ساعدوني .......ابغى احضر للماجستير

السلام عليكم و رحمة الله و بركاتو

اهلين اختي ام عبد الله

انا عندي ماجستير لغات تطبيقية و دراسة مابين الثقافات والماجور تبعي انجليش.

مو صعب ابدا الا على حسب المكان الي تدرسي فيه يعني لو في الوطن العربي الله يعينك انا درست البكلريوس وخلصت وكملت الماجستير وخلصت واحضر لدخول الدكتوراة و وحدة من صديقاتي هنا بالسعودية لسا يدبوك لليوم اكلمها سار لي دحين باكمل سنتين من لما خلصت الماجستير وهيا لسا؟؟؟

اهم شي يكون عندك خيتو درجات عالية اولا لدخول الماستر. تانيا تعدي التوفل او الايلز او ما يعادلها حسب المطلوب بالدرجات المطلوبة حسب طلب كل جامعة بس معظمها تطلب فوق ال 600 بالتوفل ما يوافق فوق ال 200 نقطة يعني.

لو كملتي ترجمة طبعا تكون عندك خلفية قوية عن الترجمة المتخصصة ادبية طبية صناعية قانونية علمية تقيبنة الخ دا الشي طبعا متوفر اكتر ف الخارج. ما يثقلوا كاهلك بانك تترجمي و تدرسي كل الانواع.

لازم ايضا تكوني شاطرة باستخدام الكمبيوتر للتصميم و البحث و الكتابة و استخدام البرامج السوفت وير لانك حتستخدميها في بعض كورسات الترجمة كالترجمة الالية وتكنولجيا الترجمة و.


ايضا يلزمك تقري و تفهمي وتدرسي شويا في اساسيات البحث العلمي زي وضع المقدمة التاريخية لبحث ما. والحقائق والعرض و طريقة التجربة او النظرية و تحليل التجربة ونتائجها و اخيرا الاستنتاج و بعدين تحطي وجهة نظرك و كلها تخلقي منها موضوع خاص فيك انتي . ترا مو صعب فيه الا كتر القراية لانك حتقري افكار الي سبقوك في المجال وتطوريها او تناقضيها او تزيدي عليها و تطلعي موضوعك الخاص.

ايضا لازم يكون عندك دراية بحقوق الطبع و امانة المرجعية العلمية و خاصة في النقل والفهرسة و فيه قواعد كتير و انظمة مراجع و فهرسة كتيرة لو بغيتي مستقبلا مساعدة فيها افيدك انشالله.

اخيرا لازم خيتو يكون عندك همة و نشاط و طموح لوصول هدفك باعلى الدرجات, والقدرة ع مواصلة البحث العلمي.

و الله يوفقك يا رب و نشوف الكل متعلمين و ينور العلم عقولنا زي مارفعنا رايتو ف الماضي زمنا طويلا و يشيل عن الامة غمامة الجهل يا رب لانو فعلا الترجمة مفتاحنا ع الحضارات الاخرى و مفتاحهم لينا.

حفظك المولى خيتو اتمنى اكون قدرت افيدك و بالتوفيق يارب.