ساعدوني الله يخليكم

السلام عليكم ورحمة الله وبركاته . اخواتي الفاضلات اريد المساعدة والمشورة. اريد ان احكي حكايتي من الصفر أنا تزوجت وعشت ستة اشهر في شقة لحالي أنا وزوجي وبعدها حصلت ظروف قهرية ورجعنا عشنا عند اهله وهما في مدينة اخرى المهم البيت ما فيه غير امه وأبوه بس والبيت شقة مهما كانت كبيرة فهي صغيرة على عائلتين المهم إخوانه يزورونا دائماً هم وعيالهم وواحد من إخوانه عنده عيال شباب وتعرفون أنا لازم أغطي منهم بس كنت كل البس شي على راسي يطالعوني نظرات عجيبة . هما يجون ويجيبون اولادهم ويتمشون في البيت ما كأني بني ادم عايش معهم يدخلون اي مكان ما يدقون الباب على طول يدخلون والله كنت اقفل على نفسي الغرفة واجلس ابكي ولما اقول لزوجي يرد عليه ويقول انتي زوجة عمهم خلاص صرت ما اخبره واكبت في نفسي ...غير كذا عمتي صح طيبة لكنها تحب تحرج الشخص قدام الناس يعني لما يجون ضيوف تحب ترمي كلام علي وتحرجني واذا احد سألني من شي هي بسرعة تجاوب وكأني بنت 12 سنة ما اعرف اجاوب وكل شي فيني تعلق عليه ثيابي على شعري وطول الوقت تقولي انتي قصيره لين مرة قلت لها من قالج اني قصيرة ووقفت جنب سلفتي الي تقول عنها طويلة وطلعنا نفس الطول سكتت، أنا ما احب ارد عليها بس هي تحب تستفز الواحد وتزعل وتكبر الموضوع لو رديت عليها بنفس أسلوبها مع ان كلامها لي زي الطعنات في قلبي لكن اقول هي زي أمي . السنة الماضية جت عندنا اخته وتغيرت عمتي عليه بعد ما راحت اخته وايد تغيرت كنت اجلس دائماً ادعي ان الله يصبرني لاني والله كنت اتعب من أسلوبها تقوم الصبح معصيه تعصب علي وعلى الخدامة بدون سبب وترمي كلام ماله داعي صرت ما اخرج من الغرفة الا الساعة 12 عشان اروح اطبخ الغداء وعايشه أنا وبناتي. في غرفتي طول الوقت ما اطلع بس حق الاكل والحمام مرت الايام وبالرغم من أسلوبها معاي أنا احترمها. لين شوي شوي وردت تعاملني عادي . أنا لما اقول لزوجي ليش ما تسألها ليش تعاملني بالطريقة هذه يقول انتي. حساسة وايد صرت ما اخبره بشي واذا شافني زعلانة يقولي شو فيج اقوله مافي شي لو اصر عليه اقوله بشكي لربي لانه اعلم بحالي المهم قبل كمن يوم عمي لمح كلام على أبوي فديته ما قال بشكل مباشر بس من بعيد لبعيد واحنا قاعدين نتغدا يعني زي ما تقوولون حاقد على ابويه ما ادري هوا بالقصد ولا زلت لسان الله اعلم شو كان قصده المهم أنا أنقهرت وجلست ابكي وطلعت كل الي في خاطري وقلت حق زوجي اني ما بجلس مع اهلك وقت الغداء ، المهم لي يومين زعلانة ما ابي اكلم احد ما اجلس معاهم بس عادي أتحرك في البيت اخرج واطلع عشان بناتي الله يحفظهم .للعلم أنا طلبت من زوجي شقة لحالنا بس هو رفض وقالي لما نبني البيت والبيت الي يقول عنه بيخلص بعد كمن شهر بإذن الله وبكون بروحي مو مع اهله لكن والله احس اني تعبت نفسيا حتى اسبوع ما أتحمل اجلس في البيت معهم لو بنتي مو في المدرسة كان رحت وجلست عند اهلي بس اهلي في مدينة ثانية بعيد عنا ، قلت لزوجي امس أنتا عمرك ما وقفت جنبي دائماً تتركني وطلعني غلطانة كأني طفلة ما اقدر افكر ولا اعرف مصلحتي ، محد من حريم خوانه صبر على معاملة امه زيي أنا ما احب ارد عليها احترمها حتى لو قلبي شاب ضو منها دائماً اقول هما مثل أمي وأبوي ولاني ما أتكلم صارووو يرمون الكلام عليه تعرفون هما لما يشوفون حرمة ولدهم متضايقة من أسلوبهم على طول يقولون لحق ولدهم روح دور لك شقة وعمتي بعظمة لسانها قالت حق أمي انها لو بتسكن مع وحده من حريم عيالها بتسكن معاي أنا لاني مالي خص في شي ومحترمتها وما احب ادخل فيها ولا في حياتها. لكن معاملتها لي خلتني اكره اعيش معاها والله يا جماعة انا تعبت جدا ما تتصوورون كيف أحس اني مخنوقه غريبة في البيت الله يخليك شورو عليه . طول الفترة الماضية. سجادتي هي ملاذي والله مالي غير ربي اشكي همومي بس نفسي احد يشور عليه أخذ رأيه في موضوعي أنا عندي بنتين الله يحفظهم عايشين في غرفة وحدة وطول الوقت قاعدين فيها حتى مرات ناكل فيها يعني بيت مصغر وزوجي طيب وحنون لكن دائماً يشوفني غلطانة بطريقة تفكيري أنا اما أظلمه هو لما يشوفوني متضايقة يحب يخفف عني بكشتات حلوه لكن بصراحه لما اتذكر البيت أتضايق وينقلب مزاجي فوق تحت وأهلي ما بي اضايقهم بهمومي لاني بعيدة عنهم . الله يخليكم طلبتكم لا تردوني أنتو عندكم تجاربك وتعلمتن منها ساعدوني أنا في حاجة لمشورتكم