سؤال للمتزوجات فقط.... واصحاب الخبره

فعلن والله اني مثلك احتار ناس تقول لاتحطينه كل اهتمامك///وناس تقول اهتمي به ودلعيه والله اني حرت

أكبر غلط طاحو فيه النسوان انهم خلو زوجهم محور حياتهم .. ومافيه أحد بدنياها إلا هو !
يختي انتي تزوجتي .. مو معناها انك انسلختي من كل حياتك الماضية ودخلتي حياة جديدة مافيها إلا " زوجي "
تنسين صاحباتك , واهلك وطلعاتك والاشياء الي تحبينها .. ومضيّعه وقتك فيه !
وكلشششششش ولا الي تترك دراستها او تحول انتساب لما تتزوج , مع احترامي بس اشوفها انسانة مالها شخصية ولا طموح ولا كيان , يعني زوجك بيترك دراسته لو هو يدرس مثلاً , حتى يقابل حضرتك ؟
ولا هو نسى اصحابه ولا نسى اهله لما تزوج او تغير ؟ للأسف لا
حتى الرجال مايحبون الانسانة الي كذا .. راح يحسون انهم متزوجين انسانة تبعية تتبعه في كل شي .. مو مستقلة بحياتها
لاوتلقينها شاقية نفسها من كلم ووين راح ووش سوى !!

خلوكم "وسسسسسسسسسسط"
لا افراط ولا تفريط .. دلعيه , لبس حلو وريحة حلوة ونعومة واهتمام , وبلاش حركات الغباء والليالي الرومنسية الملونة , رجالنا شرقيين مايحبون الاشياء هذي , وبالعكس تقلل من قدرك !
اهتمي في لبسه , عطريه قبل يروح واستقبليه لما يرجع , اهتمي لأكله ولبسه .. اهتمي فيه بس بدون ماتهملين نفسك ,
وحبي نفسك .. يحبك , لاتقدمينه على نفسك ابد واتركو الايثار الي ماخذ عقولنا
طولت مو :09:

انا من رأيي انه على حسب طبيعة العلاقة بين الزوجين
فإذا كان الزوج مايهتم في زوجته ودايم مشغول عنها ولا يعطيها احتياجاتها الغريزية من حب وعاطفة فالمفروض ما تحصر نفسها فيه بس وتنتظر منه الإهتمام الكامل بها لإن الزوجة بهذا الشكل راح تحس انه مقصر في حقها وراح تغضب منه وتحاول انها تحصل على اهتمامه بشتى الطرق وبعض هذي الطرق ممكن يفهمها الزوج على أنها تنكيد
فممكن مثلا تقول الزوجة لزوجها ياخي انت ماتطلعنا وماتمشينا وماتجلس معنا ووو... الخ وهي قصدها طلب الإهتمام لكن الرجل في هذي الحالة ممكن يغضب من هذا الأسلوب ويقول توني مطلعكم الأسبوع اللي راح وكل يوم أجلس الظهر في البيت وانا سويت وفعلت ووو... لكنكم ناكرات للجميل كافرات للعشير ...الخ فيزيد نفور الزوج من البيت
في حالات زي هذي الأفضل للزوجة انها تشغل نفسها بأي شي في حال غياب الزوج حتى إذا رجع للبيت يلقى زوجته ماهي متكدرة ولا متضايقه وتستقبله بوجه طلق ووقتها بيحس الزوج ان زوجته ملاذ آمن له في أي وقت

أما إذا كان الزوج محب ومهتم بزوجته فالمفروض ان الزوجه تبادله الإهتمام ولا تنشغل عنه لإنها لو انشغلت عنه راح يحس بفراغ عاطفي راح يحتاج وحده تسد رغبته العاطفية فلو ما حصلها في البيت ممكن يدورها برا يا أما بطرق شرعية أو غير شرعية.(هذا على فرض ان الزوجة تعطي زوجها كل إحتياجاته المادية فقط مثل الأكل والغسيل والنظافة والمظهر الخارجي) أما لو أهملت زوجها بشكل كبير فأكيد بتصير مشاكل أكبر والكل يعرفها
أمالو حصل الزوج مايسد حاجته في البيت من دلال ومحبة واهتمام وقتها ماراح يفارق البيت وراح تنعم الأسرة بحياة هنيئة
وتحقيق السعادة والرضى بيد الله واحنا بس نعمل بالأسباب
والله الموفق

سومة

المقصد يا عزيزاتي مو انك ما تهتمين فيه وتكرشينه بس برضو خلي لك كيانك الخاص يعني انا اعرف بنات تركو دراستهم عشان ازواجهم حتى يا ناس الهوايه اللي تحبها تركتها عشان زوجها تحب القراءة تركتها عشان زوجها والرسم تركته والكتابه تركتها طيب ليش؟
وفي بنات تشتغل تكرف طول النهار بالدوام واخر الشهر البطاقه المصرفيه مع حضرته طيب ليش؟ من فيكم اللي يشتغل؟
راح يتمشى مع اصحابه بدل ما تقول فرصه اقعد فيها مع نفسي اسوي شي احبه اقرا اتفرج بالتلفزيون ..لا تجلس يومها كله في حالة قلق الله يعلم بحالتها لا ارتاحت ولا ريحت الرجال في طلعته
قالها اسمني سمنت قالها انحفي نحفت أنا وحده من قرايبيننا زوجها كذا اسمني سمنت وبعدين لا لا انحفي وجلسو كم سنه وقال لا ارجعي اسمني والمسكينه ترجع تبي تسمن وكل ما زادت كم كيلو قال لالا لسى ولسى كل شي يسمن كلته وفي الاخير طاح اللي براسه وقال خلاص بكيفك الحين تبين تنحفين انحفي وشو ذا؟ اجل انا لعبه عندك تحركني بريموت كنترول ما يصير الكلام ذا كبرو عقولكم شوي يا بنات
صديقاتها تستغني عنهم ولا عاد تتصل ولا عاد تسال كانه ما تزوج احد الا هي يعني اذا اخذتي لك ساعتين بس في حالة عدم وجوده والا في حالة انه نايم وكلمتي فيها صاحباتك ما خربت الدنيا يعني
خلي لك كيان خاص فيك لا تستغنين عن ذاتك عشانه وتفرطين في كل شي ويصير هو محور حياتك ترا والله مصيبه لو كان الزوج الشي الوحيد بحياة زوجته مصييييييييييييييبه

أنا اختي زي كذا تركت دراستها عشانه والله العظيم وربي فوقي يشهد انها الحين قاعده بالبيت لو نسالها اليوم كم التاريخ ما تعرف لدرجة انها مره تسالني احنا الحين عام كم؟1430 والا 1429؟ وامي طلبتها تكتب لها بورقه خطاب تسلمه للمدرسه ماهي عارفه تكتب يا ناس ناسيه الكتابه تخيلو

وسلامتكم

اهتمي فية بس مودرجة انو يصير كل شئ وانسى كل شئ