الله يهديييييييييييك ويستر عليك

اول شئ اتركي هاذي اللي سميتيها صديقه وهي مو صديقه بالعكس هاذي انسانه ماتحب لك تالخير والواضح اانك تاثرتي فيهم بالبدايه وحتى النهايه متمسكه فيهم
اتركيهم وتقربي من ربك وصدقيني الحريه اذا احد اعطاها لك كامله وفتح لك المجال المفروض تفرضي رقابه ذاتيه على نفسك وماتفكري فالحرام ومو معقوله لو اي وحده زوجها مثل زوجك تسوي مثلك انا زوجي قمه فالجلافه وطبعه كذا صعب التغيير لكن فيه مزايا ثانيه انتي ناظري مزايا زوجك وانسي كلام اللعابين هاذولا
وبالنسبه لتهديد الشاب هاذا لك بصراحه ما ادري بس نصيحه لاتنجرفين معاه حتى لو هددك.........لانه فالنهايه بيخليك عبده وحيوانه تحت رجليه وطلعي بطاقه كلميه منها الين تلقين الحل عشان ماتتسجل المكالمات الصادره اللي على جوالك فالفاتوره ويكون بيده دليل......ز

هلا اختي غريقة يارب في نور الهداية

حبيبتي يقول الرسول (كل ابن ادم خطاء وخير الخطائين التوابون) يعني ياحبيبتي انت فيك خير والدليل انك مو راضية عن وضعك وتبين تطلعين منه .. بحاول اساعدك ويارب اقدر

شوفي حبيبتي مشكلتك لها اطراف كثيرة خلينا نمسكها طرف طرف ..

اولا بداية المشكلة وهو السبب انه ماكان عندك اشباع عاطفي من قبل زوجك فعشان كذا رحتي تنشغلين عنها بالمكالمات والشات وهذا هو الخطير يعني كثير اقرا مشاكل تقول الوحدة اني انا كنت احتقر اللي يسوون هالحركات ولا عمري فكرت اسير مثلهم ومع ذلك ابليس مايترك ابن ادم لحاله الا ما يأثر عليه وهو غافل مايدري . طبعا كلامي هذا مو لوم لا هو كلام لك والي يقرون عشان يعرفون خطر الشات او شئ مثله لأنه باب لأشياء ثانيه فنصيحة افضل شئ للبنت او حتى للولد انه مايدخل شات ابدا ويحرمه على نفسه.

ثانيا طبعا انا اعتقد ان زوجك يتحمل جزء من سبب المشكلة فهو يمكن ما استوعب انك تحتاجين هذي المشاعر وما ادري ليش عندي احساس انه كان احد مأثر عليه بكلام انه النساء ما يحتاجون ان يظهر لهم مشاعر الحب والعاطفة لكن يا حبيبتي زوجك الان متعدل وهذاك تقولين انه يقولي من كلام الحب ولا يتأخر اذا طلبته شئ فهذا بحد ذاته شئ ايجابي يعني اللي كان متسبب بالمشكلة تعدل وهو اللي يخلي عندي والاهم عندك انت اكبر الامل باسترجاع حياتك السابقة وربما احسن لأنه الان تغيرت طريقته معك

ثالثا المشكلة كانت من زوجك وهو اللي جاب لك النت والشات وعرفك عليهم يعني لو انه يدري انك بتسوين كذا كان مافكر يجيبه فنصيحة تبين الحل ؟؟ وعازمة ؟؟ وجازمة ؟؟ ولا فيه مجال للتراجع والضعف ؟؟ماراح اقولك شيلي النت لانه احتمال يساعدك مثل ما انت طلبت المساعدة الان من عالم حواء . النت فيه خير كثير لكن للي يعرف يستعمله وشر كثير للي يعرف نواحي الشر . فاعتقد انك امراه فاهمة وعاقلة وتعرفين الصح من الخطا يعني شات او مسنجر مافيه حطي هذا القانون عندك سواء لصديقات - وبتكلم عنهم بعدين - او رجال اذا كنت عازمة اصدقي مع نفسك اولا واذا كتب ربي واستخدت النت خلية على عام مافي شئ خاص يعني قدام الناس مثل الان تكتبين بالمنتدى لو أي واحد ضعيف نفس ويبي يكتب شئ ويستغلك ما يقدر على العام لأنه في ناس تشوف وتحط حد لمثل هذي الاشياء .

رابعا انت قلت ان الوسط اللي تربيتي فيه كان ملتزم طيب يا اختي ابشرك انك في خير ونعمة والله يحسدك عليها الاخرين . يعني اهلك باذرين فيك بذرة الخير اللي اشوفها من كلامك ترى اهم شئ الاهل . اعرف وحده اهلها الله يهديهم انواع المعاصي من الالغني واللبس العاري والاختلاط وهي الوحيدة اللي متمسكة يعني هذي اصعب حال منك مافي مجال احد يساعدها تحس انها وحيدة وغريبة عن الباقين والرسول تكلم عن القابضين على الدين كالقابضين على الجمر فصحبة هذا سلوكها وهذا اكبر همها تتركينها الزمي الصحبة الصالحة اذهبي لمحاضرات او ندوات او احفظي قران بدار او حتى سجلي بدورة طوري فيها نفسك منها تشغلين نفسك وتكونين صحبه بس مو أي صحبه لا الصحبة الصالحة يقول ربي ( ولا تطع من اغفلنا قلبه عن ذكرنا ) وايش ؟؟ ( واتبع هواه) فلا تتبعين هواك والزمي بيئة صالحة

