سااااااااعدوني ... ما أعرف شو أرد عليها؟!! وبصراحة مصدووومة

السلام عليكم ورحمة الله بركاته،،

ما أعرف كيف أبدأ الموضوع وياكم بس اعذروني.. بحاول أجمع أفكاري وأسرد المشكلة..

هي من أعز وأقرب صديقاتي من أيام الإعدادية
كنت أحسها دايما أقرب إنسانة لقلبي ونفسي
وقت الأزمات والمشاكل والضيج ألاقها معاي
تخفف عني وأخفف عنها تساعدني وأساعدها
كل أحاديثي بالبيت عنها لدرجة إذا ما تكلمت عنها
أمي وخواتي يسألوني عنها وعن أخبارها:)

المهم من سنة خفت علاقتي فيها كل ما أتصل ما ترد
كل ما أحاول أطمن عليها وعلى أخبارها نادر ما ما ترد
استغربت منها وبدأت علاقتي وياها بالفتور :(
ما عادت تسأل عني حتى لو طرشت لها مسجات أنا محتاجتنها
ما ترد علي حسيت بغصة بقلبي حاولت أعرف اللي مغيّرنها
تتعذر دايما بالشغل ومشاكلها بالبيت وظروفها فقللت اتصالاتي
وإذا اتصلت ما أطوّل بس أطمن إنها بخير وعلى أهلها وخواتها:(

المهم بالفترة الأخيرة بدت تتصل وعلاقتي فيها بدت تتحسن
خبرتني إن في شخص متقدم لها وأهلها وأخوها موافقين
وهو الظاهر من ربع أخوها إنسان ممتاز بشهادة الجميع
دين وخلق وسمعة طيبة والكل يمدح فيه وكل بنت تتمناه:42:

وهي تباه ومقتنعة فيه لكنها خاااااااايفة وااااااااااااااااايد

والمصيبة هي علاقاتها المشبوه كانت تدخل مواقع للزواج
من الضيق وخوفها من إنها تعنس رغم إنها في نهاية العشرينات
لكن الظاهر البيئة اللي حواليها ونظرة الناس لها خاصة بعد ما عرست
أختها الصغيرة السنة اللي طافت بدأت الأفكار عندها تتعزز وللأسف

وبحكم ضعف تجربتها وطيبتها وعزلتها للناس انجرفت ورا الشيطان
وبدا يلعب براسها وفي شباب أعوذ بالله منهم ما صدقوا لقوا وحدة
ساذجة قصوا عليها وكانت تنفذ كل شي يطالبونها فيه حتى لو حساب نفسها
كانت تكلمهم وطرشت لهم صورها بحجة إنه لازم يشوفها ويقتنع فيها
ومع الوقت حست إنهم يماطلون وما يبون الزواج تفكيرهم بأشياء ثانية

كانت تترك هذا وتترد للمواقع وتقتنع بثاني وثالث وما تدري إن مالهم
غير اللعب ببنات الناس وأعراضهم وهم أبعد ما يكونوا عن الزواج
والكارثة في واحد قص عليها واستفاد منها ماديا وبعد ما حصّل اللي يباه اختفى

المهم الحين بعد فوات الأوان (بعد ما تقدم لها الشخص) حست بغلطها
يتني بعد ما وقع الفاس بالراس تكلمني وتباني أوقف وياها
وتقول إنها تابت وما راح ترد لهالشي وإنها كانت ما تنام الليل وتعرف إنها وايد غلطت
بس هدفها كان شريف وما كانت حاسة بحجم أخطائها لكن اليوم انولدت من جديد
تابت وكانت تقوم الليل وتدي ربها يغفرلها ويتوب عليها وما راح تعود لنفس الأخطاء

أنا انصدمت فيها باعتني بيوم عشان خرابيطها وأفكارها وعلاقاتها واليوم ترد لي
لا وتباني أوقف معاها وما أتركها تعود لنفس الطريق والعلاقات

حسيت بدموعها وصدقها وأعرف إن قلبها نظيف وأعرف إن الظروف والشيطان
قدروا يدفعونها لهالطريق كانت بنية ملتزمة وتدفعني للخير وتعلمت منها وايد

المهم الحين ...
هي خايفة ما تدري شو ترد ع الشخص المتقدم؟
وما تدري هل تخبره بمغامراتها وعلاقاتها؟
ولا إن الله بيستر عليها وخاصة إنها تابت وما راح تعود لها مهما كانت الأسباب؟؟
تخاف إن ما صارحته ويكشف حقيقتها بيوم بتكون المصيبة أكبر؟
خاصة إن في شخص وعدها بالزواج وهو عنده صورها وتخاف يرجع يسببلها مشكلة!!
تخاف إن هذا اختبار من رب العالمين فلو ما صار نصيب تنهار؟

ما أعرف شو أقولها؟؟
الله يهديها خربت على عمرها بنفسها
استعجلت على رزقها ونصيبها ووقعت بالحرام