه يا دموع الاسلام موضوعج عن مفرش الطفل هو اللي اغراني اني اسوي المفرش بنفسي و لاحظت مثل ما قلت لج في ردودي من قبل انه اقمشتج وايد حلوه تضيف على شغلج المرتب فخامه.
sahayeb اختي المفارش اللي تسوينها تحشينها بدوفيه؟ المشكله زوجي يستحر منها و يفضل اللي بقطعه وحده لأنها اخف..بشوف لي قطان يحشيلي اياها.
المنـ صدى الصمت ـسية..فكرتج حلوه مشكوره الغاليه

إختي لو تعرفين سوق الرولة ...
سوق الغوير من وراه ..

أما بالنسبة للحشو لو بتروحين للقطان اللي بيخيط لج المفرش هو بيكون عنده
أما إذا بغيتي تشترين من محل الخياطة في محل أسمه بيت المرح
وهم محلين عند بعض صغير وكبير تلاقينه في الكبير

أما بالنسبة لسوق الغوير يبيع كل شيء وأتوقع نفس نايف ..