الحين وش اتفقنا عليه ؟؟
شات او مسنجر مافيه ووش بعد ؟؟ صحبة هذولا تبعدين عنهم تمام؟؟

خامسا بالنسبة للحقير هذا اللي ربي منعم عليه ومسميه انسان فهذا مثل ماقالوا البنات خلي شغلة مع الهيئة هم يدبرون كل شئ بدون فضايح . ورجال امام رجال يعني مو حرمه يستضعفها متى ما يبي

سادسا : وهو اهم من كل اللي سبق الدعاء والله يا اختي ان الدعاء له عجايب . انت عارفة ان الدعء يرد القضاء يعني ربي كاتب عليك من يوم كنت ببطن امك انك بتمرين بهاي المشكلة لكن يمكن ما يحلها الا الدعاء مع الاخذ بالاسباب . اوصيك بالدعاء لا تقولين استحي من ربي لأني عاصية طيب ما تعرفين قصة الرجل الظاهر من بني اسرائيل قتل 100 وربي غفر له او تعرفين قصة الرجل الذي منع عن قومه المطر لأنه كان يعصي الله بالسر 40 سنه ولما قال ربي لموسى بمعنى الكلام انه يطلع الي يعصي ربه طول هالفترة امام الناس ويتوب فلما ضاقت عليه الارض ادخل راسة بثوبه وساله التوبه بسره فنزل المطر ولما سال موسى ربه انه لماذا انزل المطر وهو لم يظهر احد امام الملا ليستغفر قال الله بالمعنى انني سترته وهو يعصيني افلا استره وهو قد تاب علي وحبيت ابشرك اني مرة قريت قصة مثلك وتقول اني دعيت ربي ان يبعد عني كيد الشاب اللي اكلمه وان ربي استجاب لدعائها وصرف عنها كيده . فيه دعاء قولي( اللهم اجعل كيده بنحره)

شفتي يا اختي ربي تواب رحيم غفور وهو خير الغافرين ربك يا غريقة كريييييييييم حليم ولولا حلمه علينا كان انزل علينا سخطة الحمدلله يا اختي انك عرفتي الصح وانت قاعدة تبحثين عن الطريق المستقيم فيه ناس كثير نقعد نقنع فيهم اللي يسوونه حرام ولا يقتنعون شفتي ربي وشلون يحبك هذاه يورويك الطريق الصح بس انت عليك الاقبال عليه بنية خالصة
الصدق مع الله ثم مع نفسك
عدم التراجع والضعف
عدم اليأس ادعي وانت موقنه بالاجابة ( انه لا ييأس من روح الله الا القوم الكافرون )

واعلمي انها كلما ضاقت فالفرج قريب
ضاقت فلما استحكمت حلقاتها فرجت وكنت اظنها لا تفرج

اختي والله رغم كل اللي صار معك انا متأملة من ربي ان راح يفرج لك .عندي احساس ان ربي بيحلها من عنده بس اتجهي له وبعدين مثل ما قلت لك ربي مفرج لك من كم ناحية يعني فيه امل كبيييييييييييييير بالله واحسني الظن به . انت عارفه ان ربك يقول لو ما فيه اقوام يذنبون لجئت بأقوام يذنبون ويستغفروني . ربك يحب العبد اللحوح . انت عارفة ان ابليس اذا وسوس لابن ادم واستغفر الانسان عن ذنبه يتمنى ابليس انه ما وسوس له بارتكاب الذنب اصلا . وان شاء الله متأملة انك بترجعين لزوجك واولادك وانه هالسالفه بتسير سبب هدايتك وهداية زوجك وتربين اولادك على الخير والاستقامة . واتكلي على ربك ( وعلى الله فليتوكل المؤمنون)


اسفه على الاطاله لكن المشكلة لها كم طرف

اللهم يا حي ياقيوم ارها طريق الحق والهدى وثبتها عليه
اللهم اكشف همها وغمها وابدلة سعادة ونور وهداية
اللهم تب عليها انك انت التواب الرحيم
اللهم ابعد عنها وجنبها كيد الكائدين والرفقة الضالين المضلين
واقبلها من عابدك الهادين المهتدين


اللهم امين

الله يهديك ويفتح على قلبك .ويصلح شانك ويستر عليك فى الدنيا من العار وفى الاخره من النار .وجميع نساء المسلمين امين.

اشكركم من كل قلبي جزاكم الله الف خير يااااارب والله انكم بكلامك وردودكم خففته وهونتوا على مصيبتي اسئل الله انه يفرج عليكم ويباعد بينكم وبين الحرام

اختي ماويه
انا معك بكل الي قلتيه انتي وباقي البنات الله يجزاكم الجنه،، يابنات احذروا وابعدوا عن الحرام ولاتتهاونون فيه واتعضوا بالقصص الي تقرونها وانا الحين صرت وحده منها قبل لايتعض فيكم الناس ،، والله اني كنت ادخل مثل هالمواقع واقول مجرد تسليه مو اكثر ومجرد التسليه وصلتني للي انا فيه الله لايبلاكم

مشكوره مريومه وجزاك الله الجنه لكن بغيت اسئلك هل بيدخلوا بالموضوع احد من اهلي او يكلموا زوجي لانه الى الان مافي احد يدري بالموضوع ومابي في الوقت الي اقرر فيه التوبه انفضح وادخل بشاكل

واشكر كل البنات الي ردوا ودعوا لي وكل من دخلت وماردت لكن دعت لي بظهر الغيب والله يجزاكم الجنه ويبعدكم عن الحرام وبنات الحرام