بنات متأكدات انكم عتيبياااات صدق :( >> بذمتكم ماتدرون ان فيه لبس معين لنا ؟
.
اول شي كل فخذ لها لبس معين .. والبنات اللي يقولون مانعرف الا الكرته هذه يلبسونها في الأوقات العاديه بس وقت الزواجات والأعياد لا لهم تراث ولبس معين .. واعتقد كل قبيله لها لبس معين ..
.
بالنسبه لنا اعرف ( الثوب ) و (جديل ) >> هذا زي الحزام ينحط على الثوب و (قرقوش ) ينحط على الراس (وعصابه ) بعد تنحط على الراس .. والعرايس نزيد لهم على هاللبس شي اسمه ( ردايه ) نحطها على الراس و (ومسفع ) نلفه عليها .. وبعدين نكمل لبس الذهب .. ونلبسها البرقع .. يكون من القماش ولونه احمر وعليه فضه بنقش حلو ,,
.
طبعا هذا كانو كله يسوونه زمان ويخيطونه امهاتنا بخيوط ملونه (احمر واصفر واخضر وبرتقالي ) ويضيفون خيوط تلمع ومنظره حلووو وبالنسبه للعصابه والقرقوش الشغل الغالب عليها بشي اسمه ( صب وهذا سلمكم الله بعد هم اللي يسوونه يجيبون السبيك ويسيحونه على النار وبواسطه خشبه يسمونها ( مشقره وحاجه تشبه الصحن يسمونها مجرفه ويسيحون عليها السبيك ويسوونه صب صغااار وبعدين يقومون بعمليه التلويج يعني يخرمون الصب بأبره عشان يقدرون يخيطونه بخيط في القماش ) >> اشتاق للبسنا واحبه موووت بس لبسه يتعب وثقيل مره وانا اشرح لكم احس عمري صك السبعين هههههههههه :)
.
كان يبيعون الثوب اذا خيطوووه بـ 6000 آلاف ريال والقرقوش بـ 5000 آلاف والعصابه بـ 3000 آلاف ريال وهكذا يعني اللي تبي تشتغل تكسب ذهب من وراه .. بس للأسف بدأت تندثر نوعا ما .. بسبب تنافس النسون على هالشغله والغيره اللي تصير ويمكن انها توصل لمشاكل يتدخلون فيها الرجال .. لذالك شافوا انهم يمنعونها خصوصا بالزواجات .. ^_^
.
.
عندي صور كثيره للبسنا بس استأذن الوالده .. واذا وافقت رزيت لكمـ الصور هنـا :)
.
.
نسيت شي ( ترا اقرب ناس يشبه لبسنا لبسهم هو لبس النفيعيااات لي صديقه نفيعيه واكتشفنا ان لبسنا ولبسهم واحد حتى نفس المسميات تقريبا ^_^

ياحليلكم يالعتيبياااات


بصرااااااحة


كنت أفكر قبيلتنا والدواسر والمطران بس هم اللي يلبسون براقع


لأن لي صديقة عتيبية واستغربت البرقع على أمي ((أمي مرة كبيرة))

عالعموم انبسطت بموضوعكم ياعسولااااااات

كان نفسي افيدك بس حجاااااااااااااازيه الاصل

يالله أنك تحييهم بنااااااااات العم متجمعاااااااااااااااااات يا حبي لكم

سؤالك صراااااحه خطير ويستااااااااهل البحث ههههههههه

ولعيووونك اتصلت من ماليزيا على جوال جدتي>>>جدتي خطيره لا تغركم

أول شي دقيت عليها ويوم شافت الرقم دولي ماردت وخافت أنه مزعج خخخخخخ

رحت أنا ودقيت على البيت وقلت لخواتي خلوا جدتي ترد على جوالها وفعلا ردت ودار بيني وبينها الحوار التالي:

سلا:السلام عليكم مساء الخير ياجده

جدتي:هلا ياأمي هلا ياريحة جدي خخخخخخخخخخخخخ

سلا:جده عندي سؤال مهم ومطلوب علي في الدراسه

جدتي:لبيه ياامي اسعلي خخخخخخخخخخخخ

سلا:جدة من زمان يوم كنتوا في البر وش كنتوا تلبسون يالحريم؟؟؟

جدتي:نلبس هدومنا بعد!!!!

سلا:جده ياحبي لك ادري هدوم بس وشلون شكلها؟؟؟

جدتي:ثياب شوال وبخانق وبراقع

سلا:طيب ياجده الثياب مالها شكل أو لون مميز؟؟؟

جدتي:لا يابنيتي الثياب أشكال والوان وكل وحده تلبس اللي يعجبها

سلا:جده يعني حريم العتبان مالهم لبس غير القبايل الثانيه؟؟؟

جدتي:لا الثياب واجد وكلن يلبس اللي يعجبه والعتيبيات مثل غيرهن من الحريم>>>>اجابه دبلوماسيه هههههه

جدتي: أبوتس ووخيتس وشلونهم؟؟؟ خخخخخخخخخخخخ قطعت السالفه الله يطول بعمرها ههههههه

إن شاء الله تستفيدووون من هالحوااااااار .....

اختى مراسيل يكون بعلمك بان النفعه فخذ من افخاذ قبيلة عتيبه .وانا معجب بمشاركتك .وقلت اخيرا وجدت من يقول لنا عن لبس العتيبيات ولكن بصراحه استغربت عندما قلت بان اقرب لبس للعتيبيه هى النفيعيه ...............................
تحياتى